استشارة بخصوص زيوت كاسترول

**Marwan Mahmoud** · 08-04-2017 05:00 PM

السلام عليكم

ازيكم يا جماعة يا رب تكونوا بخير جميعا
انا معايا Hyundai New Accent 2010 ماشية 139000 بدون مشاكل الحمدلله
المهم بعد مسيبت التوكيل بدأت احطلها زيت Mobil xhp للاسف 20W50
للاسف حطيته و انا مش عارف انه مش كويس و انه تقيل علي العربية و بعد فترة كده لقيت العربية صوتها بدأ يعلي خصوصا الصبح و هى باردة بس الزيت الحمدلله عادي و مش بينقص
ناس قالولي احط Castrol Magnetic 10W40 و قالوا انه كويس و هيهدي العربية و كده و شوية لما الاقي العربية بقت كويسة عليه و مفيش اي مشاكل انزل ل Edge 5W30 بحيث ان هيونداي كاتبة ان الافضل ليها 5W30
فانتم ايه رأيكم في الموضوع ده اتوكل علي الله و احط كاسترول و لا لا و يا ريت تقولولي تجاربكم الشخصية لو موجودة
و شكرا مقدما

**borio1704** · 08-04-2017 10:13 PM

سيبك من التجارب الشخصية.. خصوصا إن غالبا اللي هيرد عليك بتجربة هتبقى في عربية تانية من ماركة مختلفة خالص...

خليك مع كتالوج عربيتك.. هو المرجع الوحيد

على فكرة.. كتالوج الأكسنت ما منعش إنك تستخدم لزوجة 20W-50... ولكن لازم تلتزم بمستوى الجودة المطلوب..

بالعكس... المفروض ما تستخدمش لزوجة 10W-40 لإنها مش مكتوبة في كتالوج عربيتك.

ارجع للموضوع ده لو عايز تفاصيل أكتر عن مستوى الجودة (مستوى الأداء)..
https://www.nilemotors.net/Nile/341680-a.html (القواعد الذهبية لاختيار زيت العربية.... موسوعة مبسطة لأساسيات زيوت المحركات)

من ناحية الأنسب لعربيتك... فكاسترول إيدج ما يعتبرش الأفضل حسب طلبات الكتالوج.

أرشحلك واحد من دول:

موبل1 X1 بلزوجة 5W-30
آمسويل سجنتشر بلزوجة 5W-30
آمسويل XL بلزوجة 5W-30
آمسويل OE بلزوجة 5W-30
بترومين سوبر سنثتك A-1 بلزوجة 5W-30

...

**a7medsh3rawi** · 10-04-2017 08:44 AM

ما فيش ضرر انك تغير من 20-50 ل 5-30

**borio1704** · 10-04-2017 12:04 PM

الحاجة المتوقعة لما تيجي تغير من زيت معدني تقيل نسبيا (زي 20w-50) إلى زيت تخليقي خفيف (زي الـ5w-30) هي إن الزيت ينقص... وده أكتر حاجة بتخلي الناس تخاف تغير...

الفكرة إن أغلب الناس ما تعرفش ليه حصل كده وهل الأعراض دي هتفضل مستمرة ولا لأ... كله بيخاف ويرجع للخلف در...

المشكلة كلها جاية نتيجة تكوّن ترسبات صمغية على الشنابر...

الشنابر طبيعتها إنها عاملة زي السوستة علشان تحكم قفل السلندر وتمنع خروج الغازات وكمان تمنع دخول الزيت...

الترسبات دي بقى بتمنع الشنابر من التمدد الطبيعي بتاعها.. زي ما تكون بتكتّفها.. خصوصا لما الموتور بيبرد والترسبات دي تجمد وبتخلي الشنبر على وضعه وهو بارد..

استخدام الزيت التخليقي هيدوّب الترسبات دي مع الوقت... وغالبا الترسبات دي بتحتاج حوالي 10-20 ألف كيلومتر لحد ما تدوب خالص... بعدها الشنابر بترجع تتمدد تاني وتحكم قفل السلندرات والزيت ما ينقصش.. أو نقصه هيبقى قليل جدا..

غير للزيت التخليقي .. وتابع النقص... ولو استمر أكتر من المسافة دي يبقى حط زيت أتقل شوية ... حسب توصيات الكتالوج برده.

...