بولو قلقاني

**ssherbieny** · 14-07-2009 01:13 PM

شوية مشاكل قلقاني محتاج رأي الخبراء في المنتدى المحترم
اشتريت بولو موديل 97 1300 سي سي فاضية مانيول المشاكل الاتي
1- بتاكل بنزين 160 كيلو في الصفيحة داخل البلد وبالعافية 190 خارج البلد
2- العفشة انا سواقتي زفت بس مش معنا كده ان العفشة والكبالن تفك كل 10 ايام
3- الميكانيكي عرفت من المنتدى اللي في جسر السويس محمد سمير لما سألت اصحاب الجولف معارفي قالو بيتنك على الناس وشايف نفسه بيه وانا مش عايز اضيع وقت
فبرجاء الافادة اعمل ايه ابيعها تاني واخلص واشتري شعبي من اللي الناس بتركبه وخلاص

**mobinil** · 14-07-2009 05:43 PM

ظبط الكاربيراتير والعفشة وهات قطع غيار أصلية إستعمال من الحرفيين أو جديدة من فتح الباب وإنشاء الله تتبسط منها..

**ahit** · 14-07-2009 08:48 PM

البولو عربية ممتازة
بالنسبة لإستهلاك البنزين لو العربية إنجيكجن يبقى الرشاشات عاوزة تتنظف و لو كربراتير يبقى عاوز يتنظف و يتظبط و ممكن تكون طريقة السواقة هى اللى بتأثر على الإستهلاك عنك.
و بالنسبة للعفشة ممكن تكون المسامير ناعمة و مش كويسة و عاوزة تتغير بأخرى خشنة و أصلية و طبعاً قطع الغيار الأصلية مهمة زى ما قال العضو Mobinil

**M.Mostafa80** · 15-07-2009 11:20 AM

بص العربيه دى محتاجه شويه مصاريف بسيطه وهتبقى زى الفل زى مقال حبيبى واخويا احمد غير مسامير العفشه عشان ممكن تكون ناعمه
وهاتلك كربارتير استيراد أو فى واحد متخصص كاربيرترات فى امبابه روحلو يظبطهولك وبعد كدا هتلاقى دنيا تانيا وعايز اقولك لو مشيت مع العربيه دى زى ما فولكس بتقول عمرك ما هتكرهها ومش هتضيقق لكن لو مشيت ورا فتى الميكانيكه و استرخاص قطعه الغيار يبقى ماينفعش تلوم غير نفسك لو حاسيس ان حاجتها الأصليه هتبقى غاليه عليك يبقى بيعها واركب هيونداى أو لانوس

**casper2010** · 15-07-2009 12:53 PM

بص انا العربية دي معايا من 2 سنة , مغلباني كل شوية و مستني ابيعها في اقرب فرصة
مشاكلها كتير و دا من سوء الصيانة و الأستخدام للعربيات دي ... انا كان معايا 127 قبلها و كانت بتشيلني اكتر من دي بكتيير .. بس طبعا البولو اكتر ثبات و قوة و اجمل و اكبر ....

**umoussa** · 15-07-2009 02:26 PM

شوف يا عزيزي،

العربية محتاجة طقم صيانة علشان تظبط معاك
يعني طقم دبرياج وبوجيهات وأسلاك بوجيهات غير الفلاتر

الوحيد الي عنده قطع غيار أصلية وتخدها وانت مغمض هو أشرف الشهابي وبعديه التوكيل وإن كان التوكيل في قطع غيار مضروبة

باقي المحلات بتاعة السوق قطع الغيار الي عندها كالتالي:
1. أنواع رخصية بجودة سيئة
2. أنواع مضروبة في علب أصلية
3. أنواع بديلة

إوعى تجيب أي قطعة غيار جديدة من الحرفيين كله ضرب مفيش أصلي. كله ضرب ومتعبي في علب أصلي.

لو تحب تجيب العربية في الورشة عندي أتفضل نكشفلك عليها كلها وتعرف فيها إيه

**ssherbieny** · 16-07-2009 12:02 AM

الف شكر على النصيحة ويا ريت عنوان الورشة عند حضرتك ورقم الموبيل

**ssherbieny** · 16-07-2009 12:05 AM

فعلا انتم ناس خبرة ومحترمين
فعلا مسامير العفشة كانت خربانه وخربت كوبان وغيرتهم تقريبا مشكلة العفشة اتحلت
اما استهلاك البنزين لا هيا الميكانيكي بيقول انها رشاشات زي السينا وانها ملهاش ظبط يعني مش كربراتير وانا حاسس انا ده كفته

**M.Mostafa80** · 16-07-2009 01:14 AM

[QUOTE=ssherbieny;963691]فعلا انتم ناس خبرة ومحترمين
فعلا مسامير العفشة كانت خربانه وخربت كوبان وغيرتهم تقريبا مشكلة العفشة اتحلت
اما استهلاك البنزين لا هيا الميكانيكي بيقول انها رشاشات زي السينا وانها ملهاش ظبط يعني مش كربراتير وانا حاسس انا ده كفته[/QUOTE
عربيتك لو 1300 يبقى دا كفتجى مش ميكانيكى