الموضوع: ما هي خطوات تفادي شراء دبانة e36 نصين ؟

الموضوع ان شاء الله سهل و خطواته مش صعبه المهم تمشي عليهم بالترتيب .

اولاً
لو انت في مرحله انك رحت لصاحب العربيه او شفت اعلان عربيته و عجبتك هتاخد رقم الشاسيه بتاع العربيه لو انت قدام العربيه افتح الكابوت هتلاقيه في البلاستيك اللي تحت المساحات -ناحيه اللي راكب جمب السواق- زي ما باين في الصوره كده

[img2]http://i.imgur.com/zBLmje8.jpg[/img2]


بعد كده هتدخل علي اي Bmw vin decoder -سيرش علي google و هتلاقي كتير- انا عموما برشحلك

BMW Model Archive � October 2015 � bmwarchive.org

هتدخل علي الموقع و تدخل ال vin code بتاع العربيه اللي هو اخر 7 (حروف / ارقام) من رقم الشاسيه بتاع العربيه يعني علي مثلا vin code العربيه اللي في الصوره اللي فاتت المفروض يبقي ex93493 ، بعد كده هيظهرلك كل بيانات العربيه بتاعت المصنع يعني موتور ايه كام باب موديل كام و كل الاوبشنز اللي كانت نازله فيها و لونها ... الخ ، هتقارن الكلام ده بالعربيه علشان تتأكد ان كانت هي ولا لأ

ثانياً
مرحله السمكري و الكشف الفعلي علي العربيه علشان تتأكد من اساسيات العربيه الشاسيه تمام و لا مخبوط راشه دواخل ولا لأ و برضه بيشوف لو في لحامات لو لا قدر الله كانت سليمه بس عملت حادثه مثلا و اتلحم لها نص او اي جزء و حاله العربيه بوجه عام بقي موتور عفشه ... الخ

اخيراً
مرحله المرور دي بقي لما تتأكد ان الحمد لله كل اللي فات ده تمام و العربيه خلاص كويسه و انت عايز تخلص فيها تطلع علي وحده مرور العربيه و تحاول تشوف ملف العربيه و تعرف البيانات المكتوبه جوه تمام ولا لأ يعني الماركه و الموديل و عدد الابواب ... الخ لو مطابقه يبقي الف مبروك العربيه


عموما موضوع الانصاص ده مش منتشر في السيدان قوي و لو حصل في سيدان 90 % كان علشان حادثه لا قدر الله انما الخوف الاكبر بيبقي في الكوبيه و الكابورليه و خصوصا الكابورليه ، عموما مش هيفرق معاك الكلام ده امشي علي نفس الخطوات في اي عربيه ايا كانت سيدان كوبيه كومباكت ... الخ و ان شاء الله خير و مبروك مقدما :)