استفسار من استشارى الزيوت بوريو

**ahmed_wagih** · 02-11-2017 09:35 AM

السلام عليكم
انا عربيتى دايو لانوس 2008 عاملة 150 الف كنت بحط زيت موبيل ون 5w30 بناء على توصيتك وكان زى الفل معايا وغيرتة بعد 10 شهور على 8000 كيلو وكان زى الفل والسحب واستهلاك البنوين وصوت العربية تمام
غلطت وغيرت ل امسويل سيجنستر نفس اللذوجة علشان ناس كتير شكرت فية وعلشان دى الزيت الوحيد التخليقى فى مصر اللى بيقعد سنة كاملة
المهم انا مكملتش 500 كيلو صوت المكنة على عن الاول وبتضر ادى غيار بدرى عن الاول علشان صوت المكنة وحاسس ان العربية مكتومة شوية واستهلاك البنزين زاد والعربية مكنتش زى الاول
ملحوظة مش عارف ليها علاقة بالزيت ولا لا لما غيرتة كان قبل ما اغيرة فية تسريب زيت خفيف بعد ما حطات امسويل بقيت بعد كل مشوار القى زيت عند مسامير غطاء التكيهات
ركبت جوان والحمد لله بقى له اسبوع تمام ومفيش تسريب زيت خالص ومقاس الزيت مضبوط مشكلتى فى صوت المكنة وضعف الاداء

برجاء النصيحة

**borio1704** · 04-11-2017 01:36 PM

بعض الحاجات اللي حضرتك ذكرتها طبيعية جدا...

أولا: ظهور التسريب...

زيت آمسويل سجنتشر زيت تخليقي حقيقي 100% .. وزيت الأساس فيه من الـPAO.. والزيوت المعمولة من المادة دي أحد الخصائص بتاعتها إنها بتظهر كل مشاكل الجوانات والأويلسيلات في الموتور.. والطبيعي إي أي جزء معمول من الكاوتش عمره لايزيد عن 5-6 سنوات...

الظاهرة دي تحديدا هي اللي عملت سمعة على الزيوت التخليقية إنها مش مناسبة للعربيات القديمة... وده ملوش علاقة بالأداء.. إنما المسألة اقتصادية تماما.

فظهور تسريب من الجوان شيء طبيعي جدا.

راجع الموضوع ده بردو
https://www.nilemotors.net/Nile/453047-a.html (الزيوت التخليقية ... هل هي تخليقية فعلا؟؟)

ثانيا: ارتفاع الصوت

برده.. الزيوت التخليقية الحقيقية معروف عنها إنها ممكن ترفع الصوت بنسبة بسيطة لإن طبقة الحماية بتاعتها رقيقة (بس فعاليتها عالية جدا)..

بس اللي أعرفه إن زيت سجنتشر فيه إضافات لتخفيض الضوضاء ...

برده مهم جدا نعرف إيه المقصود بصوت الموتور...
هل هو الصوت الصادر من تلامس الأجزاء المتحركة في الموتور (بالذات صوت خبط الكستنبانات والتاكيهات في وش السلندر) ولا المقصود هو صوت احتراق البنزين داخل السلندرات...

لو كان المقصود هو الصوت الأولاني... يبقى الزيت له علاقة...

أما لو كان المقصود هو الصوت التاني (خصوصا إن مصاحبه ضعف في السحب).. يبقى الزيت مالوش تأثير.. وغالبا المشكلة جاية من حاجة تانية ليها علاقة بدايرة الوقود والاشتعال...

أنا أتوقع إنه الصوت التاني.. وفي الحالة دي راجع التالي:
- فلتر الهوا
- البوجيهات
- نظافة البوابة
- نوع البنزين المستخدم ومحطات البنزين اللي بتتعامل معاها.

...

**borio1704** · 06-11-2017 07:19 AM

المشاركة الأصلية كتبت بواسطة ahmed_wagih

دايما لا تتاخر عن المساعدة ربنا يجزيك خير

بص يا سيدى بالنسبة لموضوع الصوت هو عالى لما اجى ادور عن الاول سنة بسيطة ويرجع يهدى تانى انما الصوت الجديد بالنسبة لى ومكنش موجود انى قبل كدة كنت بسقط غيار متاخر عن دلوقتى يعنى مثلا الثالث كان يمشينى 60 دلوقتى احسن ان صوت الماكنة على وعايزة تاخذ غيار وانا معرفش دة عيب ماتو ولا بنزين حضرتك اللى ممكن تفيدنى فى الموضوع دى

بس عامتا حضرتك شايف انى اكمل بالزيت عادى مفيش خطورة على الماتور

ملحوظة تانية انا من ساعة ما اشتريت العربية من سنتين تقريبا عمرى ما نظفت بوابة او الايدل بسمع عنهم بس الله اعلم يمكن الميكانيكى كان بيعملهم بس انا لما بروح له بروح على عيب معين بيعملة معتقدش انه عملة قبل كدة

منتظر النصيحة

في رأيي حضرتك بتستخدم واحد من أفضل الزيوت في العالم.. فما أتوقعش يكون هو السبب...

زي ما قلت لحضرتك... اتأكد الأول من الحاجات اللي قلتلك عليها ، ولو لسه المشكلة موجودة نبقى نشوف إيه حكاية الزيت.

...