الموضوع: اسكندريه

أداء العربية بيتأثر بعوامل كتير.. الزيت واحد منها.. لكن أكتر حاجة بتأثر فعلا في أداء الموتور هي عدم دخول الهوا إلى الموتور بسهولة.. بمعنى إننا عايزين نشوف إيه اللي ممكن يكون سادد سكة الهوا وننظفه كويس...

لازم نراجع سكة الهوا بالكامل .. من أول فلتر الهوا.. وبوابة الثروتل.. ومانيفولد السحب..

في حالة حضرتك.. أتوقع إن المشكلة تكون في بوابة الثروتل...

في العادة وبعد فترة من الاستخدام .. البوابة دي بيتراكم عليها ترسبات زيتية (نتيجة وجود خرطوم النفس الموصل بينها وبين فلتر الهوا).. ونتيجة الترسبات دي بتبقى حركتها صعبة وبالتالي استجابة الموتور بتبقى ضعيفة.

ادخل هنا لو عايز تعرف أكتر عن الموضوع ده...
تبخر الزيت... هل هو حقيقة أم خرافة؟؟

أنصحك تعمل تنظيف للبوابة.. وممكن تعملها عند ميكانيكي (فاهم) أو حتى بنفسك (لو بتحب تشتغل في العربية بنفسك .. واليوتيوب مليان فيديوهات عن الحاجات دي).

أنصحك كمان تستخدم منظف دورة الوقود (بانتظام كل 5000 كم).. لإن البنزين بيدخل مع الهوا في المانيفولد وهينظف أي ترسبات كربونية موجودة جوه..


أما بالنسبة لاختيار الزيت...

فاختيار اللزوجة لزيت المحرك بيعتمد بشكل كبير على طريقة استخدام حضرتك للعربية.. بس خد بالك إنك كمان لازم تراعي أكواد أداء (جودة) الزيت المطلوبة في الكتالوج..

اللزوجة العالية بتدي حماية أكبر للموتور في حالات التحميل.. والمقصود بالتحميل هي الحالات اللي بيكون فيها حمل كبير على الموتور.. زي:

* الشد بالعربية والقرص على الموتور..
* تحميل أوزان كبيرة في العربية (أكثر من 250 كيلوجرام) ..
* سحب أو قطر عربيات أو مقطورات..
* طلوع أو نزول الطرق الجبلية..
وأي حالات مشابهة..

في الحالات دي بس يفضل استخدام لزوجات عالية للحفاظ على الموتور من التآكل أثناء التشغيل.. والمقصود هنا طبعا الرقم الأخير في لزوجة الزيت (5W-50 .. 15W-40)

أما في حالات الاستخدام العادية فاستخدام لزوجات خفيفة أكثر من كافي.. وبالتالي مش مفضل إنك تستخدم لزوجة أعلى من 30... يعني 5W-30 أو 10W-30

أنصحك بواحد من الزيوت دي:

موبل1 x1 بلزوجة 5W-30

Mobil 1™ x1 5W-30

الزيت ده مكتوب عليه إنه مناسب للسيارات اليابانية والكورية..

الزيت ده مناسب بردو لإن مستوى أداؤه API SN و ACEA A1.. يعني بردو محقق المطلوب في الكتالوج بالكامل...

بالإضافة إلى إنه محقق مواصفات لفورد وجنرال موتورز.. وواخد ترخيص جنرال موتورز الجديد Dexos1

خد بالك إن تصنيف ACEA A1 معناه إن الزيت ده بيوفر في استهلاك البنزين بالمقارنة مع الزيوت اللي واخدة A3... بس مش بيخدم في الموتور أكتر من 10 آلاف كيلومتر...


موبل1 FS بلزوجة 5W-30

Mobil 1™ FS 5W-30

الزيت ده مكتوب عليه إنه مخصص للسيارات الأوروبية..

مبدئيا هو مناسب لموتور عربيتك لإن مستواه API SN و ACEA A3.. يعني محقق المطلوب في الكتالوج بالكامل...بالإضافة إلى إنه محقق مواصفات لمرسيدس وفولزفاجن..

خد بالك إن تصنيف ACEA A3 بيدينا ثقة إن الزيت بيخدم مسافة طويلة أكتر من 10 آلاف كيلومتر


طبعا.. فيه أنواع تانية عند ماركات كتير... لو بتفضل ماركة معينة أو إن الماركة دي متاحة قدامك بسهولة أكبر .. قوللي وأنا أشوفلك المناسب عندهم..

لو عايز معلومات أكتر.. ادخل على المواضيع دي:
إزاي تختار لزوجة زيت الموتور المناسبة لعربيتك؟؟؟
إمتى تغير زيت الموتور؟؟؟
القواعد الذهبية لاختيار زيت العربية.... موسوعة مبسطة لأساسيات زيوت المحركات


...

المشاركة الأصلية كتبت بواسطة محمد الدقرى

شكرا للمهندس بوريو على هذه المعلومات القيمه والمفيده جدااااااااااا؟ ولى سوال اخير هل النزول باللزوجه من 5/50 الى 5/30 يكون لها اثار ضاره على الموتور وخصوصا ان السياره من الزيرو وحتى 62الف كم بيتحط لها زيت موبيل معددنى 20/50 وبعد ذالك تم استخدام زيت تخليقى بالكامل 5/50 والان حضرتك بترشح لى موبيل 5/30 هل النزول باللزوجه من 50 الى 30 ممكن ياثر على المكنه ام لا وهل موبيل 5/30 تخليقى ولا معدنى ولحضرتك جزيل الشكر

اختيار اللزوجة بيعتمد أساسا على أسلوب سواقتك واستخدامك للعربية.. و اوعى تصدق حد يقوللك بعد الـ100 ألف لازم تحط معدني.. الكيلومترات مالهاش دعوة...

استخدامك لزيت 5W-30 هيخلي استجابة العربية أسرع بكتير وهتحس إن الموتور فايق... وده بيوفر في استهلاك البنزين..

إزاي؟؟

نفس دوسة رجلك للدواسة حاليا هتخلي العربية تمشي أسرع.. وبالتالي علشان تاخد نفس الأداء الحالي لازم تخف رجلك من على الدواسة... وده معناه استهلاك أقل...

لو استخدامك للعربية فيه تحميل عالي على الموتور يبقى خلينا في الـ5W-50 أو 5W-40

حالات التحميل على الموتور مكتوبة في الموضوع ده:
إزاي تختار لزوجة زيت الموتور المناسبة لعربيتك؟؟؟

ارجعله رجاء...

وعموما.. الحالات كالتالي:
1- تحميل السيارة بحمولة وأوزان عالية أكتر من نصف الحمولة القصوى المسموح بيها في الكتالوج (غالبا الحمولة القصوى بتبقى 500 كجم).
2- قطر أو سحب سيارات أو مقطورات (كرافان مثلا).
3- القيادة على الطرق الجبلية صعوداً أو نزولاً (زي جبال سيناء مثلا).
4- القيادة الرياضية والتسابق (سيارات السباق بيتحطلها زيوت تقيلة دايما).
5- السيارات الخدمية (زي سيارات التاكسي أو سيارات دوريات الشرطة مثلا)

لو مفيش حاجة من دول بتحصل معاك يبقى مفيش أي داعي تحمل عربيتك بحمل زايد ولا جيبك بمصاريف بنزين بدون داعي... ومفيش فرق في في عمر الموتور بين الاتنين.

وبالنسبة لتأثير استخدام اللزوجة الخفيفة..
مفيش آثار ضارة مادام اللزوجة مكتوبة في الكتالوج.. وأقصى حاجة ممكن تلاحظها مع استخدام الـ5W-30 هي نقص الزيت شوية خلال غيارين أو تلات غيارات زيت نتيجة إن الزيت ممكن يشيل الترسبات الصمغية على الشنابر... بعد كده الوضع بيرجع تمام.

ولو قلقان من حرارة الجو... ما تقلقش..
أنا عايش في جدة في السعودية.. والحرارة في الشتا ما بتنزلش عن 20 وفي النهار الحرارة 30.. وفي الصيف الحرارة دايما حوالي 38-42 نهارا و35 ليلا.. وبستخدم زيت يحقق طلبات الكتالوج وبلزوجة 5W-30 حسب توصيات الكتالوج...

عربيتي موديل 2014 وماشية 100 ألف لحد دلوقتي.

أصلا أصلا.. اللزوجة الشعبية هنا 10W-30..

وبالنسبة لموضوع معدني ولا تخليقي..
لحسن الحظ... مفيش في مصر زيت 5W-30 معدني... كله تخليقي.. بالذات لو من ماركات مشهورة..


...