IslamGen2 تقييم ال 5000 كم

**AhmedGen2** · 31-12-2008 08:56 PM

السلام عليكم

ازيكوا يا شباب ، يارب تكونوا بخير...

تقييم ال 1000 كم

=======

تقييم ال 5000 كم:

العداد: 5026 كم
استهلاك البنزين بعد صيانة ال 1000 كم: 9.0 L/100KM
الاستهلاك حاليا ً: 6 L/100Km على الطرق السريعة ، 9.2 L/100Km داخل المدينة.
التقييم العام: ممتازة.

المميزات: مش محتاج أرغى فيها كتير مفيش عندى اضافة كله فل وتمام.

المشاكل الجديدة: فيه حاجات جديدة ظهرت واصوات وتكتكات والله انا خايف عالعفشة ، أصل انا طريقى كله اوتوستراد والطريق دة زفت فعلا العربية ولا كأنى فى زحاليق السبتية ، مطبات ونقر ومراجيح اركب الهوا

المهم ....

1- صوت تكتكة وطقطقة من تحت مع المطبات ، صديق ليا قاللى كبالن !!!
2- المالتى فانكشن بتعلق
3- السماعتين الشمال ساعات بيفصلوا لما آجى افتح الازاز ، حصلت مرتين ولازم اقفل وافتح الإزاز تانى عشان يشتغلوا.
4- العربية لما استلمتها منهم بعد الحادثة روحت لاقيت الإكصدام اللى ورا واللى قدام عاوزين يتربطوا كويس.
5- لمبة الشنطة مش بتشتغل.
6- الباركنج سنسور ساعات بيعلق ، يعنى تلاقى مثلا مفيش أى جسم بالخلف ، ومع ذلك تسمع تيييييييت متصلة ، بتحصل كتير.
7- الريموت مش شغال برضه ، يا إما انا مش عارف أكوده مع انى عملت زى مالناس قالت ، يا إما فيه حاجة فى البطارية وانا مش عارف اغيرها ، هروح بقى التوكيل وهما يتصرفوا.

ملاحظات:

1- استهلاك البنزين مش طبيعى داخل المدينة بيوصل ل 10 لتر رغم إن على الاتوستراد الاستهلاك بينزل من 5.5-6.0.

2- المؤشر لازم يتعمله ريسيت ، يعنى انا مثلا فى المدينة الاستهلاك بيوصل ل 10 لتر ، أطلع برة على طريق سريع الاستهلاك يقل نسبيا ل 9 مثلا ، إنما لو عملتله ريسيت وانا على الطريق السريع مش بيزيد عن 6.

3- كنت عاوز أعرف هو دلوقتى حجز الصيانة بقى بالتليفون؟ مفيش طابور انتظار وصحيان 6 الصبح خلاص؟.

*طريقة القيادة بتاعتى : بنقل قبل ال 3 مش بعديه ، وآخرى 110 ، الطبيعى 90 ، مستغرب اوى من الاستهلاك الغير آدمى دة ، يعنى انا أكبر تفويلة قعدت معايا 389 كم (+50 أصل انا بفول لما المؤشر يوصل للأحمر واللمبة تنور ويقولى فاضلك 50 كيلو) ، لكن العادى 350 كم بكبيره !! ، مش فاهم انا الناس بتقول إن الصفيحة 20 لتر بتقعد معاهم 350 كم ازاى؟؟؟؟؟

طولت عليكم معلش ... و Happy new year !!

سلام ..

**mino** · 31-12-2008 09:06 PM

تقييمك جميل
بالنسبه للمشاكل اللي عندك التكتكه دي متهيئلي هتحتاج تربيط عفشة
بقيت الحاجات التوكيل يظبطهالك في الضمان
استهلاك البنزين مش هفيدك فيه لانه عندي بيوصل 11 و 11.4 لان انا سواقتي كلها جوه البلد

عقبال صيانة المليون كم

**formoza** · 01-01-2009 10:23 AM

1- استهلاك البنزين مش طبيعى داخل المدينة بيوصل ل 10 لتر
2- المالتى فانكشن بتعلق
3- السماعتين الشمال ساعات بيفصلوا لما آجى افتح الازاز ، حصلت مرتين ولازم اقفل وافتح الإزاز تانى عشان يشتغلوا.

انا عندى نفس الكلام ده لاكن استهلاك الوقود من 10.2-10.4 لما بقرص على العربيه, و يريت اللى يعرف تصليح الكلام ده يتكلف كام فى التوكيل ياريت يفدنا

**tutankhamoun** · 01-01-2009 05:45 PM

السلام عليكم ورحمة الله وبركاته
تقييم جميل يا أستاذ إسلام و ربنا معاك في حل المشاكل إن شاء الله
زي ما الأستاذ مينا قال ... الأصوات في المطبات دي تحتاج تربيط عفشة إن شاء الله و الأصوات تروح
بقية الحاجات بسيطة بإذن الله تعالى و تتصلح في التوكيل و لو عندك أي شكوى كلم المهندس آمر و بأمر الله مشكلتك تتحل

إستهلاك البنزين ده طبيعي
يعني 10 لتر = 100 كم داخل المدينة ........ يعني 20 لتر = 200 كم .... ده أستهلاك كويس جدا لعربية 1600

و أنت عندك الأستهلاك على الطرق السريعة كويس .... امال شكوتك من أيه ؟؟؟
لو عايز توصل لمعدلات عالية في توفير البنزين
أتبع الآتي :
1 تحط بنزين 92 من محطة تكون نظيفة
2 تحط منظف رشاشات كل 1000 كم فيه منظف أسمه رابيدوا مصري الصناعة و ممتاز في نتائجة و رخيص الثمن و بيتباع في كارفور و أنا مجربه كتير و بجد ممتاز
3 متقرص على العربية في الطلعة .... يعني تسيبها تطلع براحتها
4 تغير عند 3000 أو 2800 لفة - دقيقة و تثبت عليها لفترة طويلة و أبقى قيس الأستهلاك
5 متنستناش لما التانك يفضى ..... كدا فلتر البنزين هايتسد أو تقل كفائته و هيأثر على الأستهلاك يعني يُستحسن تفول لما المؤشر يوصل للنصف و ليس لأخر التانك !!!!
و الإستهلاك سيكون إن شاء الله تعالى ما بين 280 إلى 320 كم لكل 20 لتر

و ربنا يباركلك في العربية

**AhmedGen2** · 01-01-2009 05:54 PM

المشاركة الأصلية كتبت بواسطة tutankhamoun

لو عايز توصل لمعدلات عالية في توفير البنزين
أتبع الآتي :
1 تحط بنزين 92 من محطة تكون نظيفة
2 تحط منظف رشاشات كل 1000 كم فيه منظف أسمه رابيدوا مصري الصناعة و ممتاز في نتائجة و رخيص الثمن و بيتباع في كارفور و أنا مجربه كتير و بجد ممتاز
3 متقرص على العربية في الطلعة .... يعني تسيبها تطلع براحتها
4 تغير عند 3000 أو 2800 لفة - دقيقة و تثبت عليها لفترة طويلة و أبقى قيس الأستهلاك
5 متنستناش لما التانك يفضى ..... كدا فلتر البنزين هايتسد أو تقل كفائته و هيأثر على الأستهلاك يعني يُستحسن تفول لما المؤشر يوصل للنصف و ليس لأخر التانك !!!!
و الإستهلاك سيكون إن شاء الله تعالى ما بين 280 إلى 320 كم لكل 20 لتر

متشكرين يا توت باشا .. هما فى الصيانة بيغيروا الفلتر وينظفوا الرشاشات؟ ولا استخدم المنظف دة وانا طالع افول بعد الصيانة؟.

**AhmedGen2** · 01-01-2009 05:56 PM

المشاركة الأصلية كتبت بواسطة formoza

1- استهلاك البنزين مش طبيعى داخل المدينة بيوصل ل 10 لتر
2- المالتى فانكشن بتعلق
3- السماعتين الشمال ساعات بيفصلوا لما آجى افتح الازاز ، حصلت مرتين ولازم اقفل وافتح الإزاز تانى عشان يشتغلوا.

انا عندى نفس الكلام ده لاكن استهلاك الوقود من 10.2-10.4 لما بقرص على العربيه, و يريت اللى يعرف تصليح الكلام ده يتكلف كام فى التوكيل ياريت يفدنا

الكلام دة بيتصلح فى التوكيل ببلاش على ماعتقد ، انت بتدفع فى الصيانة.

المشاركة الأصلية كتبت بواسطة mino

تقييمك جميل
بالنسبه للمشاكل اللي عندك التكتكه دي متهيئلي هتحتاج تربيط عفشة
بقيت الحاجات التوكيل يظبطهالك في الضمان
استهلاك البنزين مش هفيدك فيه لانه عندي بيوصل 11 و 11.4 لان انا سواقتي كلها جوه البلد
عقبال صيانة المليون كم

شكرا يا جميل...

**M.Nabil** · 01-01-2009 06:21 PM

الف مبروك يا باشا وعقبال صيانة ال 1000000 وربنا يحافظلك عليها.
بس في سؤال هي اللمبة بتنور بتاعة البنزين امتي؟ لما المؤشر يبقي قريب من الصفر ولا لما يوصل للصفر ويبتدي يستهلك الاسبير, علشان انا عندي نسيت امون وكان المؤشر قرب جدا على الصفر واللمبة منورتش.

**AhmedGen2** · 01-01-2009 06:32 PM

المؤشر بينور لما تعدى حاجز ال 50 ، انت عندك عداد الديجيتال بيعرض عدد الكيلومترات المتبقية ، لما يكسر ال 50 بتنور على طول ، والتانك بيكون فيه حوالى 6 لتر.