الموضوع: ما هى إجراءات تسجيل شركة و إستخراج بطاقة إستيرادية؟؟

المشاركة الأصلية كتبت بواسطة aratux

أحمد باشا, تسلم إيدك
بس كام إستفسار كدة يا باشا
1- السجل التجارى بيطلع بعد البطاقة الضريبية, أروح فين علشان أضيف رقم السجل التجارى للبطاقة الضريبية؟؟
2- مستخرج السجل التجارى, ينفع يطلع فى نفس اليوم و انا باعمل السجل؟
3- الضريبة على المبيعات, مش دى بتتعمل بعد ما مبيعاتى تعدى رقم معين؟؟ 100 ألف جنيه تقريبا؟
4- الإجراءات دى هية نفسها لو أنا مش عامل سجل تجارى؟؟ (مؤهلات عليا يعنى زى ما قولتوا فوق؟؟)

بص يا سيدي
1 - بعد ما تطلع البطاقة الضريبية مش ح يكون فيها رقم السجل .... فيه خانة مكتوب عليها رقم السجل التجاري .... اكتب الرقم بأيدك .... او روح المأمورية ح يكتبوهولك ..باليد .... ولو انت كنت طلعت ورق الغرفة التجارية والسجل بخطاب من الضرائب قبل ما تستلم البطاقة .... يبقى لما تيجي تستلم البطاقة بعد 10 ايام او اسبوعين ممكن تديهم صورة من السجل و يضيفو رقم السجل عند استلامك للبطاقة
2 مستخرج السجل بعد السجل ما يتعمل بيوم او يومين لأنة بيطلع كمبيرتر و لازم يكون السجل نزل في الحاسب .... ولازم تراجع البيانات بدقة والاسماء والنشاط و لو فيه غلط بيتعدل وانت واقف
3 - نشاط الاستيراد من الانشطة اللي لازم تتسجل فيها من الأول... يعني مالهاش حد تسجيل .... ومش ح يطلعولك بطاقة استيراد من غير ما تسجل مبيعات
4- ما ينفعش تعمل بطاقة استيراد من غير سجل تجاري .... حتي لو معاك دكتوراة من جامعة شكلبونيا
وجود مؤهل عالي بيخفض المبلغ اللي بيطلبو بيه شهادة من البنك الي 15000 بدل 20000 يعني الدراسة دي كلها تسوي في نظرهم 5000 .... والله يا بلاش
.....
اهم حاجة ... ما تنساش لما تستلم البطاقة الاستيرادية ..... تتشاهد وتحمد ربنا ....
وتتنطط وتقول ايييييه ؟؟
يا حلولي يا حلولي :k36:
بس اوعى حد يشوفك .... أحسن يسحبو منك البطاقة
وبالتوفيق
شوفت بقى المحاسبين والمحامين بيتعبو قد ايه

المشاركة الأصلية كتبت بواسطة aratux

أه و الله
ربنا يكون فى عونكم
ده أنا قربت أصرف نظر بسبب طول الإجراءات دى

بس فعلا إنتوا فوق كاتبين إن مش لازم سجل تجارى للبطاقة
راجع أول رد جالى فوق



و يا حالولى يا حالولى

اولا مش انا اللي كاتب ....
ثانيا انت فهمت الكلام بشكل مختلف ....
المقصود ان لو عندك سجل تجاري سابق .... يعني لو عندك شركة او نشاط تجاري قبل كدة ... ممكن تطلع البطاقة الاستيرادية علي السجل القديم بشروط معينة .... وكدة يبقى مش لازم تعمل سجل جديد ....فدة بيبقى اختصار لبعض الاجراءات
لكن في جميع الاحوال .... لازم يكون فيه سجل تجاري ... سواء قديم او جديد
على فكرة اللي انا قلته لك ده في حالة النشاط الفردي ... لو شركة الاجراءات بتزيد عن كده كتير
ولازم تكون مش بتعمل في الحكومة او القطاع العام
.... وما تنساش... ح تقول ايه لما تخلص الإجراءات ....؟؟؟؟