كنت عايز استفسر عن لزوجه الزيت احط 10w40 ولا 5w40
العربيه اسبرانزا 516 عامله 62الف كم ... كنت حاطت زيت كاسترول ماجنيتك 10w40
وعايز اغير ل امسويل فا اختار انهي لزوجه ؟؟؟
عرض للطباعة
كنت عايز استفسر عن لزوجه الزيت احط 10w40 ولا 5w40
العربيه اسبرانزا 516 عامله 62الف كم ... كنت حاطت زيت كاسترول ماجنيتك 10w40
وعايز اغير ل امسويل فا اختار انهي لزوجه ؟؟؟
انتظر رد المهندس بوريو لاختيار الزيت المناسب لك
الافضل انك توضح طريقه استخدامك ( القياده ) .. و الاستعمالات .. و السعر اللى انت حاطه فى ميزانيتك للزيت
التوضيح ده سيجعل المهندس بوريو يعطيك افضل الحلول المناسبه لعربيتك و احتياجاتك
اما بالنسبه للزوجه .. اعتقد انها حتكون 10w40 .. و انتظر تأكيد من احد مالكى السياره برضه
انا بحط 5-40 رغم ان الكاتلوج موصى ب 10-40 لكن حاسس انه افضل خصوصا فى الشتاء وطالما مفيش تسريب زيت حط ال 5-40
مواتير شيرى اللى هي اسبيرانزا بتوصى بان لزوجه زيت الماتور هي 10/40 والعموم بيحط غير كده لعدم توافر اللزوجه دى في أنواع كتيره من الزيوت اللى بتباع هنا بخلاف نوعين تلاته منهم الأكثر تواجدا وهو في محطات توتال ..... انا اللزوجه الموصى بها للماتور لانه ميتسوبيشى هي 0/40 ودى موجوده بقله في موبيل فقط وصعب الاقيها في كل محطات موبيل وغير موجوده في زيوت شل اللى بتباع هنا في مصر .... ولكنى بحط اللزوجه اللى هي 5/40 وهى غايه في الروعه وجيده جدا ونوعيه الزيت شل الترا .
أنا معايا 516 و حاطط لها كاسترول ماجنتاتيك و زي الفل معايا و العربية عاملة 145500.
فيه ناس بتحط 5w40 وشغال معاها تمام، المهم تكون العربية مابتاكلش زيت معاك و إلا هايزيد معدل النقص مع ال 5w40
الكاسترول ايدج ممتاز و بيتحط لل بي ام و ال vw و غطا الزيت فيهم مطبوع عليه كاسترول
و ميزته انه بيقعد 15000 كم أو سنة كاملة
امسويل ال oe بيقعد 6 شهور بس، عندهم نوع تاني بيقعد سنة بس مش فاكر اسمه.
مهم جداً تغير فلتر مع غيار الزيت مش مرة و مرة
و ماتعملش engine flush لما تغير الزيت.
رأيي الشخصي خليك مع كاسترول ايدج 5w40 لأن الألمان مش بيدوا ثقتهم بسهولة لمنتج.
كتالوج عربيتك طالب لزوجة 10W-40 فقط .. مع مستوى جودة لا يقل عن API SJ.
بالنسبة لآمسويل.. فعندهم نفس اللزوجة.. ومناسب جدا لعربيتك من ناحية الأداء والجودة.
http://www.amsoil.com/shopres/products/900px/XLO.jpg
AMSOIL XL 10W-40 Synthetic Motor Oil
مستوى أداؤه API SN, SM…; ACEA A1/B1
وحسب المكتوب في موقعهم.. فالزيت ده بيعيش لحد 16 ألف كيلومتر (10 آلاف ميل) أو 6 أشهر... أيهما أقرب
بعض الناس بتقول إنك ممكن تنزل باللزوجة الباردة (الرقم ما قبل حرف W) بمقدار 5 بدون مشاكل في الأداء.. بس أنا شخصيا ما أفضلش الكلام ده خالص.. وأفضّل الالتزام التام بالكتالوج.
...
مش كل الزيوت التخليقية بتقعد سنة... بل بالعكس... قليل جدا اللي بيكمل السنة فعلا.
الزيوت اللي بتكمل سنة شغل هي بس اللي معمولة من أساس غير معدني.. يعني لازم تبقى تابعة لمجموعة 4 أو 5 في تصنيف الـAPI لزيوت الأساس...
إنما 95% من الزيوت التخليقية في السوق بتتصنف تحت مجموعة 3.. أو ما جرى العرف بتسميته "تكنولوجيا تخليقية" أو Hydrocracked Synthesis (بيكتبوها أحيانا HC-Synthesis).
وكل الزيوت دي عمرها 6 شهور فقط.
ادخل على الموضوع ده لمعلومات أكتر
http://www.nilemotors.net/Nile/453047-a.html
أما مسألة ثقة الألمان من عدمه.. فموضوع وضع علامة تجارية محددة في كتالوج العربية أو على غطا الزيت أو ما شابه.. فدي مسألة تجارية بحتة.. لادخل للجودة فيها إطلاقا..
و90% من الأوضاع اللي زي دي هتلاقي شركة الزيت مخصصة نوع واحد فقط مخصص فعلا للماركة دي - وده من ضمن تشكيلة واسعة - وممكن جدا ما تلاقيش عندها ما يناسبك.
الأسلم والأضمن هو التزامك بالمواصفات اللي في الكتالوج.. واشتري أي زيت من أي ماركة.. بشرط واحد.. إن مواصفاته تكون زي الكتالوج أو أحسن...
حتى لو كان زيت التعاون
وعلى فكرة.. زيوتهم كويسة جدا.
...
شكرا لردود حضارتكم
اتفق مع حضرتك في ضرورة الإلتزام بمواصفة الكتالوج.
معلومة عمر الكاسترول في الموتور جايبها من كاسترول انجلترا.
اتفق معاك في ان موضوع علامة الزيت هو تجارة في المقام الأول، لكن من خلال شغل واحد زميلي و والده في مجال ايجار السيارات الفاخرة فالكاسترول فعلاً و خاصة الإيدج متصمم أساساً ل 15000 كم عشان متطلبات العربيات الألماني و كذلك خواص و مواصفات العربيات دي و عشان كده هما بيثقوا في الزيت ده.
أعرف منين ان الزيت لازم ينزل؟
و ممكن شرح ازاي ان زيوت التعاون كويسة؟ و هل في منها تخليقي أو نصف تخليقي؟
أعتقد إن أكتر حاجة ممكن تحصل هي إن الزيت يبدأ ينقص...
بس ما تنساش إن درجة اللزوجة دي أخف على البارد.. يعني طبقة التزييت والحماية خلال بداية التشغيل هتكون أخف... وعلشان كده حاول بقدر الإمكان ما تضغطش على الموتور أبدا لحد ما الموتور يسخن ويوصل لدرجة الحرارة المثالية بتاعته.
بصراحة .. ما أقدرش أنصحك تكمل عليه.. معلش أنا في الحتة دي متزمت شوية.
...
التعميم أكبر خطأ..
كاسترول عندها زيوت متفوقة.. وعندها زيوت تانية مستواها أقل.. وكمان عندها زيوت اقتصادية... وكل واحدة ليها مستوى أداء وسعر مختلف..
عموما.. مجموعة زيوت "إيدج" بتاعت كاسترول هي أعلى زيوت عند كاسترول من ناحية الأداء.. بس خلي بالك.. مش كل زيوت "إيدج" زي بعضها..
تاني حاجة .. الزيوت التخليقية في ألمانيا ليها حالة خاصة دوناً عن العالم كله.. لإن قانونا الدولة هناك بتفرض على شركات الزيوت إنها تكتب على علب الزيت إذا كان الزيت ده تخليقي حقيقي ولا تخليقي من أصل معدني...
التخليقي الحقيقي هو اللي بيعيش مدد ومسافات طويلة.. ممكن توصل لحد 40 ألف كيلومتر في بعض الحالات.
إنما الزيوت التخليقية من أصل معدني أقصى مسافة تشتغلها هي 15-20 ألف كيلومتر (في الحالات المثالية).. ودي مش حاجة غريبة على الزيوت حاليا..
علشان كده لازم لما تتكلم على زيوت زي "كاسترول إيدج" مثلا.. لازم تحدد أنهي نوع بالضبط في كاسترول إيدج اللي بتتكلم عليه.. لإن الاسم التجاري مرتبط بمجموعة معينة من المواصفات تختلف من واحد للتاني جو نفس المجموعة.
مثلا.. موبل1 معروفة إنها تاني شركة في العالم تعمل زيوت تخليقية بعد آمسويل...
موبل1 أغلب زيوتها حاليا تخليقية من أصل معدني.. بس عندها فئة معينة اسمها Extended Performance.. الفئة دي موبل1 بتقول بكل ثقة إنها بتعيش 15 ألف ميل (24 ألف كيلومتر)..
خد فكرة من هنا..
https://mobiloil.com/en/motor-oils/m...ed-performance
Mobil 1™ Extended Performance .
ده غير إن الأهم من ده كله هو المواصفات المكتوبة على الزيت... ولو ما لقيتش المواصفة اللي مكتوبة في كتالوج عربيتك مكتوبة على علبة الزيت يبقى الزيت ما ينفعكش... مهما قالوا على الزيت ده أغاني وألفوله شعر...
العبرة بالمواصفة.. مش بأس حاجة تانية.
بالنسبة لمسألة إمتى تغير الزيت.. أنصحك تقرا الموضوع ده..
http://www.nilemotors.net/Nile/490076-a.html
أما زيوت التعاون.. فعندهم نوع زيت تخليقي فعلا...
ادخل على المشاركة دي علشان تتعرف على الأنواع الموجودة عندهم..
http://www.nilemotors.net/Nile/3876109264-post17.html
وشوف المواصفات بتاعت الزيوت.. هي دي أساس المقارنة.
...
خلينا نتفق الأول على حاجة مهمة جدا...
مواصفة الزيت مش لزوجة وخلاص... الأهم هو مستوى الجودة..
مستوى الجودة معناه إن الزيت فيه خصائص تخليه مطابق لمواصفة معينة ..
المواصفة المعينة دي ليها كود.. والكود ده بيبقى مكتوب على علبة الزيت.
فيه زيوت بتبقى خصائصها مطابقة لمواصفة واحدة.. وزيوت تانية مطابقة لمواصفتين.. ويوت تالتة مطابقة لحوالي 10 مواصفات..
الموضوع ده يبان معقد للي مش فاهم شوية معلومات بسيطة... بس بعد ما تعرف المعلومات دي هتلاقي المسألة بقت سهلة خالص.
الأول .. المواصفات دي لازمتها إيه؟؟؟
المواصفات دي بتحدد قيم معينة لبعض الاختبارات اللي بتعمل على الزيت.. زي نسبة الكبريت مثلا أو الفسفور.. القابلية لتكوين الرغاوي.. نسبة تكون الرواسب.. نسبة التآكل (حماية المعدن من التآكل).. التوفير في الوقود.. واختبارات تانية كتير..
القيم المقبولة لكل مواصفة تختلف من واحدة للتانية..
طيب.. مين اللي بيطلع المواصفات دي؟؟؟
أكتر من جهة.. منها جهات عالمية متخصصة... ومنها شركات السيارات نفسها..
أول وأشهر جهة حطت مواصفة لزيوت المحركات هي معهد البترول الأمريكي (api) .. وبيعمل مواصفات الزيوت بطريقة الإصدارات (زي الويندوز كده.. ويندوز 10 هي أحدث حاجة.. بس ممكن قوي تلاقي ناس شغالة بويندوز 7 لحد دلوقتي)
أغلب شركات الزيوت في العالم بتحط كود الـapi على زيوتها.. وكمان أغلب شركات العالم بتكتب كود الـapi في كتالوجاتها.. بس حاليا شركات السيارات الأوروبية ما بقتش تحط الكود ده في كتالوجاتها.
في الـapi .. ممكن تحط كود أحسن.. إنما ممنوع ممنوع ممنوع تحط كود أقل.
ومهمتنا إننا نتأكد إن الزيت اللي هنشتريه عليه نفس الكود المطلوب في كتالوج العربية أو أحسن...
تاني أشهر كود هو كود جمعية مصنعي السيارات الأوروبية (acea).. والكود ده هتلاقيه في كل كتالوجات السيارات الأوروبية بلا استثناء.
الكود ده طريقته غير الـapi.. عامل فئات مختلفة .. وما ينفعش تحط زيت من فئة غير المكتوبة في كتالوجك إلا في حدود قليلة جدا.
ثالث الأكواد العالمية.. هو كود لجنة وضع معايير الزيوت العالمية (ilsac)... ودي لجنة أمريكية-يابانية.. ولحد دلوقتي ما تختلفش كتير عن مواصفات الـapi... بس مطلوبة حاليا في كل العربيات الأمريكية واليابانية والكورية..
المشكلة إن شركات السيارات الكبيرة لقت إن مواصفات الزيوت العالمية مش بتطلع زيوت مناسبة لمواتيرها.. فبدأت تطلع مواصفات زيوت خاصة بيها.. وغالبا بتبقى زي المواصفات العالمية مع خاصية زيادة ...
أول شركة "بلتنا" بالموضوع ده هي مرسيدس.. ووراها بي إم دبليو... وبعدها فولزفاجن.. والسبحة كرّت في أوروبا كلها... وبعدها أمريكا..
فاللي عنده عربية أوروبية مضطر يشتري زيت تكون مطابقة لمواصفة شركة العربيات بتاعت عربيته علشان يحافظ على موتوره بحالة كويسة.. وإلا الموتور عمره هيقصر.. أو على الأقل.. مش هيديك الأداء اللي انت عايزه من الموتور.
المشكلة الأكبر .. إن كل شركة سيارات من دول عندها أكتر من مواصفة زيت.. تختلف على حسب الموتور والتكنولوجيا اللي فيه.
معلش طولت عليك... بس لازم أشرحلك كده علشان تبقى معانا في الصورة.
ولو عايز معلومات مفصلة شوية.. ادخل على الموضوع ده (في المشاركة الأولى):
http://www.nilemotors.net/Nile/341680-a.html
كده بقى نقدر نعرف إن مش كل زيوت كاسترول إيدج زي بعض.. لإنها تختلف عن بعضها في مطابقتها لمواصفات هيئات الزيوت وشركات السيارات..
خد فكرة من هنا..
http://www.castrol.com/en_us/united-...trol-edge.html
بالنسبة لكاسترول ماجناتك..
بالنسبالي.. الأهم من الزيت هو طلبات الكتالوج...
الكتالوج عندك حدد مستوى الجودة بـapi sg.. وما طلبش أي حاجة تانية...
يعني لما تشتري الزيت كل اللي حضرتك عايزه إنك تتأكد إن الزيت عليه كود api مستواه sg أو أعلى
كاسترول ماجناتك مستواه sn.. ودي أعلى مواصفة موجودة في api حاليا... ووجود أي كود لمواصفة تانية غير كده مش هيفرق معاك خالص.
دور على المواصفات اللي انت محتاجها قبل ما تسأل على الزيت.. علشان تختار الزيت المناسب اللي يشتغل معاك كويس وما تحسش إنك رميت فلوسك عالأرض.
...
أنا سعيد جداً برد حضرتك المفصل و اللينكات المفيدة اللي حطيتها في ردودك و الحقيقة أنا استفدت من مواضيعك كتير جداً قبل ما اختار زيت العربية و لا زلت باتعلم و استفيد من حضرتك.
و يا ريت ردودك دايماً تبقى كده عشان نتعلم :)
أنا كده فهمت النقطة اللي كنت باسأل عليها و بأفضل طريقة ممكنة.
بالمناسبة ... المواصفة sj بحالها مش sg :)))
شكرا لحضرتك
طيب طالما الزيت مبينقصش مش يكمل عليه ليه
ومش درجة لزوجة 5 افضل فى الانتشار والتزييت وقت الدوارة ودرجة 10 اكثر لزوجة يعنى ياخد وقت اطول فى الانتشار عن لزوجة 5 يعنى درجة 5 حماية افضل للموتور من 10
انا اللى اعرفه ان لو حطيت درجة لزوجة w15 بدلا من لزوجة 10 الموصى بها كده انا بتقل على الموتور وقت الدوارة صباحا لأن الانتشار هنا ابطأ وبالتالى الاكتحاك اكتر والتآكل هيكون اسرع من انى لو استخدمت زيت 10
ازيك يا باشمهندس :D
استفسار هنا لو تسمح لي
مش المفروض اللزوجه الخفيفة كويسه للموتور في حالة بدء التشغيل علشان بتنتشر أسرع وتمنع التآكل عند بدء تشغيل الموتور ؟
هي الزيوت متعدده اللزوجة درجة لزوجتها بتتحدد ازاي؟ يعني مثلا زيت 10w40 .. امتى اعرف ان لزوجته دلوقتي وانا مشغل العربية هتكون 10 ولا 40 ؟..
ومتشكر جدا جدا جدا على المعلومات المفيده, فعلا استفدت من خبراتك كتير
الرد على استفسارك بخصوص درجة اللزوجة موجود بالتفصيل في المشاركة رقم 2 في الموضوع ده..
http://www.nilemotors.net/Nile/481878-a.html
...
أول حاجة .. ﻻزم نعرف إن اللزوجات المكتوبة في كتالوج العربية بتبقى موصى بيها بناء على كذا حاجة...
أولها.. الافتراضات اللي حطها مصمم الموتور وهو بيصمم الموتور على الورق.. وده يشمل أنواع المعادن المستخدمة في بناء المحرك.. والخلوصات بين الأسطح المتحركة.. وطرق تشطيب الأسطح دي حسب التكنولوجيا المتاحة في المصانع.. وكمان مقاسات مجاري الزيت.. بالإضافة إلى أنواع الزيوت في الأسواق اللي العربية هتتباع فيها... وده كمان داخل فيه طبيعة استخدام العربية نفسها.
ثانيا.. نتائج التجارب اللي اتعملت على الموتور للتأكد من صحة الافتراضات السابقة..
فوضع الزيوت بدون الالتزام بما جاء في الكتالوج بيغير في الافتراضات دي وممكن يدي نتائج غير محسوبة أو ما اتجربتش قبل كده.. وبالتالي ما نعرفش تأثير التغيير ده على المدى الطويل هيكون شكله إيه..
ممكن تكون النتائج كويسة... بس غالبا بتكون سيئة...
تحب تغامر بموتور عربيتك؟؟؟
عندك عربيات تانية كتير وعربيتك دي عاملها حقل تجارب ومستغني عنها؟؟
ليه تمشي على خطى ناس تانية بتجرب بدون اتباع خطوات التجارب العلمية أصلا.. ومش فاهمة هي بتعمل إيه؟؟؟
عموما.. مسألة تقليل اللزوجة الباردة (الرقم ما قبل w) بيحسن فعلا من سرعة الانتشار.. بس ده بيبقى على حساب الضغط.. وكمان طبقة التزييت بتبقى أضعف..
وبالتالي قدرة الزيت على حماية أجزاء الموتور المتحركة بتبقى أقل.. خصوصا لو حبيت تقرص شوية عالموتور أو اضطريت تتحرك بالعربية وهي محملة بأوزان أو بتطلع مرتفعات والموتور لسه بارد..
ده بشكل عام...
يجوز الزيوت التخليقية ليها قدرة أعلى على مقاومة الاحتكاك من الزيوت المعدنية... بس أنا شخصيا أفضل أكون في الأمان وأحافظ على موتوري أطول فترة ممكنة.
...
قريته يا باشمهندس
على حسب ما فهمت ان اللزوجه الخفيفه كويسه في فترة بدء تشغيل الموتور انما هتضطر تضحي بعمر الموتور لو بتقرص او بتشيل احمال
وعلى الوجه الاخر
الزيت التقيل هيحمي الموتور في الحالات دي انما هيكون ضرره اكتر من نفعه لو انت بتشغل وتفصل عربيتك بصفه مستمره او بتستخدمها استخدام قليل
هنا عايز أسأل حضرتك سؤالين يا باشمهندس ..
[1] إيه رأيك في اختراع كاسترول "الحبيبات الذكية" اللي بتلتصق بأجزاء المحرك وتقلل من احتكاكها بالتالي بيحافظ على الموتور في اول 30 ثانية؟
GTX MAGNATEC Synthetic Engine Oil | Synthetic Oil, Synthetic Motor Oil | Motor Oil, Engine Oil | Castrol - Motor Oil, Engine Oils, Full Synthetic Oil, Transmission Fluid and Lubricants
اقتباس:
THE INTELLIGENT MOLECULES IN GTX MAGNATEC DEFY GRAVITY
The intelligent molecules in Castrol GTX MAGNATEC are what set it apart from other engine oils. These specialized molecular components cling to the engine throughout all driving conditions, even when the engine is off.
When the engine stops, oil drains back to the sump, but the intelligent molecules in Castrol GTX MAGNATEC don’t. They cling to critical engine parts like a magnet, providing an extra layer of protection from the start and throughout warm-up.
[2] رأيك في اختراع شركة زيوت XADO باضافة مواد ذرية بتعمل على سد شقوق وترميم محرك السيارة الخفيف ؟
لمحة عن زيوت XADO جزيئات التجديد و الحماية الذكية - Revitalizant | بوابة XADO للمعلومات | ae.xado.info
تواصلت مع كاسترول مصر بخصوص مدة الزيت في الموتور كزمن و كانت اجاباتهم متفقة مع كاسترول انجلترا بإن الكاسترول ماجناتيك يقعد في الموتور لمدة سنة كاملة لو تمت مراعاة ظروف التشغيل.
بالمناسبة: طبقاً لكاسترول فاللي بيستخدم زيت ماجناتيك مش محتاج يسخن العربية صباحاً لأن فيه جزيئات بتفضل ملتصقة بالجدران و الأسطح فالموتور بيبقى في حالة تزييت دائم
تمام كده.. علشان كده بنقول إن في حالة وجود أكتر من لزوجة زيت تنفع تشتغل في نفس الجو ... يبقى نختار اللزوجة بناء على أسلوب استخدامك للعربية.
هو مش اختراع ولا حاجة... بس هو لازم يحبش الكلام بكلمات زي "الجزيئات الذكية" ووالحبشتكانات دي علشان ده شغل سوق .. أو سميها "تسويق" بلغة التجارة العصرية..
عموما.. الموضوع كله ما يخرج بره إنها مجرد بعض الإضافات اللي ما تختلفش كتير عن مادة "البورون" الموجودة في منتج الـWD-40 المعروف.
ميزة الـWD-40 طبعا إنه بيعمل طبقة رقيقة جدا بس في نفس الوقت زلقة جدا.. وبتدي حماية كبيرة ضد الاحتكاك..
والفكرة دي كويسة طبعا لما اتطبقت في الكاسترول ماجناتك.. لإنها بتدي الحماية الكافية ضد الاحتكاك أثناء عدم وجود الزيت في بداية تشغيل الموتور.
بلح...
ابعد عن أي إضافات خارجية .. بترمي فلوسك عالأرض.
وخد في اعتبارك إن مفيش أي صانع سيارات بينصح بأي إضافات للزيوت... وكل شركات الزيوت "المحترمة" بتقول إن زيوتها مش محتاجة أي إضافات..
ولو فيه شركة بتعمل إضافات كمنتج منفصل... فالاستخدام الوحيد له هو في سيارات السباق.. لإن زيوت سيارات السباق مختلفة عن زيوت السيارات العادية.. وهي دي اللي بتحتاج إضافات خارجية
أصلا أصلا... زيوت سيارات السباق مش معتمدة من أي جهة زيوت عالمية.. يعني مش هتلاقي عليها أي كود للـAPI أو ACEA أو ILSAC.. أو أي حاجة تانية.
ادخل على الموضوع ده علشان تعرف أكتر..
http://www.nilemotors.net/Nile/492072-a.html
...
وإيه هي ظروف التشغيل اللي قصدهم عليها؟؟؟
بص.. في الحكاية دي بالذات .. نادر جدا لما تلاقي شركة زيوت عندها الجرأة إنها تقول بكل وضوح إيه هي مدة تشغيل الزيت بتاعها..
وبعد ما يقوللك سنة و20 ألف كيلومتر.. ييجي يقوللك بس لازم تتبع توصيات الكتالوج...
تفتكر ليه بيقول الكلام ده؟؟
علشان محدش يرفع ضده أي قضايا لو حصل أي مشاكل بسبب "مزاعمه".
لحد دلوقتي.. ما لقتش أي معلومة على مواقع شركات الزيوت بتقول إن زيوتها بتقعد سنة غير "آمسويل".. وكمان مش كل زيوتها.. دي فئة واحدة بس من زيوتها.
وفعليا.. الموضوع يعتمد بشكل كبير على تصميم الموتور وحالته الميكانيكية وكمان أسلوب استخدامك للعربية.. وطبعا مستوى أداء الزيت المطلوب.
لو تابعت توصيات تغيير الزيت في كتالوجات العربيات.. هتلاقي إن فيه شركات بتوصي بتغيير الزيت كل 3000 كيلومتر (شركات صينية كتير).. وشركات تانية بتقول 5000 (أغلب الحالات الشاقة في العربيات اليابانية والكورية).. وشركات تالتة بتقول 10 أو 15 ألف (الحالات المثالية في العربيات اليابانية والكورية) .. وشركات غيرهم بتقول 20 ألف كيلومتر (بيجو/سيتروين).. وشركات تانية خالص مش بتحدد وتقوللك خليك ماشي مع نظام الاستشعار في العربية.
شركة زي فولزفاجن مثلا بتقوللك إن زيوت مواتير الديزل فيها ممكن تقعد لمدة سنتين أو 50 ألف كيلومتر... بس بشرط تشتري الزيوت المطابقة لمواصفاتها.
فالموضوع عايم قوي ومفيش معلومة مؤكدة... والأفضل دايما هو إنك تمشي صح زي ما كتالوج عربيتك بيقوللك.
ولو حضرتك عندك معلومة واضحة من موقع شركة زيوت آخر يا ريت حضرتك توضحهالي... أو تديني لينك/رابط للمعلومة دي علشان أرجعله.
المشكلة التانية إن الوضع الاقتصادي والجغرافي في مصر له تأثير كبير على طريقة تفكيرنا ناحية العربيات..
لإننا في مصر متكدسين في مساحة قليلة جدا من مصر.. وده مخلي المسافات داخل المدن قصيرة جدا..
فتقدر تعتبر إن كل استخدام العربيات في مصر يعتبر استخدام شاق جدا على الزيوت...
ليه؟؟
لإن معظم الناس اللي معاها عربيات مشاويرها قليلة.. وممكن تستخدم العربية مرتين تلاتة في الأسبوع.. ويوم ما تستخدمها يبيقى المشوار قصير.. وكمان بيبقى مشوار زحمة ...
وده من أقصى ظروف التشغيل على الزيت...
بالإضافة لإن قيمة العربية في مصر كبيرة جدا جدا مقارنة بالسعر العالمي ومستوى الدخل.. وبدون مبالغة.. اللي جايب سيراتو جديدة في مصر يعتبر في نفس المستوى المادي للي جايب مرسيدس E-Class في السعودية مثلا..
وده مخلينا بنبالغ فعلا في الحفاظ على العربيات.. لإن قيمتها عالية جدا جدا بالنسبالنا..
والحقيقة إن معظم العربيات في مصر تعتبر من فئة السيارات الاقتصادية والفقيرة في بقية العالم.. وبالتالي فمتطلبات التشغيل المطلوبة لها مش مفترض إنها تكون عالية أو مكلفة.
معلش طولت شوية.. بس ملخص الكلام اللي قصدي عليه هو:
اشتري الزيت اللي يحقق المطلوب بدون المبالغة في شراء زيوت متطورة جدا.. لأننا فعلا مش محتاجينها في أغلب الأحوال.. إلا إذا كانت دي طلبات كتالوج عربيتك.
...
كل ما رد حضرتك بيطول أنا باتبسط أكتر لأني باستفيد أكتر :)
أنا متفق معاك في كل اللي قلته لأنه متوافق مع المقالات و المشاركات اللي قرأتها في مواقع و منتديات أجنبية و باثق جداً في خياراتك.
الفكرة بالنسبة لي إني فضلت مع كاسترول انجلترا كتير جداً في ايميلات مطولة عشان أوصل للوضع الأنسب لحالي و ظروف تشغيلي للعربية، ده غير ان في ميل بيني و بين شيري كانت الخلاصة إن لو الزيت مطابق لمواصفاتهم و قادر على العمل لعدد أميال كبير أو زمن تغيير طويل فممكن التزم بعمر الزيت اللي محطوط له من قبل المُصنِّع. غير كده يبقى الأفضل الإلتزام بالكتالوج "5000 كم".
و أثناء حديثي مع كاسترول انجلترا وصلنا لإن أغلب الظن إن شيري اعتمدت في مواصفتها على زيت معدني 10w40 api sj عشان كده بتوصي بالتغيير كل 5000 كم لأن في وقت بداية تصنيع العربية في 2006 كان ال api معدي ال j في الزيوت التخليقية و نصف التخليقية اللي عمرها بيعدي ال5000 مستريح.
و فيه نقطة كمان ... أبو الفتوح كان في وجود الصينيين أوائل فترة تجميع العربية في مصر كان بيحط و يغير زيت 10000 كم و ماحصلش مشاكل مع شيري بسبب كده.
أنا مش بحاول أقول أنا صح على فكرة ... أنا بوضح اللي مريت بيه.
بالمناسبة: أنا أغلب استعمالي للعربية دائري و مش باقرص عالعربية أو احملها وزن زايد ... و قليل لما أمشي في زحمة، يعني بعاملها معاملة الأطفال قدر المستطاع :D
الموضوع بسيط جدا الزيت 5w40 زيت تخليقى كامل بمواصفات api - sn وال 10w40 نصف تخليقى وبيكون موصفات api - sm او, api sn انت الكتالوج بيقول api - sj 10w40 يبقى النوعين معدين مواصفات عربيتك وانت على حسب ميزانيتك تقدر تحدد بالنسبة لتغير الزيت لازم تلتزم بالكتالوج حتى لو حاطط زيت تخليقى كامل لان الزيت حتى لو صالح للاستخدام فترة اطول بس بيكون مليان تراب وكربون وده بيعمل sludge الى هى الرواسب السوداء الى عاملة زى الطينة وبتسد مجارى الزيت جوة الموتور
تمام :grin54:
على كده تبقى حاجه مفيده للناس اللي زي حالاتي مشاوير متقطعهاقتباس:
هو مش اختراع ولا حاجة... بس هو لازم يحبش الكلام بكلمات زي "الجزيئات الذكية" ووالحبشتكانات دي علشان ده شغل سوق .. أو سميها "تسويق" بلغة التجارة العصرية..
عموما.. الموضوع كله ما يخرج بره إنها مجرد بعض الإضافات اللي ما تختلفش كتير عن مادة "البورون" الموجودة في منتج الـWD-40 المعروف.
ميزة الـWD-40 طبعا إنه بيعمل طبقة رقيقة جدا بس في نفس الوقت زلقة جدا.. وبتدي حماية كبيرة ضد الاحتكاك..
والفكرة دي كويسة طبعا لما اتطبقت في الكاسترول ماجناتك.. لإنها بتدي الحماية الكافية ضد الاحتكاك أثناء عدم وجود الزيت في بداية تشغيل الموتور.
هو ده المفروض انه زيت ثقيل وفيه المواد اللي مش عارف اسمها دي :Dاقتباس:
بلح...
ابعد عن أي إضافات خارجية .. بترمي فلوسك عالأرض.
وخد في اعتبارك إن مفيش أي صانع سيارات بينصح بأي إضافات للزيوت... وكل شركات الزيوت "المحترمة" بتقول إن زيوتها مش محتاجة أي إضافات..
ولو فيه شركة بتعمل إضافات كمنتج منفصل... فالاستخدام الوحيد له هو في سيارات السباق.. لإن زيوت سيارات السباق مختلفة عن زيوت السيارات العادية.. وهي دي اللي بتحتاج إضافات خارجية
أصلا أصلا... زيوت سيارات السباق مش معتمدة من أي جهة زيوت عالمية.. يعني مش هتلاقي عليها أي كود للـAPI أو ACEA أو ILSAC.. أو أي حاجة تانية.
ادخل على الموضوع ده علشان تعرف أكتر..
http://www.nilemotors.net/Nile/492072-a.html
شاكر فضلك يا بشمهندس
قريت كل مواضيعك ^__^
رأيى الشخصى المتواضع
خليك فى لزوجه ال 10W أأمن
و لو حبيت تستعمل لزوجه اقل ( للحد الادنى ) .. يبقى لازم زيت تصنيعى .. و لزوجه ال 0W أأمن من لزوجه ال 5W من وجهه نظرى
زوجه ال 0W فى بدايات تصنيعها كانت باستعمال زيوت اساس تصنيعيه حقيقيه عاليه الجوده .. ال 5W بصفه عامه اضافاته بتكون اعلى من ال 10W و ده عيب موش ميزه على المدى الطويل ( اواخر العمر الافتراضى للزيت )
الكلام ده عام .. و لكن بيتوقف على تصميم الزيت نفسه و ممكن لا يكون منطبق فى زيت معين مثلا
معلومه عامه .. 90% من التأكل لاجزاء الموتور بتكون اثناء ال Cold Start .. و ال 10% المتبقيه هى نتيجه الاحتكاك اثناء استعمال السياره بعد سخونه الزيت
أنا ما عنديش مشكلة مطلقاً في لزوجة 10w40 و حاطتها بالفعل عندي.
أنا كلامي مع الأستاذ بوريو كان على مدة الزيت جوه الموتور في حالة إني ما عدتش 10000 كم خلال سنة.
أشكرك على معلومة التآكل و دي كانت من أسباب اختياري للكاسترول ماجناتيك بسبب تقنية تصنيعه المتضمنة لجزيئات تظل ملتصقة بالمعدن مما بجعل الموتور في حالة تزييت دائمة و بتغني عن التسخين صباحاً.
موضوع لزوجة الزيت أو تأخر التزييت بمعنى أصح مش هو السبب في التسخين خالص.
تسخين الموتور هدفه الأساسي هو وصول الموتور لمقاساته الصحيحة المتصمم عليها على الورق.. ولازم الموتور يوصل لمقاساته دي بأسرع ما يمكن علشان:
- نقلل من التآكل اللي ممكن يحصل نتيجة اختلاف المقاسات
- نقلل من استهلاك الوقود الزايد
- نساعد على وصول الزيت لدرجة حرارة التشغيل بأسرع وقت
الكلام اللي طالع اليومين دول بيقول إن العربيات الإنجكشن مش محاجة تسخين.. والمسألة مش كده بالضبط
فعليا انت تقدر تتحرك بالعربية بمجرد ما تتأكد إن الزيت وصل لكل أجزاء الموتور المتحركة... وده مش بياخد وقت أكتر من 10 ثواني في أغلب الأحوال.
مسألة تسخين الموتور مرتبطة بشكل مباشر بوجود ثرموستات الكوعة راكب وشغال صح في الموتور..
ولو رجعت لكتالوجات عربيات قديمة شوية (موديلات الثمانينات مثلا) فهتلاقيها بتقوللك إنك مش محتاج تسخن أكتر من 30 ثانية.. بالذات لو كان فيها جهاز الـAuto Choke (كان عندنا تويوتا كريسيدا 82 كربيراتير وما كناش محتاجين نسخن.. دور واطلع).
كل اللي حضرتك لازم تعمله قبل ما الموتور يسخن (حرارة العداد توصل قبل النص) إنك تسوق بالهداوة بدون ما دوران الموتور يزيد عن 3000 RPM ... غير كده تبقى بتضيع وقتك وفلوسك بدون استفادة فعلية.
...
- على ما اتذكر .. خلى بالك كاسترول بره مصر فيها انواع زيت بتقنيه الجزيئات و فى انواع ثانيه بدونها
على ما اتذكر كان النوع اللى فيه الجزيئات .. كان بيكون فى اسم الزيت stop-start
مثلا castrol magnatec stop-start
فاتأكد من المواصفه اللى فى مصر و انها بتحتوى على الجزيئات
فى جميع الاحوال الزيت لا يزيد عن سنه حتى لو كان الكيلومتر المقطوع قليل .. طبعا بشرط ان كتالوج عربيتك يسمح بالسنه .. او مستوى خدمه الزيت و شركته المصنعه حددت ذلك صراحهاقتباس:
أنا كلامي مع الأستاذ بوريو كان على مدة الزيت جوه الموتور في حالة إني ما عدتش 10000 كم خلال سنة.
اقرأ ردى ده ( فى موضوع اخر و لكن سيوضح الفكره ) .. حيوضح لك ليه موش اكثر من المده الزمنيه المسموحه بغض النظر عن الكيلومتر المقطوع
ده توضيح لرقم ال TBN و تأثيره على ميعاد تغيير الزيت .. و هو ايضا من طرق تحديد العمر الافتراضى للزيوت بصفه عامه ( سواء الزيوت الجديده او المستعمله فعلا )اقتباس:
- الزبت بيلزم يتغير لما يبدأ فيه تكون الاحماض بنسبه غير مسموحه .. تكون الاحماض بنسبه مرتفعه هو دلاله مباشره ان اضافات الزبت فقدت خواصها .. يبقى ده ميعاد التغيير
- سواء المشاوير القصيره او الركن فترات طوبله .. بيؤدى لوصول رطوبه للزيت .. و بالتالى تحدث اكسده .. و بالتالى تتكون الاحماض .. الاحماض دى بتتفاعل مع جسم المحرك و يبدأ التأكل و ايضا الصدأ الداخلى
الاحماض دى بيتسبب فى انخفاض رقم ال TBN و بالتالى بيعجل بميعاد تغيير الزيت ( بغض النظر عن المده المسموحه او الكيلومتر المسموح )
- رقم ال TBN ده بيعبر عن مدى قدره الزيت على مقاومه الاحماض المتكونه .. و بالتالى الصدأ .. و التآكل .. وبالتالى الاكسده
- عموما فى زيوت معدنيه ليها رقم TBN عالى .. موبيل عندها زيوت الرقم بيوصل 12
- العبره موش بالرقم فى حد ذاته .. و لكن فى مدى قدره الزيت ( كوحده واحده شامله التصميم الكامل للزيت و الاضافات ) على المحافظه على هذا الرقم اثناء فتره الاستخدام ( انخفاض تدريجى محسوب )
بمعنى رقم ال TBN لا يتم النظر اليه كرقم و لكن كعلاقه مع رقم اخر هو TAN
.. ( total acid number ) كدلاله على تكون الاحماض
http://www.nilemotors.net/Nile/image.../wol_error.gifاضغط هنا لمشاهدة الصورة بالحجم الطبيعي.http://media.noria.com/sites/archive...p_image001.gif
- من احدى اساليب تحديد Drain interval هو حساب العلاقه بين TBN و ال TAN و بناء عليها يتم تحديد العمر المناسب لاستخدام للزيت
رقم ال TAN يظل ثابت .. و لا يبدا بالارتفاع الا بعد ان ينخفض رقم ال TBN بنسبه 50% مثلا
حينها يبدأ رقم ال TAN فى الارتفاع الى حين الوصول الى نقطه التعادل بينهما مثلا ( مثلا عند انخفاض 65% من رقم ال TBN )
- الفكره .. يعنى انا لو عندى زيت ( او موتور .. او قوانين ) استطاع ان يمنع تكون الملوثات اصلا .. يبقى اقل رقم TBN سيؤدى المطلوب قبل ان تتكون الاحماض بصوره ضاره
ألف شكر على المعلومات المفيدة و المميزة