الموضوع: حرية المرأة في المفهوم الغربي والعربي !! .... نقاش لآبد منه

محمود باشا اولا عامل ايه وازى اخبارك
ثانيا الموضوع مش مقتصر بس على كلامك لانه بيتكلم على الموضوع من وجهه نظر واحده وهى ان الغرب بيشغل المرأه كتحويل لطاقاتها الى خدمه المجتمع والشرق المفترض ان المرأه لو ضمنت تأمين لمستقبلها من الزوج مفترض تتفرغ للبيت
ولكن اسمحللى الموضوع مش بس كده ومش دايما المرأه العامله بتكون بتشتغل علشان توفر دخل ليها قطعا لأ فى ظل الانفتاح الاجتماعى والاقتصادى كتير من السيدات بتعمل فقط علشان تحس بوجودها وتحقق ذاتها وفى كثير من الاحيان بتنجح نجاح ساحق وفى امثله كتير حتلاقيها حواليك لسيدات عاملات"بغض النظر عن زواجها " وناجحه جدا وبالتالى مش شرط عمل المرأه يكون بسبب الماده فقط

وكمان لاحظ ان فى وظايف موجوده حاليا "ممكن مكانتش موجوده فى السابق" بتستلزم عمل المرأه وفى بعض الاحيان لا تستقيم الا بعملها "كالطبيبات فى تخصصات معينه-سجون النساء- داخل اجهزه الشرطه للتفتيش والتعامل - الحضانات والتعليم وهكذا فى كثير من المجالات"
وغير كده كمان ان عمل المرأه فى كتير من الاحيان بيكون بسبب قهرى الصرف على متطلباتها لضيق ذات يد الاسره او الزوج او المساهمه فى مصروف البيت اللى اصبح من يتحمله وحده من الرجال فى عداد الابطال وكمان خد فى اعتبارك ان العمل برضه بالنسبالهم امان بسبب الحاله المجتمعيه اللى بنشوفها من نسب طلاق لاتفه الاسباب وكمان احتمال عدم وجود الزوج للوفاه او تامين لمستقبلها فى الكبر فى صوره معاش
من الاخر عمل المرأه فى كتير من الاحيان ضرورى حسب وضع المرأه نفسها وشخصيتها

رأيي الشخصى ان كان عمل المرأه لغير الضروره او "علشان اخرج واعمل صداقات او غيرها من الحجج الفارغه" فانا ضده تماما طالما فى دخل يكفي "اساسياتها من اكل وشرب وكساء " سواء من الوالد او الزوج او الاخ وان كانت تحب تحقيق شئ لنفسها فمجالات الحياه متسعه واهمها انشاء جيل من الابناء تفتخر بيه وزوجها يفتخر انه اختارها وغيرها من مجالات الدراسه والنفع العام

النهايه ان اى مرأه من حقها تشتغل "طالما لديها الدافع المقنع للشغل" وانا وغيري من الشباب من حقنا لما نختار شريكه لحياتنا نختار واحده حابه تعمل اسره "طالما موفرلها حياه كريمه كما اتمناها لاختى"لو ليا اخت" " وبالتالى انا لما اختار حختار واحده اما تعمل فى بعض المجالات اللى اضمن فيها عدم اختلاطها بشخصيات دون المستوى او تعرضها لمضايقات من احد واما لا تعمل مطلقا ومن البدايه حتفق على ده معاها ومع اسرتها ومن حقها ترفض ومن حقى اتمسك برأيي
وعلشان كده الواحد مش ناوى يتجوز غير لما يقدر يصرف على بيت بكامله دون حاجه لعمل اضافى من زوجته وبالتالى مش ناوى اتجوز دلوقتى خالص

يبقى الخلاصه هم من حقهم يشتغلوا لاي سبب خاص بيهم واحنا من حقنا نختار اللى يناسبنا وده ميقللش منهم ولا مننا ومش كل الشغل بيعتبر اهانه للمرأه .

تحياتى .

eslamrace ..... تسلم ايدك على مشاركتك دي
بس أنا كنت محتاج أتكلم أكتر ف موضوع تاني وهو وضع المرأة لو هي كانت بتشتغل أو لآ وحصل ليها طلاق مثلا !
يعني هي لو معاها طفل او 2 هتصرف عليهم لوحدها منين !!؟
غير كدة طبعا بيكون من المستحيلات ان حد يتقدملها مثلا وتتجوز وطبعا هي بيكون ليها رغبات زي الراجل بالظبط
طيب مش هي من حقها تعمل أسرة تانية مثلا وأولادها معاها !
الموضوع أنا مش لاقيله حل ............ يعني مش هنجيب مثلا راجل ونجوزهاله غصب عنه
وف نفس الوقت العبئ النفسي والمادي عليها هيعمل من ولادها أطفال شوارع أو على الأفضل سواقين تكاتك
وممكن يعمل منها فتاة ليل علشان تحصل بيه مصاريفها واحتياجها الجنسي !!

تعتقد اي اللي ممكن الحكومة تعمله وتمنع بيه حدوث أمور زي دي
على فكرة الموضوع ممكن يبان تافه بس هو ف حقيقته خطير جدا وسبب أغلب الأزمات اللي بتعاني منها البلد

الموضوع ده بالذات له علاقه بثقافه المجتمع المصري
بمعنى ان المجتمع "وخاصه الغالبيه المريضه نفسيا" بتبص بصه دونيه للمرأه المطلقه او الارمله بالرغم ان فى نماذج لسيدات مطلقات او ارامل وفى غايه النجاح سواء اجتماعيا او تربويا ولكن نظره الفئه المريضه دى بتخللى اى سيده مطلقه او ارمله مهزوزه الثقه فى نفسها ودايما حاسه انها مطمع للناس وده اما بيخليها تتعامل بشكل جاف جدا يخللى الاغلب ينفض عنها وبتحس ساعتها بالنقص او يخليها تنفتح اكتر وده بيزود مطامع "الفئه المريضه" وغالبا بتنساق ورائهم

يبقى المشكله مش فى المطلقه او الارمله المشكله فى المجتمع لانك لو سألت الجيل السابق لجيلنا حتلاقى ان زمان كان المجتمع بيقف مع السيده المطلقه او الارمله "وخاصه الارمله" من اهل واصدقاء وجيران علشان يخلوها مش محتاجه حاجه من حد وكانت اللى بتتزوج مره اخرى "وده حقها " بتتزوج علشان هى عايزه كده "ومكانش بينتقص منها شئ " عكس الوضع دلوقتى اصبح الاهل والاقارب والجيران بيبصوا للسيده دى نظره طمع "وخاصه المطلقه"

ولكن ده ميخليناش ننسي نبص على نسب الطلاق بين المتزوجين حديثا اللى لما تقراها تحس ان المجتمع بقي سئ للغايه وبرضه لازم ناخد بالنا من وجود بعض السيدات اللى بتكون متجوزه ونفسها تتطلق لانها متجوزه بس علشان سنها كبر ومحتاجه ميكونش اسمها" عانس" فتتجوز وتبدأ تكره الراجل فى نفسه لحد متنال حريتها وساعتها بتحس انها وصلت لغاياتها ونسب الطلاق الكبيره معناها ان الشباب والبنات بيختاروا شركاء حياتهم على اساس غلط وده محتاج نظره كبيره وموضوع تانى نتكلم فيه

الخلاصه ان المرأه المطلقه او الارمله مفترض"كما فى الدول المحترمه" لا ينتقص من قدرها شئ وعملها او عدمه طبقا لظروفها ان كانت ماديه فهو عيب على اهلها واهل زوجها"للارمله" وطليقها"للمطلقه" لان مفترض حتى لو انفصلت المحيطين بيها يضمنوا ليها ولاولادها عيشه كريمه لا تحتاج معها للعمل بسبب الحاجه او متطلبات الحياه ليها ولاولادها ولكن للاسف لان مجتمعنا نسى او تناسى ما تأمرنا به الاديان والاعراف التقاليد بقت الدنيا سداح مداح واختلت الامور وبقينا بدل منساعدها بنحاول نحميها من الطامعين وضعاف النفوس

العيب مش فى المرأه لوحدها ولا الراجل لوحده العيب فى كل اب وام نسوا يربوا عيالهم على الترابط الاجتماعى والوحده الاجتماعيه العيب فى المجتمع او بشكل ادق العيب فى تغيير اعمده التربيه اللى اهالينا كانوا بيأسسوها فينا واللى كانت بتخللى لا ارمله ولا مطلقه ولا يتيم يحتاج يسلك سبل مشش حاببها علشان يعيش .

تحياتى .

طيب تفتكر ايه اللي سبق الثاني ؟ أو ايه اللي كان نتيجة للثاني ؟
يعني هل المرأة تم هضم حقوقها, فقررت تخرج للعمل للحصول على حقوقها ؟
ولا قررت تخرج للعمل, فتم هضم حقوقها عقابا لها ؟

كلامكم جميل جدا وانا شخصيا استمتعت بقراءة كلامكم ... واستفدت من ارائكم جدا ...
ولية تعليق بسيط على هذا الموضوع وهو بإختصار انة لو هناك تربية دينية صحيحة ماكناش هنسمع عن عدد الطلاقات المنتشرة مؤخرا في مصر ...
يعنى لو البنت والولد حفظوا وفهمواهذا الحديث مثلا ( قال النبي صلى الله عليه وسلم: "تَزَوَّجوا، توالدوا، تناسلوا، فإني مُبَاهٍ بكم الأمم يوم القيامة" ) وهناك كثير من الاحاديث والايات ...
كانوا هايعرفوا ان الزواج اساسة هو تكوين اسرة وانجاب اطفال وتربيتهم تربية اسلامية صحيحة ... وان الزواج فرض على كل مسلم ومسلمة وبالتالى سوف يحسنوا الاختيار ( سواء الولد او البنت ) *
وبالتالى لن يكون هناك اختلاف في وجهات النظر بين الزوجين وسوف تقل المشكلات وبالتالى نسب الطلاق سوف تقل جدا لان كل واحد عارف دورة كويس ...
ولان الفكر بقى مختلف وغريب هانلاقى البنت اللى بتشتغل وعرفت طعم الفلوس مع اول مشكلة مع زوجها بكل بساطة بتقولة ( براحتى واللى انت عايز تعملة اعملة) الكلمة السخيفة دى بقيت اسمعها كتيير
وبعدين احنا كمسلمين مالناش دعوة بالاوربيين ... الناس دى في وادى تانى خالص ... والمرأة محفوظة ومصانة لدى الرجل اللى بيعرف اصول دينة
اما الدعوى الى (حق المرأة) وغير ذلك من العناوين التي ظاهرها الرحمة وباطنها الضلال والخبال، وبدلاً من ذلك الواجب تعليم الناس كيف يربون أولادهم تربية صحيحة ـ دينياً ونفسياً وجسمانياً ـ عملاً بقول نبينا صلى الله عليه وسلم: "ألا كلكم راعٍ، وكلكم مسئول عن رعيته" والله تعالى أعلم، وصلى الله وسلم وبارك على سيدنا محمد وعلى آله وصحبه أجمعين،،،،( منقول )

الحل انك تطبق نفس القوانين اللى بتطبقها الدول المتقدمه كونك دول عربيه او اسلاميه لا يمنع ابدا تطبيق أى قوانين ثبت نجاحها فى دول تانيه