الموضوع: هل تؤمن بمقولة ((انا باشتري ماركة و مش مهم بلد المنشأ)) أم لا

المشاركة الأصلية كتبت بواسطة Ahmed Samy

لا والله ياريس ...
عقدة الخواجة دي معناها ايه
ان فيه مفهوم دفين جوانا اننا مانقدرش نعمل زي الخواجة لمجرد أنه خواجه ...

و ده قطعا خطأ

مش لمجرد أنه خواجه ...

احنا ما نقدرش نعمل حاجة كويسة لأن الصانع المصري فيه ميزتين مفقودين تماما

الذكاء و الضمير

و الاتنين بيصبوا في اتجاه واحد

انه يهمه يكسب دلوقتى كام و ملعون أبو بكره
تلاقي الخامات السيئة و التقفيل مش الردئ ..المعفن
و السعر (سبحان الله ) تلاقيه مش مناسب للسلعة
اللهم الا بعض الماركات و منها "العربي" مثلا و :"الهلال و النجمة"

انا مش باقوول رأيي ده اعتباطا كده ..لا و الله

أنا وحتى سنتين فاتوا كنت مشجع للصناعة المصرية بأي ثمن و تحت أي عيب فيها من منطلق اننا لازم نساعد الناس دي علشان تقدر تقف على رجليها و تحسن أداءها و تعمل تحسينات وطنية خاصة عليها في سبيل الوصول لماركة مصرية أصيلة

و اكتشفت بعد تجارب عديدة و تفكيك أجهزة و اتلاف ادوات كثيرة

ان العيب مش في القوة و لا الإمكانيات

العيب في الضمير

و العيب لما ييجي في الضمير ...يبقى انسى

انا مش هاساند حد و ادفع مليم أنا و بيتي و أولى بيه علشان اساند واحد مخوخ من قلبه

بالعكس
أنا المفروض أكون مستهلك محترم و أحترم الصانع الي بيحترمنى و يديني سلعة كويسة ولو بثمن مرتفع


و علشان تعرف مثل للتجربة
انا و أنا باجهز اشتريت كل حاجة في البيت مصرية الصنع تقريبا و اشتريت أغلى الطرازات علشان ماحدش يفتكرني باستخسر في بيتي و علشان أرضي نفسي برضه

و مازلت حتى اليوم استبدل الأجهزة قطعة قطعة بسبب عيوب قد تكون صغيرة ..لكنها تكسف و تقرف

أتمنى أكون وصلت الفكرة

طبعا فكرتك وصلت يا دكتور
ووجه نظرك مطابقة لافكار كتير من الناس اللي خايفة علي البد بجد
وانااايدك فيها
لكن لا تنسي ان السبب الاول هو التعليم السئ والجامعات البايظة واللي بتخرج خريجين غير اكفاء

بالاضافة الي ان اصحاب رؤس الاموال كلهم بوشين
يعني مثلا نفس المصنع تلاقيهبيطلع نوعين من البضاعة محلي وتصدير
وتلاقي بضاعة التصدير اكفا وامتن واحسن كتييييييييير واللي يجنن انها في نفس التكلفة تقريبا وده عن خبرة شخصية مع اكتر من مصنع

ولما تساله وتقوله طب ليه متعملش كل شغلك كده يبتسم ابتسامة بلا معني وميردش
ولما تضغط عليه وتحاوره يرد باحدي الاجابات التالية

1- وانا اقرف نفسي ليه يا بيه؟
2- انا معنديش مواصفة محلي انما الدولي بتشترط عليا كذا وكذا او يقولك المواصفة المحلي تسمحلي (وفعلا بيكون عندهم حق بسبب فقر المواصفة المحلية)
3- انت عايز تخرب بيتنا؟ امال الناس حتكسر امتي وتغيير امتي؟ انا لازم ابيع يا باشا ولو البضاعة عاشت عند الزبون سنة حنكسب ازاي؟؟
4- سلو بلدكم كده
5- الزبون عايز الحاجة رخيصة

طبعا انا جمعت الاجابات اللي اعتبرتها من وجهة نظري منطقية
لكن كلها تدل علي استهتار بالمستهلك المصري وتسيب السوق وغياب الرقابة وفقر القوانين
يعني باختصار احنا عيشين في مولد وصاحبه غايب

المشاركة الأصلية كتبت بواسطة Ahmed Samy

يبقى الأفكار تتقاطع في ان الأسباب في تردي الصناعة المصرية هي :
1 - عدم وجود مواصفات محلية قوية
2 - عدم وجود أمانة في التصنيع (بسبب عدم وجود مواصفات صارمة بالطبع)
3 - عدم وجود خبرات علمية جادة بسبب ضعف مؤسسه التعليم
4 - عدم وجود مستهلك قوي يعرف أن له حقوقا ليبحث عنها من جودة و عمر افتراضي و سعر


احنا كفاية هنا بقى و نعمل مشروع موضوع جديد يناقش النقاط دي ومن أهمها التعليم العالي و التعليم الصناعى و المهني في مصر

نتقابل للتجهيز على الخاص أو msn

طب متيجي نلخصهم للنصف
1- عدم وجود مواصفات محلية قوية
2 - عدم وجود أمانة في التصنيع (بسبب عدم وجود مواصفات صارمة بالطبع)

1+2= غياب المواصفات القياسية العصرية وقوانين التجارة الحرة

3 - عدم وجود خبرات علمية جادة بسبب ضعف مؤسسه التعليم
4 - عدم وجود مستهلك قوي يعرف أن له حقوقا ليبحث عنها من جودة و عمر افتراضي و سعر (نتيجة الجهل بالحقوق وقلة المعرفة بسبب ضعف التليم ايضا)

3+4 = ضعف مستوي التعليم في كل مراحله وانخفاض جودته


وبالتالي تكون قضيتنا في نقطتان

1- المواصفا القياسية والتوحيد القياسي ورقابة الجودة والقوانين المتعلقة بالتجارة الحرة
2- التعليم وجودته وتطوره وعصريته بكل مراحله وفئاته