استهلاك البنزين افهم عربيتك

**eng. wesam** · 22-07-2016 08:15 PM

هحاول بامر الله اسهل الموضوع وهبسطه ومن غير ما استخدم اي عبارات تكون صعبه علي مستخدم السياره العادي ... موضوع استهلاك البنزين ده موضوع كبير جدا ومحير وشاغل ناس كتير لدرجه ان في ناس بتقارن عربياتها بعربيات من نفس الموديل وسنه الصنع لاء وكمان في ناس بتقارن عربياتها بموديلات تاني مع ثبات السعه اللتريه يعني يقولك انا بقارن عربيتي بعربيه برضه 1300 زيها .... خلاصه الموضوع ده وبعد دراسه وتجربه في حاجه اسمها كفاءه الموتور او كبس الموتور .. لو موتورك خفيف مش هياكل زيت وبس لاء كمان هياكل بنزين ببساطه المشوار اللي بتروحه ب 5 لتر بموتور كويس لو موتورك خفيف هتروحه ب 10 وممكن 15 كمان .... الريفرنس هنا حاجتين
اولا هتفك بوجيه السياره او شمعه الاحتراق منها هتعرف حاجات كتير المهم دلوقتي عشان مندخلش في تشعبات لو لقيت علي البوجيه كربون معناه كده ان كربوراتير مش مضبوط وكده معناه ان الخليط بتاعك مش مضبوط وبالتالي طبيعي تاكل بنزين

ثانيا
قيس كبس موتورك واعرف موتورك كفاءته اد ايه ماهو سيادتك متجبليش موتور 90% وبيعمل ف 200 كيلو متر مثلا 12 لتر ... وموتور من نفس النوع والسعه اللتريه وعلي نفس المسافه بيعمل 20 لتر وكفاءته 60% وتكون زعلان

ياحضرات اي معلومات او شرح او ارقام بخصوص كبس المواتير اسالؤني مثلا لحد موديلات 2010

علي فكره باقبل النقد عادي جدا ومبزعلش اي حد عايز ينقد او يضيف معنديش ادني مشاكل

**tasaka** · 22-07-2016 09:38 PM

استهلاك البنزين ده عوامله لا تعد و لا تحصى

انما شيئ عام بسيط يمكن اضافته .. هو نسبه الوزن للقوه لكل حصان

شكرا على الموضوع

**eng. wesam** · 22-07-2016 10:41 PM

عزيزي tasaka بعد ازنك وضحلي اكتر عن نسبه القوه لكل حصان ؟؟ ارحب بالتعديلات وفي النهايه كلنا بنستفاد

**م/أحمد عبد الفتاح** · 22-07-2016 11:15 PM

كمان وزن العربية عامل مهم هل بتمشى بالعربية محمل ناس وشنط ولا مشاويرك لوحدك بس - بالنسبة للعربيات السيدان العادية استهلاك البنزين بيزيد حوالى ٦,. لتر لكل ١٠٠ كم مسافة على كل ١٠٠ كجم وزن زيادة - ده بالاضافة للمشاكل الفنية التانية اللى زى مثلا حساس اكسجين مخرف او ميس فاير متقطع

**eng. wesam** · 23-07-2016 01:21 AM

مهندس احمد .... السيد tasaka الكلام اللي حضرتكم قولتوة علمي مليون % شكرا جدا للاضافه المتميزه فعلا نسيت وزن العربيه ان كانت فاضيه ولا فيها حمل وطريقه القياده نفسها هل هي عاديه او رياضيه اضافات ممتازه واحلي مافيها انها علميه وبعيده تماما عن عاده المصريين طبعا مش الكل ... عاده الفتي .. اخيرا اضافات متميزه جدا جدا شكرا

**م أحمد** · 24-07-2016 09:28 AM

المشاركة الأصلية كتبت بواسطة eng. Wesam

. لو موتورك خفيف مش هياكل زيت وبس لاء كمان هياكل بنزين ببساطه المشوار اللي بتروحه ب 5 لتر بموتور كويس لو موتورك خفيف هتروحه ب 10 وممكن 15 كمان

مش شرط الموتور الخفيف ياكل بنزين ...يعنى على سبيل المثال لو موتور فيه عيب فى بستم واحد بس فى الشنبر بتاعه و بقية البساتم و شنابرها مضبوطة هتلاقى شغل المحرك دا كويس جدا و مش بيهدر بنزين باستثناء ان الزيت هيتغير بسرعة
و حتى المواتير المفوتة جامد نسبة هدر البزين فيها ما بتوصلش للضعف كمثال بكلمك عن عربية بولونيز كانت مع خالى رحمه الله بتمشى من غير مية و لا زيت :) من شدة اهلاك الموتور بس نسبة الزيادة فى الاستهلاك مش بتزيد عن 30 % فى حالات التفويت الخطيرة

اللى يهدر البنزين حاجتين على الترتيب :
1- بييضخ بكمية كبيرة......كاربيراتير فى العربية الكاربراتير او حساس الاوكسجين فى العربيات الانجكشن

2- عدم اكتمال الحريق فتضطر تضغط بنزين زيادة علشان تاخد نفس الاداء - يعنى سبب غير مباشر - و دى دوائر الكهرباء مسئولة عنها

و فى حاجات تانية ثانوية زى انسداد العادم او الكاوتش ...إلخ

**salam100100** · 24-07-2016 09:48 AM

انا معايا ماروتى 1998
وعندى الجهاز اللى بيقيس طغط (كبس) المحرك
كنت محتاج اعرف الكبس المفروض يكون كام (PSI or BAR ) عشان اعرف حاله المحرك دلوقتى اد ايه؟

شكرا ليك وشكرا للموضوع

**borio1704** · 24-07-2016 01:52 PM

المشاركة الأصلية كتبت بواسطة eng. wesam

هحاول بامر الله اسهل الموضوع وهبسطه ومن غير ما استخدم اي عبارات تكون صعبه علي مستخدم السياره العادي ... موضوع استهلاك البنزين ده موضوع كبير جدا ومحير وشاغل ناس كتير لدرجه ان في ناس بتقارن عربياتها بعربيات من نفس الموديل وسنه الصنع لاء وكمان في ناس بتقارن عربياتها بموديلات تاني مع ثبات السعه اللتريه يعني يقولك انا بقارن عربيتي بعربيه برضه 1300 زيها .... خلاصه الموضوع ده وبعد دراسه وتجربه في حاجه اسمها كفاءه الموتور او كبس الموتور .. لو موتورك خفيف مش هياكل زيت وبس لاء كمان هياكل بنزين ببساطه المشوار اللي بتروحه ب 5 لتر بموتور كويس لو موتورك خفيف هتروحه ب 10 وممكن 15 كمان .... الريفرنس هنا حاجتين
اولا هتفك بوجيه السياره او شمعه الاحتراق منها هتعرف حاجات كتير المهم دلوقتي عشان مندخلش في تشعبات لو لقيت علي البوجيه كربون معناه كده ان كربوراتير مش مضبوط وكده معناه ان الخليط بتاعك مش مضبوط وبالتالي طبيعي تاكل بنزين

ثانيا
قيس كبس موتورك واعرف موتورك كفاءته اد ايه ماهو سيادتك متجبليش موتور 90% وبيعمل ف 200 كيلو متر مثلا 12 لتر ... وموتور من نفس النوع والسعه اللتريه وعلي نفس المسافه بيعمل 20 لتر وكفاءته 60% وتكون زعلان

ياحضرات اي معلومات او شرح او ارقام بخصوص كبس المواتير اسالؤني مثلا لحد موديلات 2010

علي فكره باقبل النقد عادي جدا ومبزعلش اي حد عايز ينقد او يضيف معنديش ادني مشاكل

فعلا.. استهلاك البنزين شيء معقد جدا وأسبابه كتيرة جدا جدا..

بس المهم هنا لازم نحدد إحنا بنتكلم على إيه بالضبط...

هل بنتكلم على أسباب زيادة الاستهلاك عن الطبيعي بتاع العربية.. ولا بنتكلم على اختلاف استهلاك البنزين بين العربيات المختلفة؟؟؟؟

دي سكة.. ودي سكة تانية خالص.

لو بنتكلم على أسباب زيادة استهلاك البنزين في العربية... فأعتقد إن الموضوع ده فيه المفيد..

http://www.nilemotors.net/Nile/475925-a.html

ولو عند حضرتك أسباب تانية غير المذكورة فيه يا ريت تقولهالنا علشان نزود معلوماتنا..

أما بقى لو بنتكلم على أسباب اختلاف استهلاك البنزين بين العربيات.. فدي بقى ليها قعدة.

مستني رد حضرتك

...