المشاركة الأصلية كتبت بواسطة Ahmed Hamdy
أنا بصراحة رأيى ان العربية دى حتعتبر اختيار كويس جدا فى هذه الفئة السعرية .. بغض النظر عن ارتفاع سعرها ولكنه نفس الاعتراض الذى يسرى على كل السيارات أصلا فى السوق المصرى .. لكن سعرها يعتبر كويس جدا بالنسبة لأسعار السوق .. لان ايه الاختيارات المتاحة فى الفئة دى ؟؟
1- لادا: عربية خشنة ومش كل الناس بتتقبل شكلها.
2- سوزوكى ألتو: 800 سى سى وصغيرة والـ 1100 منها بقت بستين ألف.
3- شيفروليه سبارك: صغيرة جدا وقطع غيارها غالية.
4- برودوا كليسا: سيارة جيدة جدا لكن برضه صغيرة وغير منتشرة و1000 سى سى.
5- سبيرانزا 113: حلوة بس برضه هاتشباك وشنطتها صغيرة ومازال هناك ناس لا تثق فى الصناعة الصينية ومتخوفة منها.
6- اسبيرانزا 213: شكلها غبى جدا ولذلك لم تنتشر وتحقق مبيعات مثل أختها الصغيرة.
7- سيارات أخرى صينية لم تصنع سمعة جيدة مثل شيرى qq وجيلى.
وفى نفس الوقت العربية دى عربية مميزاتها ايه ؟؟
1- حجمها معقول وفيها شنطة معقولة (أنا بتكلم عن السيدان) يعنى عربية تنفع عائلية لان العربيات الهاتشباك الناس مش بتحبها لعيلة لعدم وجود شنطة.
2- فيها الكماليات الأساسية تكييف وباور وسنتر.
3- تكنولوجيا سهلة وممكن أى حد يشتغل فيها مش شرط التوكيل وأكيد حتكون قطع غيارها هى هى الكيا القديمة يعنى منتشرة وأسعارها كويسة.
يعنى اللى عايز عربية معقولة من ناحية الحجم والاقتصادية والراحة وبسعر معقول بالنسبة للسوق حيلاقى العربية دى أحسن اختيار.
وبالنسبة لموضوع الشكل قديم وتكنولوجيا قديمة والكلام ده لا ينطبق على سوقنا المصرى الذى تسرى عليه حسابات أخرى وإلا ما كانت سيارات مثل اللادا والشاهين و128 تنتج وتباع حتى وقتنا هذا .. لان المستهلك المصرى خاصة من أبناء الطبقة المتوسطة اللى يادوب قدر يجيب تمن عربية مش عايز عربية تكلفه كتير مصاريف صيانة وقطع غيار وتوكيل .. لذلك معظم الناس يفضلون السيارات التى يفهم فيها أى حد ولا تحتاج إلى التوكيل وقطع غيارها متوفرة فى المحلات وأسعارها معقولة .. وهذا المنطق هو الذى جعل هذه السيارات فى سوق المستعمل أسعارها غالية ولا تقل كثيرا عن الجديدة وسيارات أخرى أفضل بكثير مثل الرينو والسيتروين والألمانى أسعارها تقل كثيرا بسبب سمعة ان قطع غيارها غالية وهذا الكلام .. أنا لا أدافع عن هذا المنطق بالمناسبة ولكنى ألقى الضوء عليه فقط ..
لذلك أعتقد أن العربية دى حتنجح .. مش شرط يكون نجاح طاغى ولكن على الأقل نجاح جيد خاصة إذا كان الوكيل جيد وركز معاها ..