الموضوع: للى عاوز يشترى مستعمل ادخل اقرا الموضوع ده

السلام عليكم
لما حبيت اشترى عربية كنت فى حيرة شديدة لانك لما تشترى بتسال الف واحد وتاخد راى الناس ولا شك ان المنتدى هنا افدنى ايضا
المهم كان فى دماغى هذه السيارات
لادا 2017 زيرو- سوزوكى التو زيرو - دوجان - شاهين - هيونداى اكسل - هييونداى اكسنت - كيا برايد - سوزوكى سويفت - سوزوكى بالينو - سيات ابيزا 94 - اوبل كورسا هاتشباك- دايو لانوس - فورد اكسكورت - فيات سيينا
والان نبدء مع الاسعار
لادا 2017 زيرو كانت عاملة 45 الف بس زادت واصبحت الان 48 الف
سوزوكى التو جديد بدون كماليات 42.500
بالنسبة للمستعمل
دوجان من 33 حتى 40 الف حسب الحالة والموديل
شاهين من 30 الف حتى 45 الف من موديل 96 حتى 2003 بدون كماليات حسب الحالة والموديل
هيونداى اكسل من 34000 حتى 04000 الف حسب الحالة والموديل
هيونداى اكسنت من000 38 وحتى 45 حسب الحالة والموديل
كيا برايد سيدان من000 34 الف وحتى 38000 حسب الحالة والموديل
سوذوكى سويفت من 28000 وحتى 34000 حسب الحالة والموديل
سوزوكى بالينو من 40000 وحتى 45000 حسب الحالة والموديل
سيات ابيزا 34000 وحتى 38000حسب الحالة والموديل
اوبل كورسا هاتشباك من 38000وحتى 41000
دايو لانوس من 39000 وحتى 45000 حتى موديل 2002 طبقا للحالة والموديل
فورد اكسكورت من 40000-45000 حسب الحالة والموديل
فيات سيينا من 40000 حتى 45000 حسب الحالة والموديل حتى 2003
يعنى هذه الاسعار تقريبا منذ شهر او شهر ونصف
وبدات اسال عن السيارات وما المناسب لى وخدمة ما بعد الشراء يعنى قطع الغيار من بيفهم فى العربيية المتانة علو العربية لانى اذهب مناطق شوارعها عبارة عن مطبات وحفر
وكانت النتيجة هى الاتى
لادا 2107 زيرو عربية روسى ناشفة وتتحمل لكنها متعبة فى القيادة وتحتاج الى تعديل فى الريادتير والمقصات وبيض العجل لانها بدون تعديل ممكن تعمل بها حوادث فله وبتسخن جدا
فانا قلت يعنى انا اجيب عربية زيرو علشان اعمل فيها تعديل؟ يعنى اول ماجبها جديدة تبقى مستعملة ؟ فقلت بلاها الادا
قالولى طيب العربية السوزكى التو جديدة ويابانى ولو فاتك اليابانى مش هيرجع تانى
لكن وجدت العربية صراحة لن تتحملنى باى شكل من الاشكال لا حجمها ولا ماتورها ولا فيها كماليات لانها كانت 42.500 وكان اللى فيها كماليات تعدى 48.500 فقلت بلاها سوسو
ودى كانت نهاية فكرة الجديد معايا وقلت ادخل على المستعمل
قلت اعيش بقى واشوف نفسى واجيب عربية شكلها حلو
فقلت اجيب هيونداى اكسنت لكن البعض قالى بلاش لانها خفيفة جدا على الطريق وصاجها ضعيف جدا
قلت اجيب هيونداى اكسل قالولى عربية حلوة وخفيفة وشكلها حلو وقطع غيارها متوفرة لكن لا تتحمل انك تضع فيها باستمرار اوزان
قلت اجيب عربية كيا برايد سيدان قالولى عربية سيئة جدا فى قطع غيرها وعربية مش بتاعة شغل
قلت اجيب عربية سوزوكى سويفت اللى هى كان اخرها تقريبا موديل 94 او 96 قالولى اوعى دى عربيات نصفها اتكهن واللى عنده العربية دى بتعمل مشكلة مع السرعات العالية وفتيسها لو باظ بيجيى بـ6000 الالاف جنيه فقلت بلاها سوسو
قلت اجيب عربية سوزوكى بالينو قالولى عربية حلوة جدا ويابانى وفيها كماليات وملهاش حل بس حاجاتها غالية فقلت بالاها سوسو
قلت اجيب سيات او اوبل قالولى ابعد عن الالمانى وغنى له لان قطع غيار الالمانى نار يا حبيبى يا نار
قلت اجيب دايو لانوس لكن قالولى العربية الكويسة هتعمل فوق 45 الف جنيه ولو جبت حاجة بـ45 الف هتصرف عليها خمسة كمان علشان تبقى كويسة فمكنش معى يكمل بالاضافة الا ان البعض قالى مش هتعرف تشيل فيها حاجات جامدة باستمرار لانها واطية وانا عايش فى شغلى مع المطبات وسمعنى سلام مصرياتنا وطنيتنا حماها الله
قلت اجيب فورد اكسكورت قالولى اوعى قطع غيار غالية ومش موجودة
قلت اجيب فيات سيينا قالولى بتسخن جدا فى السلانسية وعربية مش بياعة
قلت اجيب الشاهين او دوجان
وكان فيه امامى شاهين لغاية 2003و2005 عاملين حتى 45000 بدون كماليات لكن اللى شفتهم حقيقة كانوا متهانين
والعربيات اللى كانت ماسكة نفسها صاحبها كان معدى 50000
المهم وجدت عربية دوجان مع انها موديل 1996 لكن جبتها 42500 لانها كانت مرفوعة فترة وفابريقة جوة وبره وماتورها 80 فى المائة وفيها كل الكماليات وتقفيل تركى وماتورها ماتور تمبرا المهم وجدت ان دى افضل حاجة موجودة ممكن اجيبها وتكون مناسبة لى
قطع غيار رخيصة متوفرة كل الميكانيكية بتفهم فيها وقطع الغيار هتتوفر لمدة طويلة لانها لسه بتتصنع وعالية عن الارض وتناسب شوراع المحروسة
فتوكلت على الله وجبتها
قد تكون ليست الافضل بين السيارت التى ذكرتها ولكن لفترة بحث دامت اربع شهور سالت فيها سواقين تاكسى وميكانيكية واصحاب سيارات ومتابعة المنتديات وسوق المستعمل فى الوسيط وفى سوق العاشر وجدت ان هذه السيارة قد تكون مناسبة