الموضوع: أسطورة الـ100 ألف كيلومتر... هل لها أصل؟؟؟

المشاركة الأصلية كتبت بواسطة sonaeg

موضوع ممتاز كالعادة جزاك الله خير..
بس افهم من كده ان مفيش تدرج حتي للزوجات اعلي في الزيوت التخليقية...؟

اذا كان الكتالوج مديني رينج في اللزوجات.
مثال:
اول ١٠٠ الف 5w-30
ثاني١٠٠ الف 5w-40
,ثالث ١٠٠ ألف 5w-50 او 10w-40

بفرض ان كلهم تخليقي وكلهم متاحين في الكتالوج وان ظروف القيادة متوسطة ومعتدلة.

شكرا جزيلا

أخي الحبيب...

الحالة اللي حضرتك ذكرتها موجودة كتير في الكتالوجات... بمعنى إن الكتالوج يكون مديلك أكثر من درجة لزوجة وكلهم ينفعوا يشتغلوا في الجو اللي العربية ماشية فيه...

في الحالة دي نختار اللزوجة ازاي؟؟؟

الموضوع راجع لحاجتين أساسيين:

1- الظروف اللي العربية متوقع إنها تشتغل فيها

بمعنى إن العربية لو بتشتغل تاكسي مثلا... فاستخدام لزوجة ثقيلة أكيد أفضل... لإن في العادة التاكسي موتوره شغال علطول ومش بيقف.. فعيوب الزيت الثقيل (اللي هي تأخير الوضول إلى أجزاء الموتور في بداية التشغيل) هتبقى شبه مالهاش وجود.. لإن الموتور فعليا ما وقفش أصلا.. أو على الأقل وقف مرة واحدة بس في اليوم.

على العكس من الكلام ده بالنسبة للعربيات الملاكي اللي استخدامها خفيف... فالزيوت الخفيفة مطلوبة لإن عدد مرات دورانها عالبارد (يعني كل الزيت راقد في الكارتير والكامات فوق مفيش عليها زيت) خلال اليوم الواحد أكيد أكتر..

أحيانا بتبقى العربية شغالة مشاوير خفيفة ولكن المشوار نفسه بتكون العربية فيه محملة أو بتطلع أماكن مرتفعة (زي المقطم مثلا)... في الحالة دي نحاول نجيب زيت تخليقي بلزوجة عالية شوية زي 5w-40 مثلا.

ما تنساش كمان إن جو مصر والشرق الأوسط ما فيهوش جو بارد زي أوروبا وكندا وروسيا... يعني أبرد درجة حرارة ممكن العربية تتعرضلها هي (صفر مئوية).. وده في عرف الزيوت ما هواش برد.. وما تنساش إن حتى الزيوت بلزوجة 20w-50 ممكن تشتغل كويس لحد درجة 15 تحت الصفر.

2- أولوياتك

وهنا فيه اختلافات كتير بين الناس...

فيه واحد عايز يشغل العربية بأقل تكاليف ممكنة... وفي الحالة دي الاختيار هيبقى للزيوت المعدنية غالبا.. خصوصا لو كان فيه بدائل رخيصة مغطية متطلبات الكتالوج (أغلب العربيات الاقتصادية - زي اللانوس مثلا - ما بتطلبش متطلبات عالية للزيوت).

وفيه واحد عايز يوفر بنزين فيروح للزيوت الخفيفة... وفيه واحد تاني مش فارق معاه البنزين بس عايز يحس بالأمان شوية فيروح لزيوت أثقل حبتين.

أما بالنسبة لزيادة اللزوجة مع كل 100 ألف مثلا... فالموضوع ما تقدرش تقول إنه مرتبط ارتباط مباشر مع المسافة اللي ماشياها العربية... لإن حالة الموتور بيحددها حاجات كتير غير مجرد المسافة اللي ماشياها العربية..



تخيل عربيتين...

واحدة ماشية طول النهار في الزحمة... والتانية ماشية كل مشاويرها سفر بسرعات معقولة...

اللي ماشية في الزحمة عداد الكيلومترات بتاعها قليل بس حالتها الميكانيكية عموما سيئة.. في حين اللي مشاويرها سفر ماشية كيلومترات كتير جدا .. بس حالتها الميكانيكية أحسن بكتير.

فالحقيقة إن الكيلومترات ما هياش مقياس رئيسي في تحديد حالة الموتور.. وإن كان ليها دخل بدون شك.




في رأيي اللي يخليك تستخدم لزوجة أعلى حاجة واحدة...

إن معدل نقص الزيت يكون عالي.


غير كده... اللزوجة الخفيفة "حسب الكتالوج" أكتر من كافية.


...

المشاركة الأصلية كتبت بواسطة sonaeg

أشكرك جزاك الله كل خير .. للعلم فقط معايا كورولا ٢٠١٢ بحط زيت بيزول 5w-30 ماشية دلوقتي ٢٠.٠٠٠ الف

الكتالوج عندي مش محدد مستويات جودة غير بس api sm او ilsag gf 5

وفعلا البيزول api sn و ilsag gf 5
مشاويري عالسريع غالبا وبيبقي معايا حمولة عالية لكن بسواقة معقولة مش بحرق كتير.

اللزوجات الموصي بيها ف الكتالوج
0w-20
5w-30
15w-40
20w-50

مش محدد 5w-40 لو استخدمتها بعد فترة فيها ضرر؟
جزاكم الله كل خير ودمت لنا فخرا

أولا.. لازم تتأكد إن اللزوجات المذكورة كلها تشتغل في الجو الحار فوق ٤٠ مئوية.. واللي مش مناسب للجو استبعده مباشرة.

وما دام الكتالوج ما جابش سيرة 5w-40 يبقى ما تفكرش تستخدمه.. وإذا نويت على لزوجة أعلى يبقى تختار من اللزوجة الموجودة في الكتالوج بس.. يعني 15w-40 أو 20w-50

الـ5w-30 أكتر من كافي "لموتور عربيتك".

المشاركة الأصلية كتبت بواسطة sonaeg

نسيت اقول لحضرتك ان البيزول 5w-30
كوده a1/b1 & a5/b5 & c2
الكتالوج عندي مش طالب كود معين(اللهم بس قال ممكن ilsag-gf5 وانا مش فاهم معني الاكواد دي واحترت اشتري انهي كود.

كل دول أكواد لجودة الزيت بس صادرة من أكتر من منظمة وبتستخدم في مناطق مختلفة من العالم..

كود الـapi صادر من معهد البترول الأمريكي.. وده أقدم تصنيف..وبيستخدم في أمريكا وآسيا والشرق الأوسط
كود الـilsac صادر من لجنة اعتماد مواصفات الزيوت العالمية... ودي هتلاقيها دلوقتي في كل السيارات اليابانية والإمريكية والكورية.
كود الـacea صادر من اتحاد مصنعي السيارات الأوروبية.. وده هتلاقيه مطلوب في كل السيارات الأوروبية وأي ماركة تانية بتتباع في أوروبا.


باختصار.. ما تشغلش بالك بالفروق.. اهم حاجة تلاقي الكود المطلوب في الكتالوج مكتوب على علبة الزيت.. سواء لوحده أو معاه أكواد تانية..

ما لقيتوش.. ما تشتريش الزيت.. حتى لو عليه كل الأكواد التانية.


...

أولاً صباح النعناع يا م.أحمد
سؤالى لحضرتك ... هل فى مشاكل من تغير الزيت من معدنى لنصف تخليقى بانواعه ثم الرجوع لمعدنى عالى المواصفات مرة اخرى
أى التجربة والتغيير المستمر لانواع متعددة من الزيوت المناسبة