السلام عليكم ورحمة الله

ازيكم يا شباب

أولاً : الإستقبال : مهندس محمود وفيق

راجل محترم جدا ومهذب وفاهم .. لكن الحقيقة إن أنا اكتشفت إن الإستقبال اللى بره كلهم واجهة حلوة بتغطى على الفشل الزريع للى بيشتغلوا فى العربية .. وهتعرفوا ليه..
قعدنا مع بعض وقالى ان التغيير هيكون للآتى

1- للبوجيهات وكلمته فى حتة إن عايز بوجيه ngk زى ما هو مكتوب فى الكاتلوج .. قالى ده بيجى من المصنع بردوا قلت خلاص مش هجادل .. وتم تغيرها

2- الزيت واختارت 5/30 التخليقى الكامل واللى بحطه على طول وأكدت عليه إن كل مرة الزيت بيعدى علامة الماكس .. وبروح أشفط منه فى بنزينه .. والمهندس محمود كتب ده فى الورقة إن العميل يشتكى من كذا وكذا .. المهم هحكيلكم تفصيلة الموضوع ده لوحده ..

3- تغيير فلتر الزيت .. وتم تغييره طبعا.

4- واشتكيت من ان فرامل اليد محتاجه تتشد شوية .. ودى عملوها

5- اشتكيت من عدم ثبات الكرسى .. وقالى ده فى ورشة السمكرة .. وبالفعل روحت لكن قالى هتاخد العربية آخر اليوم !! أو تيجى فى وقت تانى .. قلتله آجى فى وقت تانى ( وقتى مهم جدا وعندى حاجات مهمه ومش مستحمل تأخير)


نيجى بقى بعد الإنتهاء من الصيانة بكشف على الزيت والعربية بردت .. لقيته معدى الماكس بنص سانتى أو أقرب إلى السانتى.

رجعت للمهندس محمود فمبصش فى العربية هو فقط جابلى واحد اللى هو المراجع النهائى قبل خروج العربية من الصيانة .. فبص وقالى بس دى مش هضر العربية فى حاجه .. قلتله الكاتلوج مكتوب فيه اقصى حاجه الماكس .. قالى اصل الكتلوجات بتبقى دقيقة شوية .. قلتله طب وليه منبقاش زى ما هو كاتب .. قالى دى مش زيادة !!

جه مهندس محمود سمع الكلام من الراجل ده قالى طالما هو قال انه مش زيادة يبقى مش زيادة لكن هنزل شوية من الزيت عشان انت مش مقتنع .. !! وجاب شاب صغير لابس لبس الصيانة وقاله دخل العربية ..

فخدها وخرجلى بواحد تانى من الصيانة راجل كبير وهو ده بقى المسئول عنهم جوه اللى بيشتغلوا بإيديهم.

ودار الحوار الفظيع الآتى .. طلع المقياس ومسحه قبل ما يبص .. وقالى لو الزيت عند العلامة دى (الماكس) يبقى مش زيادة قلتله جميل .. ولو هنا ( بعد الماكس بنص سم ) يبقى زيادة قلتله رائع .. دخل المقياس وخرجه طلع الزيت عند ( العلامة اللى بيقول عليها تبقى زيادة ).

قلته هاااااااا يبقى كده زيادة قالى بس مش هتضر .. دى 100 جرام بس قلتله لاء الجركن فاضل فيه أقل من نص كيلو والعربية بتاخد 3 كيلو و100 جرام بالفلتر يعنى كده في زيادة تصل ل نص كيلو .. قالى العربية بتاخد 3.5 لتر قلتله اللى صنع العربية بيقول 3.100 هتعرف اكتر منه قالى ( أه ) احنا بنعرف اكتر منه .. خلوا بالكم ده اللى بيشتغل بإيده جوااااااااه المركز .. عشان تعرفوا عربياتنا بيحصل فيها ايه.

قلتله شكرا انا ماشى ( لأن مينفعش اتناقش معاه ) مشيت بالعربية وانا ساكن فى زايد وببص على الجركن اللى باقى فيه زيت وافااااجأ أن الزيت 5/40 مش 5/30 اللى انا طاااااااااااالبه ..
رجت والدنيا مشعلله معايا دخلت على المهندس محمود قلتله انا صبرت على الأولى لكن كده اتقوا الله فيا .. قالى هات الجركن .. ورجعلى قالى هنزل الزيت ده وهنحط زيت تانى .. ووراهولى من ورا الإزاز .. وااتأكده انه نزله وادانى باقى العبوة .. وكشفت على الزيت لقيته ازيد من المقياس بملى ونص .. قلت مش مشكلة مش هتفرق .. !

خلوووووووووا بالكم انا براجع وراهم لكن كتير منكم مبيراجعش .. وصحيح كانوا عاملين خصم عشان الموسم .. ودفعت 700 ج بس .. وكمان اعتذروا انهم مش هيغسلوا العربية عشان بيوضبوا مكان الغسيل ..

وانا والله يا جماعة مظلمتوهومش فى حاااجه وقلت اللى ليهم واللى عليهم وكفاية ان انا مزعقتش ادام الناس وهما لموا المواضيع وجت الأمور على قد كده.