قائمة سوداء لمحطات البنزين (يغشون البنزين بماء أو أي غش آخر)

**hero** · 08-08-2007 12:26 AM

يا جماعه انا متهيألي ان دي ظاهرة خاصة بالمحطة مش بالشركة المنتجة للخامات البترولية سؤا كانت كالتكس او شيل او موبيل...لان الشركة بتبعت السواق بتاعها يفضي الكونتانير بتاعه في التنك الارضي في المحطة وبيخلص دورها علي كدة...

الشركات دي كبيرة جدااا واكبر من انها تغش المنتج بتاعها هي اصلا كسبانة من الهواا...المشكلة بقي في صاحب المحطة ايلي تقريبا عايز يعمل الطاق طاقين تلاتة واربعه كمان...

وعلي فكرة انا متأكد ان لو حصلت شكاوي متكررة من بعض المحطات ...الشركات دي هاتاخد اجراء ....
انت اصلا علشان تروح تقنع شركة من دول انك تفتتح محطة خدمة وتمويل سيارات بتحطلك يجي مليون جنية تأمين ....يعني العملية مش سهلة اطلاقا....

الشركات دي (موبيل واسو بالذات) ليهم مراقبة جودة بس متهيألي انها علي المنتج المنقول لحد المحطة فقط ....بعد كدة مالهمش سيطرة علي المحطات لان دة بيتبع صاحب المحطة ....بس لو محطة او اتنين هايبوظوا سمعة شركة...اكيد هاتاخد موقف ايجابي ضدة....

انا شفت محطات كتير الشركات سحبت ترخيصها من اصحابها ....وفي الاخر بيبيع المحطة ارض فضاء....
انا من رأي ان الناس ايلي اتضررت تشتكي ...حتي لو لخدمة العملاء او مراقبة الجودة....خصوصا ان الناس مجمعه علي محطات بعينها ...

**tamohsen** · 08-08-2007 09:39 AM

موبيل اللي في ميدان فلسطين -المعادي الجديدة--البنزين علية مية--والمعاملة جافة -واسعاراي حاجة في الماركت اغلي من اي بنزينة

دى البنزينة دى من المفضلين عندى, انا لما ببقى فى المعادى هى او شل اللى فى الاسلكى

on the run فى اى حتى اغلى شوية, بس هى ده مكان التجمع الرسمى بتاع الشباب فى المعادى الجديدة

بس فعلا اللي بيشتغلو فيها شويه .... وكمان مكانهم المفضل لشرب السجاير يقعدوا جنب مكنه ضغط الهوا "اللي هيه بايظه اصلا" يعني ممكن يعملو مصيبه باهمالهم ده
وعلي فكره محطه كالتكس جربت معاها اكتر من عربيه ومعملتش مشاكل ومعاملتهم كويسه رغم ان في ناس كتير بتشتكي من بنزنهم

برجاء عدم ذكر اى الفاظ جارحة.
Abdallah

**casperinoo** · 10-08-2007 06:18 AM

لما حطيت من امارات مصر ...عرفت ان كل المحطات حراميه...بيتهيألي افضل تلاته
1 امارات مصر
2 شيل
3 موبيل

غير كده يبقي فككك..ولو مفيش بنزين ومضطر يبقي ارمي العربيه واركب تاكسي احسن

**Powert** · 10-08-2007 10:01 AM

لأ في واحدة كمان

الوطنية دي تبع الجيش وبنزنها بيخلى العربية طلقة

**Ashraf A.Kader** · 10-08-2007 11:02 PM

يعني نتعامل مع شل وامارات مصر بس0انا امبارح مونت من موبيل شرم الشيخ وحاسس ان العربية مش مظبوطة0المرة الجاية حاجرب وطنية واقارن

**AhmedElsayed** · 12-08-2007 10:01 AM

هى امارات مصر فين تانى غير فى طريق مصر اسكندرية؟

**wlng76** · 12-08-2007 11:36 AM

أنا لى تجارب كتير فى الموضوع دا من زمان.
وخلاصة انا بعد ما اتعاملت مع اغلب انواع المحطات وفي أغلب المناطق في القاهرة وكمان بعض المناطق خارج القاهرة, لاحظت إن الموضوع بشركة معينة أكتر منه مرتبط بمحطة معينة, وخرجت من الموضوع بالآتى:

1. أسوأ محطات على الإطلاق موبيل وأسو وتعاملت مع أغلبهم (الهرم -م. نصر - مصر الجديدة, وحتى المحطات المشهورة جدا زى اللى في الأوتو استراد واللى في الدقى على الكورنيش), تقريبا سياسة شركة موبيل إضافة السولار للبنزين - عن تجربة - لإن فى ناس كتير بتحب تدخل محطات البنزين علشان تشم السولار والجاز, وعلشان كدة ماعندهمش بنزين 80 لإنهم مش هيعرفوا يغشوه علشان هو رخيص اصلا.

2. أفضل شركات بالترتيب (الخدمة الوطنية - التعاون - شل)

3. حاول تثبت محطة البنزين اللى بتتعامل معاها, علشان لو فيها غش هتعرف ان السبب فى الأعطال اللى في سيارتك نتيجة المحطة دى, لإن لو انت حطيت بنزين مغشوش آثاره مش هتبان على طول وكمان مش هتختفى بسهوله قبل ما تفول بتاع ثلاثة اربع مرات تانيين.

4. يفضل قبل ما تختار المحطة اللى انت هتتعامل معاها بصفة مستمرة, إعمل تست بسيط, هات زجاجة من أى نوع بس تكون من النوع الشفاف, وتملاها فى المحطة دى, وتتأكد من سلامة البنزين بتاعها, من خلال لون البنزين ورائحته, يعنى: بنزين 80 لونه أحمر, وبنزين 90 لونه أخضر (زى ميراندا التفاح), وبنزين 92 تقريبا لونه مائل للذهبى (مش متأكد قوى لإنى مثبت المحطة قبل موضوع بنزين 92), كمان البنزين لونه شفاف (بدون شوائب), وبالنسبة للرائحة فالبنزين رائحتة منفرة (مش محببة زي السولار أوالجاز).