الموضوع: معدل استهلاك البنزبن اثناء الوقوف و الموتور داير على السلانسيه

المشاركة الأصلية كتبت بواسطة م/أحمد عبد الفتاح

الحسبة دى نظرية جدا بالنسبة للعربيات السيدان بس هى قريبة شوية من الواقعى بالنسبة للنقل التقيل لان معظم منظمات وهيئات البيئة مهتمة جدا ومركزة مع النقل التقيل لذلك فى دول كتير دلوقتى ممنوع عربية نقل تمشى من غير الايقاف الاوتوماتيكى اللى بيخلى الموتور يبطل من نفسه لو الوقوف بتاع العربية عالسلانسية استمر فترة كبيرة وبتدور تانى بمجرد ماتشيل رجلك من على دواسة الفرامل وكمان لازم يكون فيها فيشة باور من خارج السيارة وتجهيزات علشان لما يركن علشان يريح من السواقة عدة ساعات يقدر يشغل التكييف او التدفئة او التهوية بدون مايشغل الموتور وكذا حاجه تانيين علشان يقلل من فترة تشغيل المواتير فى العربيات النقل - وفيه دلوقتى عربيات سيدان فيها الموضوع بتاع الايقاف الاوتوماتيكى للموتور لو العربية وقفت لفترة معينة متبرمجه على الكمبيوتر وبترجع تشتغل تانى لما تشيل رجلك من على الفرامل زى المرسيدس .

اول مره اسمع المعلومات دى بخصوص النقل الثقيل .. كلها اجراءات مفيده و عمليه

بالخبرة والتجربة لو عربية سيدان مثلا ١٥٠٠ سى سى وقفت على السلانسية حاتحرق مش اقل من ٢ لتر فى الساعة فى الصيف واثناء النهار وقوف وبتتدرج لغاية حوالى ٥ لتر فى الساعة كل مالسى سى زاد وحسب برضة تصميم الموتور والحاجات اللى شغاله فى العربية وبتتدخل فى الحسبة دى عدة عوامل منها :
- سخونة الموتور لان العربية واقفة ومش بتتحرك فمافيش استفادة من اندفاع الهواء الجوى للتبريد وبالتالى سخونة الموتور بتؤدى الى زيادة استهلاك البنزين .
- الحمل على الموتور هل مشغل التكييف مثلا مع العلم بان مروحة التبريد الكهربا بتاعة الموتور بتعتبر شغاله على طول ولو مروحة تبريد ميكانيكية شغاله بالكلاتش حاتفضل برضه شغالة على طول علشان الكلاتش مش حايفصل المروحة طول مالعربية واقفة .
- ارتفاع درجة حرارة الجو و نسبة الرطوبة فى الجو بتزود استهلاك البنزين
- كفاءة الموتور والبوجيهات لان البوجيهات بالذات من كتر الوقوف على السلانسية بتكربن وده بيقلل كفاءة الشرارة وبالتالى بيزود استهلاك البنزين

وبالنسبة للتليين بعد العمرات بيبقى الوضع مختلف لان الدنيا مش محكومة معاك فالموتور بيبقى بره العربية والتبريد عن طريق الاشعاع الحرارى بيبقى فى اعلى صوره فبالتالى كفاءة التبريد بتزيد - بس الكفاءة الحرارية بتقل - (فيه شعرة فاصلة بين الكفاءة الحرارية للموتور وبين كفاءة التبريد - الموتور لمايسخن بيبقى اداؤه احسن بس لحد معين من السخونة وبعد كده الدنيا بتبقى مش ظريفة :) )

فعلا ده اللى كنت عايز اعرفه ( الخبره العمليه ) .. كان من ضمن اللى تصفحته رقم 2 لتر فى الساعه ( بدلا من 0.75 لتر ) للموتور سعه 2000

باعتبار ان سعه ال 1500 لموتور انجكشن ؟؟ .. و بدون تشغيل التكييف

يعنى بكده تبقى سعه ال 2000 حتستهلك فى حدود 3 لتر فى الساعه او اكتر بدون تكييف ( لتصميمات قديمه لمواتير للانجكشن )

تحياتى و اعزازى و تقديرى

العربيه الوحيده المستهلكه للبنزين فى السلانسيه الجيب ويلز الامريكى القديم 6 سلندر 3500 cc سفاحة بنزين فى السلانسيه كنت ابص على الكربراتير اثناء الدواره غرفة البنزين شغاله نقط وره بعض بس العربيه دى وحش جبل مش جرى فى الطريق لا دى كانت تطلع جبل او تمشى فى رمله ولايمكن حاجه تعطلها وكلها حديد هيا الجيل الاول للرانجلر ؟عباره عن كتلة حديد متحركه وعربيه حاليا نادر جدا لما بشوف الرانجلر فى الشارع المصرى راحت فين اسطورة الجيب رانجلر؟

المشاركة الأصلية كتبت بواسطة م/أحمد عبد الفتاح

المستخدم للسيارة اهتاماماته اوسع من المصمم بتاع السيارة وافكاره اقوى واكثر عملية - صناعة السيارات كانت زمان بتهتم قوى بالمستخدم وافكاره واقتراحاته ودلوقتى نقلت اهتماماتها لمنظمات وهيئات مراقبة الامان والبيئة والحبشتكانات والموضوع قلب على سبوبة وابتزاز وبالتالى صناعة السيارات حاليا فى اسوأ فتراتها ولو اى حد تابع شوية الموضوع تاريخيا حيلاحظ ان عمرنا ماسمعنا عن التوكيل ولا رحنا التوكيل ولانعرف طريقه الا من فترة قريبة - الواحد الاول كان بيشترى العربية زيرو ويمشى بيها ٥ سنين مفسى دماغه !!!!! هل ده بيحصل دلوقتى ؟؟؟؟؟؟ لا مبيحصلش وده السبب الرئيسى فيه ان مصنعى السيارات مابقوش بيهتموا باراء والفيدباك والاقتراحات بتاعة المستخدمين واتجهوا للمنظمات اللى قلتلك عليها فى البداية - وعلشان تتأكد من كلامى بتاع السبوبة اقرا عن مشكلة تويوتا والمبالغ والتعويضات اللى كانت مطلوبة منها !!!!؟ حصل فيها ايه ؟؟؟؟؟ وهل دفعوا التعويضات ؟؟؟؟؟؟ محصلش حاجه والكل اتراضى وانبسط :)
لو عاوز حاجه احدث من سنة ونص اكتشفوا مشكلة فى الفولكسفاجن الديزل والمشكلة تمس ٦ مليون عربية ومكتشفوهمش الا لما العدد كبر يعنى كانوا فين وهما لسه مليون ولا نص مليون عربية ؟؟؟؟ واصبح المطلوب من التعويضات ٣٦ مليار يورو وشركة فولكسفاجن قالت انها اصولها لو اتباعت ماتعديش ال ١٦ او ١٧ مليار يورو !!!!! حصل ايه ؟؟؟؟؟؟ هل فولكسفاجن اتباعت مثلا علشان تسدد التعويضات ؟؟؟؟؟ هل وقفت ؟؟؟؟؟ ولا الهوا والكل اتراضى وانبسط :)
معلش هو كلام خارج عن موضوعك شوية بس فى نفس الاتجاه لان حضرتك مستخدم وعاوز اى وسيلة تقولك انت بتستهلك قد ايه وانت واقف !!!!! ودى فى حد ذاتها من الاسئلة الحلوة اللى المفروض تبقى مجال بحث المصنعين مش المستخدمين

تسلم ايدك ياباشمهندس احمد انتى حليت الموضوع اكتر واكتر كلنا بنتعلم والموضوع ده فكرته جديده وانا سعيد جدا ان المداخلات تزيد واهل العلم زى حضرتك تشارك لان ناس كتير بتابع الموضوع باهتمام داخل مصر وخارجها وارجومن كل الزملاء يدخله ويشاركه لو حتى بمعلومه صغيره ممكن تبقى شمعه تنور افكارنا ربنا يخليك لينا ياهندسه واحنا لازم نعرف كل الناس على حقيقة صناع السيارات فى العالم ؟والعلم ليس له سن او حدود ؟