صوت الموتور عالي في النيو لوجان

**renautlogan** · 06-10-2015 01:47 AM

ياجماعة انا لسة مستلم رينو لوجان 2016 عملت بيها 400 كيلو لحد الان

امباراح اول مرة امشي بيها علي طريق سريع كنت رايح 6 اكتوبر

وانا علي المحور كنت مشغل التكييف علي واحد بس الموتور كان صوته عالي

وسحب العربية ضعيف مع انها 110 حصان حتي لما قفلت التكييف برضه صوت الموتور عالي

والسحب ضعيف هل ده طبيعي وكل ده هيروح بعد صيانة الالف ولا ايه

وعادي لما اشغل التكييف ارجو الافادة وشكرا

**renautlogan** · 06-10-2015 07:24 PM

ياجماعة هو ليه الرد لازم يجي بعد اسبوع ده حتي النهاردة 6 اكتوبر واجازة يعني
ارجو الرد سريعا

**Ahmed_Anwar** · 06-10-2015 10:19 PM

صوت الموتور عالي ده حقيقي ربما يقل بعد صيانة الألف
السحب مش ضعيف لكن الأوتماتيك بيكون سحبه مش بإندفاع واستجابة المانيول أنا عندي نفس عربيتك والسحب معقول عامل 470 كيلو حتى الآن

**nagy wassef** · 07-10-2015 07:32 PM

صوت الموتور فيه نحرة كدة

سمعتها في كل السانديرو و اللوجان الجداد

**sharawy77** · 11-10-2015 02:27 PM

العربيه عامله معايا حوالي 3500 كيلو لحد دلوقت..صوتها هيهدي بعدين بس مش قوي..وسحب اللأوتو عامة أضعف من المانيول..وأطن موضوع الكيك داون ده مش موجود في الأوربي..أو علي الأقل مش قوي زي الياباني

**tameem2010** · 11-10-2015 04:23 PM

اللوجان صوتها عالي
ده طبيعي بتاعها
هتهدى قليلا بعد الصيانه الاولى بس مش قوي
ده طبيعي
وبرده موضوع انها تقيله عادي لانها اوتوماتيك
الاوتوماتيك لو مفيهوش قيادة رياضيه بيكون تقيل

**tamora2002** · 19-10-2015 02:34 PM

اظن ولله اعلم انها بتعتمد على نوع الزيت الى بتلين بيه

لانى على ما افتكر ان التوكيل بيحط زيت معدنى الى هو 5000 فى البدايه ودة مينفعش معاك عشان العربيه جديدة

واكيد المكان الى انت شاري منه مش هيستغلى فى الزيت ويجيب حاجه نضيفه .

فا جرب نوع زيت نضيف تلين بيه

**renautlogan** · 20-10-2015 03:31 PM

المشاركة الأصلية كتبت بواسطة tameem2010

اللوجان صوتها عالي
ده طبيعي بتاعها
هتهدى قليلا بعد الصيانه الاولى بس مش قوي
ده طبيعي
وبرده موضوع انها تقيله عادي لانها اوتوماتيك
الاوتوماتيك لو مفيهوش قيادة رياضيه بيكون تقيل

شكرا لردك انا امبارح روحت العبور برضه حاسس ان العربية تقيلة في المشي وسحبها مش عجبني مع ان
انا سوئت واحدة مانيوال كان سحبها حلو مع ان موتور المانيوال 90 حصان وانا موتوري 110 حصان
وممكن اعرف يعني ايه قيادة رياضية وهل تقل العربية في المشي ده طبيعي انا حاسس ان الهوة بيزق العربية ومش عايزها تمشي ومرة جبت بيها 130 ثابتها مكنش كويس لما عربية بتعدي مني بحس اني العربية بتحدف مني علي العموم انا رايع التوكيل كمان يومين اعمل صيانة الالف ياريت تقولي الملحوظات الي علي استفسراتي دي وتقولي لما اروح التوكيل اعمل معاهم ايه واركز علي ايه انا حجزت في فرع العبور والف شكر

**tameem2010** · 21-10-2015 04:22 PM

المشاركة الأصلية كتبت بواسطة renautlogan

شكرا لردك انا امبارح روحت العبور برضه حاسس ان العربية تقيلة في المشي وسحبها مش عجبني مع ان
انا سوئت واحدة مانيوال كان سحبها حلو مع ان موتور المانيوال 90 حصان وانا موتوري 110 حصان
وممكن اعرف يعني ايه قيادة رياضية وهل تقل العربية في المشي ده طبيعي انا حاسس ان الهوة بيزق العربية ومش عايزها تمشي ومرة جبت بيها 130 ثابتها مكنش كويس لما عربية بتعدي مني بحس اني العربية بتحدف مني علي العموم انا رايع التوكيل كمان يومين اعمل صيانة الالف ياريت تقولي الملحوظات الي علي استفسراتي دي وتقولي لما اروح التوكيل اعمل معاهم ايه واركز علي ايه انا حجزت في فرع العبور والف شكر

القيادة الرياضيه ده بيكون اوبشن في بعض التفيس الاوتوماتيك بيخلي الفتيس ينقل على عدد لفات موتور اكتر وبالتالي بيكون فيه قرص على الغيار وده بيدي تسارع افضل للسيارة بس بيعيبه استهلاك البنزين بيكون عالي
عموما ده مش متوفر في كل العربيات الاوتوماتيك ...بيكون في الفتيس غيار اسمه (s) غير (d)

بخصوص ثباتها انا معرفش الصراحة مدى ثباتها اد ايه بس هو ارتفاعها عن الارض عالى شوية فقد تكون فيها غربله خفيفه بعد 140 ... الله اعلم ده توقع مش اكتر

في التوكيل هتقول لهم كل ملاحظاتك ديه وممكن يظبطوا السوفت وير بتاع الفتيس قد يكون ده السبب
هما ادرى بس قول ملاحظاتك وعموما رينو عموما كشركة من الشركات المحترمة ومن اقل التوكيلات في المشاكل

بس متهيا لى ان صيانه الالف كيلو ديه مجرد تشيك بس مبيعملوش حاجة فيها خالص
عموما قول لهم اي ملاحظة عندك مهما ان كانت صغيرة