مؤشر الحرارة بيعلى بطريقة غريبة

**م/محمد القاضى** · 13-09-2016 09:33 AM

السلام عليكم

عندى مشكلة مع مؤشر الحرارة فى عربيتى ألتو 2008 مشتريها مستعملة من شهر 3 اللى فات ، اللى بيحصل ان لو سايق على الغيار من ال3 و ال4 وال 5 مفيش مشكلة المؤشر عادى ، لكن لو على ال2 أو ال 1 أو وقفت فى مكان زحمه بيسخن أوى وبسرعة ، الكلام ده محصلش غير بعد ماالردياتير اتخرم انا وماشى على طريق السويس وغيرت جوان وش سلندر ، وغيرت الردياتير لأنى لقيته أتخرم لأنه كان قديم جدا ، ومن وقتها موضوع الحرارة ملاحظه وقالقنى جدا ، المروحة بتاعه التبريد كنت شاكك فيها انها مبتشتغلش فركبت مفتاح بلمبه عند الدركسيون اتابعها ولقيتها بتشتغل لما مؤشر الحرارة بيوصل للنص ، ياريت تساعدونى ضرورى عايز اعرف ايه سبب ارتفاع مؤشر الحرارة كده . شكرا للجميع وكل عام وانتم بخير .

**aymanshebl** · 13-09-2016 09:18 PM

اعمل تنظيف و غسيل لدورة التبريد كويس

**م/محمد القاضى** · 14-09-2016 09:37 AM

استأذن حضرتك تقولى أعملها ازاى وفين ، لأن اول مرة أمتلك عربية وخبرتى جديدة على مشاكل العربيات

**lidosasa** · 20-10-2016 04:32 PM

فيه ورش بتبقى متخصصة فى الريداتير بتكون احسن فى شغلها عن الميكانيكى
يسلك الريداتير وينضف دوة التبريد كويس ويتأكد إن ترموستات الحرارة سليم وشغال وإن غطاء الريداتير وغطاء القربة مظبوطين ويكبس دورة التبريد يشوفها سليمة ولا فيها تسريب وبعدين حط مياه من الحنفية عادية وجرب العربية يومين لقيتها أتظبت تعمل مشوار طويل شوية بالعربية وبعدين ترجعلك ينزل مياه الحنفية وتحط مياه موبيل زرقاء أو على الأقل مياه مقطرة عشان تضمن الحفاظ على كفاءة دورة التبريد وحماية أجزاء دورة التبريد فيما بعد . دا الشغل الأساسى مع دورة التبريد

**lidosasa** · 20-10-2016 04:35 PM

معلش أعذرنى بعد ما كتبت التعليق السابق راجعت كلام حضرتك وفهمت منه إن العربية سخنت منك قبل كده ومكنش فيها مياه بسبب خرم فى الريداتير فلما حصل الكلام ده حضرتك عملت ايه بالظبط ساعتها أول ما لقيت مؤشر الحرارة عالى .. يعنى ركنت وطفيت العربية وحطيت مياه ولا سبتها دايرة ورحت للميكانيكى ياريت تقولنا عملت ايه .