الموضوع: عشاق و ملاك البيتلز بالمنتدى

السلام عليكم و رحمة الله و بركاته

زى ماقولتلكم قبل كدا إن عربيتى مكانش فيها كاسيت و ماكنش فيها غير الراديو الأصلى بتاع العربية فقط و سماعات شكلها حلو بس مجهولة الهوية مش عارف نوعها لغاية دلوقتى و دى صورتها تقريباً


و لفيت شوية على الكاسيت CD بس لقيت الأسعار غالية و كنت لسه مدبوح فى ثمن العربية و كنت ناوى أركب CDRom فى العربية بس ناس كتير قالولى بيقطع و مشاكله كتير لغاية لما لقيت واحد بيركب عدد صوت قريب من البيت عندى و نصحنى أجيب MP3 أو MP4 حسب رغبتى بس المهم يكون شحن مش بطاريات و كمان أجيب أوكلايزر كويس و هو هايعملى التوصيلة و بكدا أوفر شوية .
و فعلاً نزلت لفيت على MP4 و لقيت واحد شحن و 2 جيجا ( صينى طبعاً ) و كان بعد الفصال بـ 145 جنية بيشغل mp3 و كليبات و بيسجل و فيه أوكلايزر و مخرجين أوديو و ألعاب و نوته بتاعة تليفون و معاه الشاحن و وصلة USB بتاعة الكمبيوتر و سماعتين هيد فون و كان من العتبة و دى صورته

كمان جبت أوكلايزر صينى نوعه جينسن Jensen3030 شكله عاجبنى و كان بـ 85 جنية بعد الفصال طبعاً !!! و دى صورة تشبهله لأنى مش لاقيله صورة


و جبت وصله أوديو بـ 2 جنية ( شوفتو التوفير ) و دى صورة تشبهلها

و رحت لبتاع الكاسيت و ركبهم و كمان وصلى الراديو على الأوكلايزر بالمره و خد 25 جنية و الحمد لله الصوت ممتاز بس أوقات بحس بزنه و متهيألى فيه سماعة بايظة و بفكر أجيب سماعتين كويسين بس مش غاليين أوى و مش عارف أجيب إيه ؟؟؟؟؟؟؟؟؟؟؟؟؟؟؟؟؟؟؟؟؟؟؟

و بعد كام يوم نزلت التوفيقية و اشتريت كوريك تمساحة 2 طن ( مش عارف ليه سموه تمساحة مع إنو صينى غلبان !!!! ) و كان بعد الفصال 90 جنية و دى صورته


و فى رمضان اللى فات رحت ركبت إنزار وولف بالريموت مفتاح ( ضمان خمس سنوات ) و كان بـ 180 جنية و دى صورته

و كمان ركبت سنتر تايوانى بـ 80 جنية و دى صورته


و دفعت مصنعية للتركيب و ظبط الكوالين والبابين عشان السنتر و كله مصنعيته 50 جنية و الحمد لله

عاوز رأيكو فى السوند سيستيم بتاعى و لو فى أى إقتراحات
و إن شاء الله قريباً هاتكلم على بعض التعديلات الأخرى اللى عملتها فى عربيتى ( البطة المستريحة )

شكراً

السلام عليكم
أخى tashash

معلش أن ليا إستفسار



هو انت راشش الجنوط ولا أنا بيتهيألى
و لو انت راششها عملتها إزاى أو فين و بكام

و شكراً

بالنسبه للموتور كان 1200 سىسى وبصراحه كان ممتاز والعربيه كانت بتجيب معايا 120 ك سرعه
على الدائرى لان شغلى بعد كار فور بشويه وكنت بستعمل بنزين 80 كان شغال زى الفل وسحبه ممتاز بالنسبه للبيتلز اما عن الزيت انا كنت بغير زيت التعاون الاحمر فى الاول على 1000ك وبعد كده واحد قاللى على زيت بترومين وجربته ولقيته افضل واحسن وغير كمان ان الجركل 5ك يعنى يتغير على مرتين وكان سعره تقريبا 36 جنيه وعلى فكره ياجماعه البيتلز لازم تغيرلها الزيت 2ك ونص بس واى زياده عن كده الموتور بيجيب زيت من تحتوماتسمعش كلام اى حد يقولك غير كده حتى لو كان بتاع تغيير الزيت نفسه لان مش كل الناس تعرف المعلومه دى اما عن قطع الغيار انا كنت بشتريها استيراد من واحد مشهور فى الوكاله اسمه حسن الصيفى وده بتاع فولكس بس انا افتكر جبت منه قطمه جولف كامله لسه بحالتها بالدريكسيون ب280 جنيه عوامة البنزين ب100 جنيه عداد التابلوه ب100 جنيه 2 فى 1 سرعه وبنزين بالنسبه للصالون انا جددته بالكامل فرش جلد وتنجيد كامل وفرش ارضيه وسقف اتكلف 1200 جنيه عند واحد سروجى فى المعادى فى ايده كامل بس مش فاكر اسمه حاليا لكن انا عرفت ان احسن مكان للفولكس صيانه كامله وقطع غيار هو جسر السويس خلف الحديقه فى ناس كتير شكرتلى فى المكان ده لكن بصراحه انا ماتعاملتش معاهم واكيد هنلاقى اعضاء هنا اتعاملوا هناك ويفيدونا عن احسن ميكانيكى واحسن كهربائى واحسن سروجى وبتاع قطع غيار اه على فكره انا افتكرت انى اشتريت فانوسي خلفى جداد كاملين اللى هما مش بارزين وشكلهم ظريف جدا فى الفولكس
كانو ب70 جنيه الاثنين من عند محل اكسسوار فى شارع احمد ذكى المعادى وركبتهم ب25 جنيه عند الكهربائى وجبت كتاوت وفلاشر تركى الاثنين ب40 جنيه من نفس المحل وركبتهم ب20 جنيه وان شاء الله لو افتكرت حاجه تانى هبقى اقولكم عليها

المشاركة الأصلية كتبت بواسطة tashash

بص يا ابو حميد ... الجنوط ..انا نظفتها لما جيت غيرت الكاوتش ... و اللي حصل كالاتي :

جبت علبتين اسبراي فضي + سنفرة ناعمة

و اديتهم لبتاع الكاوتش ( بس عشان هو معرفة ) و اللي حصل اني قعد ينظف الجنوط بالسنفرة كويس اوي ... و بعدين رشها .... و كانت النتيجة زي ما انت شفتها

شكراً على سرعة الرد
و الله فكرة كويسة و رخيصة ممكن أعملها واهى نظافة
ربنا يباركلك فى عربيتك و يكفيك شرها

احمد حسن باشا :

اتفضل كتالوج عربيتك ... بس معلش هو مش فايل Pdf .. هو عبارة عن صور ..بس الدليل كااااامل

1972 Owner's Manual

__________________

يابو حميد عاجزين عن الشكر و الله
إنت أستاذ و مش عارف أقولك إيه على سرعة الرد و الصور الروعة دى
مش مهم PDF المهم المضمون
شكراً يا حبيبى و ربنا يقدرنى و أردلك جميلك

شكراً