بسم الله الرحمن الرحيم
كل عام وانتم بخير

الميكانيكية دوخوني خلاص ودي اخرة اللي يسيب نفسه ليهم
انا هستعرض اللي تم واللي وصلتله والحمد لله رب العالمين
غيرت بوجيهات تاني
وغيرت فلتر بنزين
و غيرت طلمبة بنزين
و فكيت البوابة وغسلتها وركبتها تاني
وفكيت الرشاشات ونظفتها تمام
تم اضافة منظف رشاشات مع البنزين ماركة abro امريكي
فكيت حساس الكرنك و نظفته
فكيت كمبيوتر العربية ونظفته ونظفت الوصلات كويس جدا بالاسبراي AKAI
كان عندي تسريب زيت من حساس الكامة و انتهي خلاص وكله تمام
تم تربيط عفشة العربية
تم عمل ترصيص لفردتين امامي


وعلي فكرة انا بشيل فيشة الاربع موبينات الخاصة بالبوجيهات كل علي حدا و بشيل فيشة كل رشاش بيبرجل العربية و ده دليل علي انهم شغالين و مش فاصلين بس مش عارف اداءهم كويس ولا مش كويس


الحال دلوقتي بعد كل المصاريف و الشغل ده
الرعشة موجودة
ويوجد تقطيع وتنتيش
عداد ال RPM في السلانسيه وبعد ما تسخن العربية بيكون مش ثابت بس طالع من 580 الي 680 ويقترب من متوسط 650 باختباره لوقت طويل مع العلم ان المعدلات دي بالكمبيوتر وصحيحة مش تقريبية

ال RPM بيخرف دلوقتي وبيعلق فوق بمعني اني بلاقي صوت العربية علي اوي فبمورها بسرعة بلاقي العداد علي 3.5 او 4 ومش زاضي ينزل بقوم مبطل خالص العربية وبدور تاني او بمعني اصح برميلها تقوم دايرة تاني علي رقم اقل شوية وبعد كده تبدا تقل وبفتح علي البوابة واغسلها غسلة سريعة في نص المشوار بمزيل الصدأ WD-40 ومفيش نتيجة
فكيت البوجيهات بعد 1000 كيلو او اقل قليلا لقيتها محترقة من عند السيراميك عند الشرارة و يوجد لمعة زيت اسود علي القلاووظ
اظن ان لمعة الزيت علي القلاووظ ده سببه مطلوب تغيير جوان وش التكيهات و جوان البوجيهات وده مش مهم دلوقتي
لكن الحرق اللي عند مكان عمل الشرارة ده اظن وياريت تفيدوني سببه من تعليق البوابة وبالتالي تعليق عداد ال RPM وبالتالي دخول كميات هواء اكبر

اظن ان اللي فاضلي تغيير رشاشات او تغيير بوابة
افيدوني افادكم الله انا زهقت

واسف للاطالة