الموضوع: ما هو قانون التعامل مع الناس في مصر .. مش عارف أعيش في مصر

ليه سؤال صغير ؟!

ومخليني عمال اسألة طول الوقت .. ألا وهو ليه الناس بقت بالشكل السيء ده .. وبالأخلاق اللي زي الزفت دي .. هل مبدأ التعامل مع بعضنا هو قانون الغاب فعلاً زي ما بنسمع .. ومبقاش في احترام لآي قيم أو ذوق و مثل عليا في البلد وبقت هي دي القاعدة السائدة ؟!

وايه اللي وصلنا لكده هل هي الظروف اللي حوالينا (معتقدش) .. هل في مخطط أو ظروف تانية تخلي الناس تبقى كده .. كله كاره بعضه .. وعاوز يدوس على التاني .. وميبقاش فيه مراعاه لأي تقاليد أو مبادئ.

طبعاً الكل بيسأل أنا بقول الكلام ده ليه .. طول ما أنا ماشي (وأكيد حضراتكم) سواء على رجلك أو بالعربية بتلاقي تصرفات غريبة من الناس .. كبير وصغير .. راجل أو ست .. متعلم أو مش متعلم .. إلخ لحد ما حصل معايا موقف امبارح بالليل خلاني فعلاً أخرج عن شعوري .. ومحتاج النصيحة بجد أني اعمل ايه .

أنا ساكن في شارع ميسمحش العرض بتاعه إلا بعربية تكون راكنة وعربية تمشي من جنبها سواء داخل أو خارج من الشارع .. المهم فيه على ناصية الشارع محل فتح بقاله سنة أو أكتر لتأجير العربيات .. ما علينا .. وأنا مالي وربنا يفتح على الناس كلها .. لحد ما ابتدى من حوالي سته شهور قلة الأدب ابتدت تظهر على حق .. ابتدى صاحب المعرض ده كل يوم تجيله عربية سواء خرجة متأجرة .. أو راجعة من التأجير أنه يحطها على باب الشارع ويقفل بيها الشارع لا حد عارف يدخل ولا حد عارف يخرج .. وحصلت مشاكل كتيرة بينه وبين ناس في الشارع أو بره الشارع ببسبب الموضوع ده .. وحصلت مشكلة مع واحد صاحبي معاه .. وقال حقفل ليه المحل ده علشان البلطجةوقلة الأدب بتاعته دي .. وقعدت أهديه واقول ليه حرام .. ده أكل عيش وهديت الموضوع مع الطرفين .. واتفقنا أن لو حصل الموضع ده تاني واحد يقفل عليه من ورا بعربيته .. والتاني يقفل عليه من قدام علشان ميعرفش يخرج .. علشان يعرف أن الموضوع ده يضايق .. ولما يحس بيه ميعملهاش تاني .

المهم الواد ده (اسف على لفظ واد لأنه ميستحقش غير كده) كان كل ما يركن عربية على باب الشارع ويقفل الشارع بيها .. تيجي تروح تقول ليه العربية دي تبعك .. يقول ليك .. لا والله مش تبعي خالص .. وتفاجأ بعد كده أنها تبعه .. وأنه كان بيكبر دماغه .

لحد ما حصل امبارح أني وانا راجع أنا وأخويا لاقيت عربية (وأنا عارف أنها تبعه) راكنه وقافلة الشارع .. رحت واقف وراه بكل برود وخليت واحد يقف قدامه .. ورحت كام مشوار على رجلي ورجعت .. المهم لاقيت واحد جاري بيقولي انت موقف عربيتك كده ليه .. فحكيت ليه على القصة كلها من الأول .. قالي طب خلاص متعملش مشكلة انا حروح أكلمه بالهداوة ونحل الموضوع وأنبه عليه أنه ميعملهاش تاني .. قلت ليه حصلت كذا مشكلة ونتصالح ويقول مش حعمل كده ويرجع تاني .. المهم الراجل راح والطريف أن الواد ده من كلامه المستفز جاري اتخانق معاه .. وكانت حتبقى مشكلة كبيرة .. المهم رحت (لاني كنت واقف من بعيد تجنباً للمشاكل) لاقيته عاوزيتخانق معايا وبيقل أدبه (بدون داعي للدخول في تفاصيل كتيرة) والناس اتلمت وبقت مشكلة كبيرة .. أنا طبعاً العرق الصعيدي طق في دماغي والدم فار في نافوخي (مع أن والله الناس بتقول عليا هادي جداً لدرجة البرود في الموافق اللي زي دي وبعمل بحكمة القوي من تمالك نفسه عند الغضب) بس الواد كلامه فعلاً يخلي الحجر ينطق وعمال يقول أنا أعمل اللي عاوز أعمله ومحدش يقدر يعملي حاجة .. واللي مش عاجبه يخبط دماغه في الحيط .. لحد ما خلاني فعلاً عاوز أقتله (اقصد المعنى اللي بقوله والشيطان شاطر) http://www.nilemotors.net/Nile/image....gif:khd::khd: المهم الناس اتلمت حواليا .. وعمالين يهدوني .. قلت ليه طب خليك واقف بقى مش حخرجك يومين تلاتة .. وقلت في عقلي أنا بابلغ بوليس النجده واثبت حالة بالموضوع ده .. وهما يتصرفوا معاه علشان مصعدش المواضيع أكتر من كده والواحد دماغه مش ناقصة مشاكل .. المهم بوليس النجدة مجاش لغاية دلوقتي

المهم الناس قعدت تقول ليا عاوزين نخلص المشكلة .. وهو طبعاً هو عمال يزعق ويجعر ويقول أنا أعمل اللي عاوز أعمله واركن مطرح ما أحب على جنب أو في وسط الشارع زي ما انا عاوز وأنا حر محدش ليه حاجة عندي .. وشوية يبعت ناس من عنده يهدوا الموضوع ويعتذروا ويقولوا خلاص مش حتحصل تاني (تحس أنه بيضرب بالكلام ويلاقي) يعني يقعد يهلل ويبعت ناس تهدي .. بغرض أنه في الأخر يبقى عمل نفسه أبو الرجال ومحدش كسرله كلمه وبيهدي من بعيد في نفس الوقت (شغل ناس ..... تتتتتتتتتيت)

المهم فيه واحد كبير اتدخل في الموضوع وقالي معلش علشان خاطري وأنا رحت كلمته ومش حيعمل كده تاني .. وحيتعامل مع الناس اللي في المنطقة بذوق واحترام .. المهم أنا كبرت للراجل واديته مفاتيح العربية وطلعها علشان يطلع هو .

بعد ما طلع عربيته .. تفتكروا رد فعله ايه بعد ما كان ساكت وحاطط في بقه ميت جزمة وقاعد زي ... تييييييييت .. قعد يجعر تاني ويعلي صوته ويقول نفس الكلام تاني قلت للراجل شفت بقى أن الصنف ده نمرود .. طبعاً الراجل اللي عملتله خاطر بقى شكلة وحش .. وقال معلش أحنا أحسن منه وبيئتنا أحسن بكتير ومتنفعلش ....إلخ

قولولي بقى اعمل ايه في المشكلة دي .. لأني حاسس أنها بقت قضية بالنسبة ليا .. وازاي اقفل للواد ده محلة علشان يتعلم الأدب وأنه ازاي يصوت لقمة عيشه ويعرف ازاي يتعامل مع الناس اللي حواليه .. ولا اسكت وأفوض أمري لله http://www.nilemotors.net/Nile/images/smilies/dontudear.gif