الموضوع: ما هو موديل اللانسر الاكثر ثباتا؟؟؟؟؟

المشاركة الأصلية كتبت بواسطة mohamedway

مجربتش الشارك ولكن معايا بومه 1600 2006 و خالى معاه كرستاله 99 و بالتجربه أقدر أقول ان البومه ال1600 أثبت حاجه لو خرجنا الشارك بره المقارنه والكريستاله أكثر رشاقه فى الاستجابه للمناورات والغرز ولكن ساعه الجد بتكتشف ان البومه فعلا أثبت و المكواه ماعرفش هى أفضل من الكريستاله ولا لأ و لكنها أقل من البومه ال1600 و ممكن تتساوى مع البومه ال1300

ملحوظه هامه:(البومه ال1600 من أول موديلات 2006أثبت من ال1300 لأن ال1600 جنوطها 15 بوصه و أعرض و ال1300 14 بوصه و أرفع و ال1600 فيها عمود اتزان خلفى غير موجود فى ال1300 و ال1600 عفشتها رياضيه و أنشف من ال1300 )

وأكيد عيون صفيه أقلهم ثبات لأنها ملحقتش عفشه المتسوبيشى الشهيره فى التعليق المستقل متعدد الوصلات للعجل الخلفى و عفشتها الخلفيه عباره عن أكس ماسك العجلتين ببعض وخلاص شبه العربيات الجر الخلفى اللى فيها الأكس و الكورونه حته واحده بس طبعا مفيش كورونه لأنها جر أمامى.

أحييك علي هذا التقييم...و كان فاضل تجرب الشارك و تعرف اكثر ايهم اثبت...بصراحة انا برفعلك القبعة

المشاركة الأصلية كتبت بواسطة amro0000

الكرستاله في ثباتها علي الارض ممكن اقوي من البومة بس غير كدة كله في صالح البومة ومعلش انتة قصدك اثبت يعني الكرستاله احسن من البومة ولا رأيك الثبات في تقل العربية اثناء مشيها ياريت بس توضح النقطة دي وشكرا

اثبت اللى انا اقصدها راسية كدا على الارض اكتر من البومة بس خد بالك انا كنت بعت الكريستالة وركبت اوكتافيا سنة وبعدين بعتها واشتريت البومة زيرو فيمكن حاسس بثبات الاوكتافيا اللى هو اكتر طبعا
بس البومة ما شاء الله عليها جرى وشد واعتمادية هايلة وعلى فكرة امتعتنى اكتر من الاوكتافيا
حاجة واحدة بس لو رجع بيا الزمن كنت جيبتها 1600 اوتو علشان كان نفسى اركب اوتو بس فى 1300 كنت سامع انه ضعيف قوى فمحبتش اجيبة والفلوس كانت يادوب وكانت مقصرة على الاخر