الموضوع: تقرير صيانة العشرين الف لـ byd f0 بالقطامية

بسم الله الرحمن الرحيم

انا الحمد لله يا جماعة عملت صيانة العشرين الف بمركز صيانة شركة الامل بالقطامية واليكم التفاصيل

اولا قبليها بيوم قعدت اتصل على مركز الصيانة ولا تليفون عايز يرد فدخلت على المنتدى علشان اتاكد من الارقام يمكن الارقام اللى معايا غلط فلقيتهم هما هام متغيروش

فروحت داخل على الفيس وشوفت تعليقات ان المركز ده مش بيرد على التليفونات وان الصيانة بتم من غير حجز يعنى بالدور

فروحت متكل على الله يوم الثلاثاء الموافق 1/9/2015 الساعة العاشرة والنصف صباحا على مركز الصيانة فلما وصلت ملقيتش موظف الاستقبال على البوابة ففضلت مستنى لحد ما جه واحد على وشه ابتسامة عريضة وقولتله انت اللى بتاخد الاوردر فقلى اسم حضرتك ايه ولوسمحت رخصة العربية ويا ترى رقم الموبايل كام فلسه بمليهوله قلى المهندس جاى اهوه حضرتك اقف ورا الطابور ده

فوقفت وجه المهندس وشغل العربية وخد قراية العداد وقالى فى اى ملاحظات عايز تقولها فقولتله ان المساحة عايز اغيرها وان بطارية الريموت فاضية يعنى الريموت مش بيشتغل ولو سمحت عايز الزق الرفرف اللى ورا ده فقلى ده مش عندنا انت روح التوكيل اللى فى العباسية عندهم ورشة السمكرة وسبتله المفتاح وخد العربية ودخلها الورشة وده كان الساعة اتناشر ونص تقريبا

فضلت قاعد فى الاستراحة حوالى ساعة ونص ولا حد سال فيا ومش عارف ابوص على العربية لانهم حطوا استيكر اسود على الازاز اللى بيطل على الورشة فى الاستراحة فروحت نزلت اتمشى لحد ما قربت على باب الورشة فقبلنى المهندس وقالى متقلقش اهى العربية مرفوعة وشغلين فيها فروحت رجعت على الاستراحة حوالى الساعة اتنين وربع كده

بعد حوالى من تلت ساعة او نص ساعة جه واحد ونده على اسمى وقولتله اامر قالى تيل الفرامل الامامى حيتغير قولتله يعنى بعد حوالى ساعتين اكتشفتوا ان التيل عايز يتغير فقلى حضرتك نغيروه ولا لا قولتله غير يا عم هى تتكلف كام قال مش اقل من مية وستين جنيه ان كان اكتر فقولت يعنى الفاتورة الاجمالية تعمل كام قلى الله اعلم انا معرفش

فقولت لنفسى باين عليهم لسة بدرى فروحت المعرض وهنا النقطة المهمة فى الزيارة دى دخلت المعرض لقتهم عرضين اربع عربيات f3 وعربية l3 الـ f3 تلاتة منهم مانيوال وواحدة اتوماتيك ولقتهم مقفولين كلهم ما عدا الـ l3 مفتوحة فدخلت قعدت فيها لقيتها مريحة قوى والتابلوة قمة فى الفخامة والكراسى جلد وفيه ايير باج ادام السواق وايير باج قدام اللى جنبه والتكييف تتش وفيها gps وسى دى وusb و aux والازاز كله باكهرباء وفيه ازرار تحكم فى الدريكسيون فى التكييف والكاسيت يعنى اجمالا جميلة بس مجربتش سواقيتها

نيجى بقى للنقطة المهمة اللى نكدت عليا فعلا المهم روحت لمندوب المعرض فسالته شوية اسئلة كده عن اسعار العربيات فقلى الـ l3 الاتوماتيك عاملة 109 الف والمانيوال عاملة 96الف وبالنسبة للـ f3 الاتوماتيك عاملة 95 الف والمانيوال عاملة 82 الف
آآآآآآآه خدوا بالكوا بقى فسالته عن الـ f0 الاتوماتيك جت مصر والا لسه فقالى لا احنا وقفنا استيرادها خالص المانيوال او الاتوماتيك قولتله يا نهار ابيض ليه يا عم قالى علشان هى غليت قوى لشدة الاقبال عليها فقولتله طب مهو ده الادعى انكو تجيبوها مش تبطلوا تستوردوها قلى لا حضرت فيه نقطة مهمة فى الموضوع مش بس الدولار غلى قوى وبقى قريب من التمانية جنيه ده كمان اليوان الصينى كمان غلى جدا فقولتله يعنى مفيش قطع غيار ليها بعد كده علشان انا عندى العربية دى وبعملها دلوقتى صيانة العشرين الف فقلى متقلقش احنا مش حنوقف استيراد قطع الغيار بتاعتها علشان عملائنا اللى اشتروها

خرجت من عنده وانا قلقان مع انه طمنى وقلى متقلقش فروحت طلعت تانى على الاستراحة وبعد حوالى نص ساعة زهقت فنزلت اشوف اخبار عربيتى ايه فقبلت الراجل اللى قاللى على تيل الفرامل وقولته ايه الاخبار فقلى خلصت وروح الخزينة ادفع

فروحت للخزنة وقولتله الفاتورة بتاعتى خلصت فقلى لسه ممكن المهندس لسه بيجهزها فخرجت اتمشى شوية اشوف العربية خرجت ولا لسه لقتها خرجت من الورشة رجعت للخزنة قلى وصلت واجماليها 620 جنيه دفعت زى الشاطر وخدت الفاتورة وروحت للورشة واديته تصريح الخروج وجربت الريموت ولقيت المساحة متغيرتش وركبت العربية لقتهم مشغلين التكييف بصيت على الفاتورة لقتهم كاتبين انهم غيروا زيت الموتور وفلتر الموتور وفلتر البنزين وفلتر التكييف وثلاث بوجيهات وتيل الفرامل

جربت العربية واتكلت على الله وكانت الساعة عدت اربعة بعد العصر

ارجو انكوا تكونوا استفدتوا من التقرير ده واى استفسار انا فى الخدمة

وشكرا ليكوا على حسن استماعكوا ومعلش طولت عليكوا

والسلام عليكم ورحمة الله وبركاته :b4_048:

المشاركة الأصلية كتبت بواسطة ابو ياسمين

اخى العزيز الأستاذ
Ahmed_Lada

اولا اقدم اعتذارى عن تأخرى فى الرد لأنى بسبب ظروف خاصة لم ادخل المنتدى منذ شهر تقريبا

وطبعا تقريرك اعجبنى لأسباب كثيرة وانا احرص على قرائة مشاركاتك القيمة فى المنتدى

اما عن ايقاف استيراد السيارة F0 فهذا يؤكد انه لا استمرار لسيارة صينية لا يتم تجميعها فى مصر

وهذا له اسبابه رغم ان المستورد افضل بمراحل كثيرة فى التشطيب والتقفيل !

ولك خالص تحياتى

ليست بى واى دى !!

الرابط

البنزين الصغيرة 800cc سيارات الركاب في الصين-سيارات جديدة-معرف المنتج:60244888785-arabic.alibaba.com