السلام عليكم و رحمة الله وبركاته
أولا أحب اشكر القائمين ع المنتدي العظيم ده و أشكر كل واحد بيشارك فيه بجدية لمنفعة الناس و مساعدتهم بدون أي مصلحة شخصية كتير استفدت من المنتدي الجميل ده من غير ما أشارك لأن دايما كنت بلاقي الإجابة فيه من غير ما أطرح السؤال ماشاء الله المنتدي ملئ بالإعضاء أصحاب الخبرة و الأن عندي مشكلة محتاج المشورة فيها وبسرعة بقدر الإمكان و المشكلة هي
عربيتي حبيبتي جابت موتور وانا بإذن الله قررت اغير الموتور و اريح دماغي بدل ما كل ميكانيكي يقولي رأي او تقعد تفتح معايا و في الأخر يبقي اسمها عمرة بردو و يا عالم هاتكون كويسة ولا لأ
التردد الي انا فيه بخصوص ان العربية اصلا موتورها كربراتير و انا ادامي موتور من نفس الماركة وأحدث عشر سنين بحالهم بس هو إنجكشن و بصراحة انا نفسي اعدل للإنجكشن و كمان عشان احدث . كده كده هادفع فلوس فأيه هو رأي حضرتكم بخصوص الامور المهمة والواجب تعديلها عشان اركب الموتور الانجكشن الميكانيكيى بتاعي وانا بثق في كلامه قالي انا بالنسبة ليا معنديش مشكلة سواء كان كربراتير او انجكشن هاركبهولك بس شوف الكهربائي الي هايشغلهولك و يعدلك ومع العلم بردو الموتور ده بإذن الله بأدوات التغذية و احتمال اخد الفتيس هو كمان عربيتي اوتوماتيك
فالتساؤل هو :
1ـ التعديل ممكن ولا لأ مع العلم هو نفس الماركة ونفس القواعد .
2 ـ ايه الحاجات الي اخلي بالي منها وانا بجيب الموتور الجديد او بعاينه .
3 ـ ايه التعديلات المهمة الي لازم اعملها فيه ناس بتقولي تغير التانك و ناس بتقولي لا هاتغير دفيرة العربية وناس تقولي الموتور بيجي بدفيرته والكنترول بتاعه و الكمبيوتر لكن هاتعدل كهرباء التابلوه .
4 ـ وايه الحاجات الي المفروض تبقي من ضمن أدوات التغذية الي البائع قالي هاتاخده بأدوات التغذية .
5 ـ الأفضل أخده بالفتيس علي بعضه ولأ لأ الفتيس بتاعي كويس بس انا شايف ان مش كل شوية الواحد بيفك ويعمل قصة كبيرة ذي ديه و ثانيا الميكانيكي قالي الفتيس بتاعي معقول لكن بدأ يبقي فيه عضة وبيقولي لو تقدر تجيب الفتيس بالمرة يبقي أفضل .
واخيرا لو اي حد من الاعضاء الافاضل شاف نصيحة مهمة انا مش واخد بالي منها يقولها .
و اخيرا بشكركم من كل قلبي سواء جاوبتوني أو لأ انا كتير استفدت من حضراتكم
أخوكم
أحمد عبد الله الملاح
المحامي
بالإستئناف العالي و مجلس الدولة
01222866698