مقارنة الجين 2009 بباقى موديلات السنوات السابقة

**ahmedsiyam** · 19-01-2009 09:46 PM

السلام عليكم

اخوانى الاعزاء

انا كنت فى موضوع سابق وضحت فيه انطباعاتى عن قيادة موديل 2009 و اعتقد ان الحكم كان سطحى شوية لانها تجربة قيادة عبارة عن ربع ساعة

المرة دى هاحاول اتعمق شوية لانى باسوق العربية بقالى فترة ونتعمق فى تفاصيلها اكتر

الموتور :
بالنسبة للموتور لان ده اكتر حاجة بتهم الناس و هو ده التغيير الجذرى اللى حصل
ياجماعة الموتور الـ iafm افضل واحسن من الكامبرو العادى انا يمكن قولت قبل كده انه مافيش فرق كبير بس بعد لما سوقتها لفترات طويلة شايف ان الفرق افضل على السرعات المتوسطة و القليلة و العربية صوتها انعم و اهدى من الاول
برضه اخدت رايى واحد من الاصدقاء اللى ركبوا معايا العربية كتير قبل كده و الفرق واضح و اخد باله منه
اضيف ان استهلاك البنزين يبدو انه احسن من الطرازات القديمة و ان كانت العربية لسه عاملة 270 كلم بس باين اوى ان استهلاك البنزين اقل بس حاجة بسيطة و من المتوقع انه يبقى افضل بعد كده

الصالون :
خامات الصالون اتحسنت الى حد ما عن الموديلات السابقة
تغيير سقاطة مسوجر الابواب و ايضا المقبض الداخلى
الفرش احسن من القديم ( بس موش الفرق الرهيب يعنى )
وجود ردج فى التابلوه ( ماكانش موجود قبل كده )
وجود مساحة تخزين اضافية على جانبى الكونسول الامامى
مكانين اكواب بين الكرسيين الامامين ( كانت واحدة بس قبل كده )
وجود حامل اكواب للركاب فى المقصورة الخلفية
تم نقل وحدة التحكم فى الزجاج الكهربائى المرايات الجانبية الى باب السائق و بصورة افضل مع اضافة زر قفل سنتر السيارة ( علشان خاطر العيال و الحركات الخايبة بتاعتهم اللى بتوقع القلب )
بمجرد ادارة المحرك و الضغط على دواسة الفرامل يغلق السنتر الابواب فورا و يعاد الغاءه بمجرد تبطيل المحرك
تم تغيير شكل العدادت ( القديمة احلى طبعا )
الغاء الساعة الموجودة على التابلوه ( مع انها كانت شيك اوى )
الفتيس الاوتو حركته انعم بكتير و شكله اصبح افضل بمراحل عن القديم
الغاء مثبت السرعة فى موديلات الاوتو
الغاء جراب النظارة الخاص بالسائق
الاوديو افضل من القديم فى الصوت بنسبة طفيفة و اضافة امكانية تشغيل ملفات mp3
الوان التابلوه اغمق من القديم ( حلوة بصراحة )

اجمالا مع وجود تحفظات بسيطة الا انهم من وجهة نظرى وفقوا تماما فى تحسينات الصالون واصبح افضل من الموديلات السابقة

الشكل الخارجى :
التغيير ظاهر للجميع باضافة السبويلر و ايضا تغيير الجنوط و الشبكة الامامية و خلفيات مصابيح الاضاءة الامامية

باقى الكماليات زيى ماهى و العربية نفس الاداء المعتاد من ثبات و قوة و تصميم رياضى ملفت و راقى
طبعا لا تخلو العربية بقى من شوية حاجات بسيطة زيى صوت فى العفشة وراء و هبد فى الشنطة و طقطقة خفيفة فى التابلوه و كله يتحل ان شاء الله

بالمناسبة العربية لونها ميتال جراى اوتو موديل 2009 مستلمها من كام يوم و ياريت نسمع كلمة مبروك

**khela_7000** · 19-01-2009 10:19 PM

الف مبروك و ربنا يباركلك فيها

**AhmedGen2** · 19-01-2009 10:19 PM

مبرووووووك يا باشا بجد ألف مبروك ... عندى سؤال هى العدادات لونها اتغير للأزرق؟ بصراحة انا الأورانج عندى احلى بكتير !!

ربنا يحفظهاااالك يا رب

**adel1414** · 19-01-2009 10:20 PM

الف مليوووووووون مبروك ويارب يكفيك شرها

**khpopo** · 19-01-2009 11:30 PM

الف مبرووووووووووك ابو صيام :10D5C8~1107: يامفاجاتك الجميلة ربنا يملها ليك بركة ويديك خيرها وتعجبك وتريحك عن القديمة انشاالله :k8: بس الطقطقة وراك وراك لكن العربية ماتسابش مش كدةةة الله ينور ويحفظهالك ويحفظهالنا جميعا جين 2 الجميلة

**Busquets** · 19-01-2009 11:35 PM

ايه دا غيرولك العربية؟؟؟

الف مبروك و انت كدا بجد مثال لعدم اليأس

ششكرا ليك و الف مبروك

**momenhamdy** · 19-01-2009 11:37 PM

استاذ احمد الف الف مبرووووووووووووووووووووك
و ربنا يديك خيرها و يكفيك شرها و ان شاء تكون قدم الخير علي حضرتك
و انا والله يوم الاربعاء حخلص امتحانات و حكلم حضرتك و اباركلك علشان انت عارف انا كان نفسي ربنا يكرمك و تغير القديمة
ربنا يوفقك يا استاذ احمد حضرتك راجل محترم و تستاهل كل خير ......

**ahmedsiyam** · 19-01-2009 11:40 PM

مشكورين يا رجالة على شعوركم الطيب و مشاركتكم الجميلة

الاخ اسلام
لا العدادت لونها برتقالى زيى ماهى
العداد اللى فى توقيعى ده بتاع البروتون الساتيرا

**M.Nabil** · 20-01-2009 12:25 AM

الف مبروك يا استاذ احمد, ربنا يباركلك فيها ويكفيك شرها.
كده ضمنا مزيد من التقييمات المؤثرة والمهمة.

**hamada_sivo** · 20-01-2009 12:37 AM

ا.احمد الف مبرووك يا باشا والله انا فرحتلك جدا لانى كنت متابع موضوع حضرتك و بجد كنت اتمنى ان حضرتك تمتلك جين2 بظروف احسن و إن شاء الله تفضل مبسوط منها دائما يارب ...
و احب اقول ان حضرتك فعلا خير مثال على مؤيدى الجين2 لان بعد كل الحصل حضرتك اخترتها مره تانيه ... بجد 100% ...