ظبط زوايا واتزان للبيتلز

**ابوهاشم** · 26-01-2009 10:58 PM

عربيتى كنت حاسس انها مخنوقه من الكوتش واول مااجى اطلع احس زكأنى ماشى على رمل وزلط والعجل قافش وبعد مااعدى سرعة 80 الاقى العربيه مش ثابته خالص المهم روحت لواحد بتاع ظبط زوايا واتزان وترصيص فى القلعه بص فى العربيه وقاللى انت عاوز تغير طقم بيض وافيز ميزان روح غيرهم وبعدين تجيللى اظبطلك
سالت على القصه دى لقيتها هتتكلف حوالى 300 جنيه غير المصنعيه
روحت النهارده للحاج محمد على وشرحتله الموضوع ده بص فلى العربيه وقعد يضرب كف على كف وقاللى البيض سليم
ومافيهوش حاجه وقاس العجل اكتشف ان العجله اليمين قدام مرحله شمال
وقاللى هى عاوز بتاع ظبط زوايا واتزان كويس قولتله طيب رشحلى حد تعرفه قال هنا مافيش
ولما قولتله انا جايلك من المعادى ومشوار صعبت عليه
قاللى هعملهالك انا وفعلا نزل عمللى العجله وقاللى كده تمام
خد منى 20 جنيه بس ومشيت وحسيت ان العربيه فاقت جدا
وبقت كويسه والحمد لله بس على ماوصلت المعادى لقيت العجل بيصفر مش عارف من ايه فضل يصفر شويه وبعدين راحت الصفاره ياريت لو حد عنده فكره عن سبب التصفير ده من العجل يقوللى وانا حبيت اشرح الحكايه دى للافاده وفى نفس الوقت يبقى موضوع خاص بظبط الزوايا والاتزان والترصيص للبيتلز

**ahit** · 26-01-2009 11:24 PM

السلام عليكم و رحمه الله و بركاته

فعلاً يا أستاذ/ هاشم ... لما بيكون العجل مرحل و العربية عاوزة ظبط زوايا بتحس إن العربية بتعافر فى المشى و تحدف منك و لما تكون محتاجة ترصيص بتحس بغربلة جامدة بعد 70 أو 80 و هكذا .
و ظبط الزوايا و الترصيص مهم جداً عشان الكاوتش ما يحصلوش تآكل بسرعة و كمان زيادة الإحتكاك بالأرض بيسحب بنزين كتير.

* الراجل بتاع ظبط الزوايا اللى فى القلعة ممتاز و إن شاء الله هاعدى علية و أجيبلكم تليفونه و عنوانه بالتفصيل فى أقرب وقت.

و الحمد لله إن الحاج/ محمد على لخص الموضوع و ظبط المسائل.
و أنا أعتقد إن الصفارة دى بتكون بسبب إن العربية محتاجة ظبط زوايا و دا بيبان أكتر وصوت الصفارة بيكون عالى فى المنحنيات و الملفات لما بتكسر الدريكسيون و يمكن باقى الأعضاء يفيدوك أكثر منى إن شاء الله.

و ربنا يباركلك يا أستاذ/ هاشم ... على طرح و فتح المواضيع الهامة لمصلحة أصدقاء و عشاق و ملاك البيتل.

**أحمد سالم** · 27-01-2009 04:37 AM

طبعا كلام الاستاذ احمد حسن مظبوط 100/100
لاكن احب اضيف عليه انه ممكن يكون الحاج محمد عمل رجلاش للفرامل فبقت قريبه من الطانبوره علشان كده بتصفر لان تيل الفرامل ممكن يكون متأكل ولو الموضوع كده هتبقى الحكايه دى بتحصل بعد ماالعربيه تسخن شويه مع الجرى والمشكله دى ممكن تروح لوحدها او نقلل شويه رجلاش الفرامل

**ابوهاشم** · 27-01-2009 01:08 PM

اشكركم جدا على ردكم
فعلا الصوت قل معايا مش بقى يظهر غير تقريبا فى المنحنيات السريعه مع الفرامل وانا بالفعل هروح تانى لبتاع ظبط الزوايا علشان اشوف هيعمل ايه واذا كانت عاوزه ترصيص ولالا
وعلى فكره الراجل ده مكانه فى القلعه بع السنترال بحوالى 100 متر وهو معروف هناك بس مش متذكر اسمه حاليا
ان شاء الله لما اروحله تانى هجيب الكارت بتاعه

**El.Hossieny** · 27-01-2009 01:47 PM

جزاك الله خير يا هاشم باشا علي المعلومات القيمة ... و مستنين عنوان مركز ظبط الزوايا

**ahit** · 28-01-2009 05:48 AM

المشاركة الأصلية كتبت بواسطة hashem1999

اشكركم جدا على ردكم
فعلا الصوت قل معايا مش بقى يظهر غير تقريبا فى المنحنيات السريعه مع الفرامل وانا بالفعل هروح تانى لبتاع ظبط الزوايا علشان اشوف هيعمل ايه واذا كانت عاوزه ترصيص ولالا
وعلى فكره الراجل ده مكانه فى القلعه بع السنترال بحوالى 100 متر وهو معروف هناك بس مش متذكر اسمه حاليا
ان شاء الله لما اروحله تانى هجيب الكارت بتاعه

مستنيين النتيجة يا أستاذ/ هاشم

شكراً

**ابوهاشم** · 01-02-2009 12:49 AM

السلام عليكم
يوك الخميس اول امبارح وانا ماشى فى المعادى فوجئت ان صوت الصفاره رجع تانى وذاد جدا وبصراحه انا خوفت وطبعا وانا مروح فى طريقى لقيت واحد بتاع ظبط زوايا فى شارع احمد ذكى بجوار البنزينه
اسمه طلب الدخاخنى لظبط الزوايا والاتزان والترصيص
ركنت قدامه وقولتله عاوز اظبط زويا لان العربيه بتصفر من العجل الامامى قاللى استنى دورك وفعلا استنيت وانا واقف سالت الناس اللى قبلى فى الدور عن الراجل ده قالوللى انه كويس جدا وفعلا بدأ الشغل فى سيارتى هو عنده 3 صنايعيه هما اللى بيشتغلو وهو قاعد ماسك دفتر
بيسجل فيه رقم السياره ونوعها والموصفات الفنيه وايه اللى عملو فيها
وبيديلك صوره من التقرير الفنى للشغل اللى اتعمل عندك ومكتوب فيه ان
ليك مراجعه عنده على السياره فى خلال اسبوع انا حسيت انى عند دكتور
المهم هما ظبطو الزوايا والاتزان فعلا والحساب كان 25 جنيه وانا قولتلو بص كمان على الترصيص
وفك العجلتين اللى قدام وجربهم عنده واكتشفنا ان فى عجله منهم كان فيها رفه جامده جدا وهى دى اللى كانت بتحدف منى فى الفرامل ومكتفه العربيه فى الحركه تم ترصيص العجلتين ب20 جنيه يعنى الحساب كله 45 جنيه هو غالى حبتين بس الحمد لله العربيه اتظبطت وفاقت والصفاره راحت تماما
وانا ماشى قاللى جرب العربيه ولو زودت السرعه على 120ك ولقيت فى غربله يبقى عاوز ترصيص للعجلتين اللى ورا كمان
طبعا انا مابمشيش اساسا على السرعه دى
ملحوظه
انا لقيت على ظهر التقرير الفنى اللى معايا شويه تنبيهات مطبوعه
مكتوب متى تأتى الينا
1-عند انحراف السياره اثناء السير فى اى اتجاه
2-عند عومان العربيه
3- عند تغيير اى جزء من اجزاء العفشه
4-عند تغير الكاوتش جديد او مستعمل او عند تأكله
5-عند سماع صوت صفير للعجل فى المنحنيات او سماع صوت الكاوتش على الاسفلت

**ahit** · 01-02-2009 02:31 AM

لقيت واحد بتاع ظبط زوايا فى شارع احمد ذكى بجوار البنزينه
اسمه طلب الدخاخنى لظبط الزوايا والاتزان والترصيص

السلام عليكم و رحمة الله و بركاته

شكرا يا أستاذ/ هاشم ... على التوضيح و إن شاء الله تكون عربيتك دلوقتى أحسن من الأول و يباركلك فيها.
و يا ريت العنوان بالتفصيل و رقم التليفون عشان كلنا نستفيد و نعرف نروحلو لو عزناه.

شكراً

**El.Hossieny** · 01-02-2009 12:26 PM

اسمه طلب الدخاخنى لظبط الزوايا والاتزان والترصيص

يا ريت يا هاشم باشا لو عنوانة بالتفصيل عشان انامعرفش الحتة دي اوي... لو ممكن توصفلي من الاوتوستراد ؟؟

و باين عليه راجل كويس و صنايعي .... يا مسهل

**ابوهاشم** · 02-02-2009 12:37 AM

حاضر ان شاء الله بكره هجيبلكم عنوانه وتليفونه
وعلى فكره النهارده انا سافرت بالعربيه ولسه راجع من شويه
وماشاء الله عليها

الموضوع: ظبط زوايا واتزان للبيتلز

LinkBack

أدوات الموضوع

عرض

ظبط زوايا واتزان للبيتلز - انشر الموضوع فى :

-

-

-

-

-

-

المواضيع المتشابهه

طقم شمبر للبيتلز

ايه انسب زيت للبيتلز

ظبط زوايا واتزان وتربيط العفشه

زوايا مطلوب واحد بتاع زوايا وعفشجي كويسين

تعديل للبيتلز

الكلمات الدلالية لهذا الموضوع

المفضلات

المفضلات

ضوابط المشاركة