حد يفيدني علي الجراند بونتو

**loodaa** · 12-02-2009 01:45 PM

انا معايا 70الف وبدور علي عربية كويسة تتسع لخمس افراد فلقيت البونتو كلاسيك ولكن لقيتها صغيرة وموتورها 60 حصان. وفي اوماترا شوفت الجراند بونتو وعجبني شكلها جدا والتقفيل والصناعة جيدة, بس ب 90000 فأنا عايز أعرف هل تستحق ال90 الف ولا لأ علما باني أسمع أنها كانت ب110 ألف و وكمان موتورها 77 حصان فهل دة صغير ولا ايه. أرجوا المساعدة من اللي جربها ومشا بيها او اشتراها. ولو في بديل بنوع تاني احلي منها وبنفس السعر او اقل ياريت يقولي لأني ماقدرش ادفع أكتر من 90 ألف وشكرا.

**loodaa** · 12-02-2009 05:12 PM

فين يا جماعة عصابة الفيات أو اي حد جرب الجراند بونتو

**فادى** · 12-02-2009 06:48 PM

الجراند بونتو سيارة رائعة شكلا و موضوعا, و لها شهرة عالمية و سمعة جيدة على كل الأصعدة,
الموتور ال77 حصان جيد جدا, هو مصمم أساسا للمدن, يعنى هتلاقى الأداء عصبى و قوى على السرعات المنخفضة للمحرك, لكن عيبه انو مش هيساعدك على طرق السفر بشكل كبير,
بمعنى انك هتلاقى التسارع قل على السرعات العالية ما فوق ال120, و غالبا هيبدأ الاختناق بعد ال140 كلم/ساعة مثلا, و هيبقى سرعته القصوى 160 او 170.
النوع ده من المحركات له عزم مميز, و عمره اطول من المحركات الأخرى, و قوى فى حالات التحميل و ممتع فى القيادة.
و عموما العربية صغيرة, فى فئة البولو و الابيزا يعنى مش محتاجة أكتر من كده.
و فيه نسخة تانية تى جيب على ما أعتقد 120 حصان, بس هتبقى اغلى شوية.

**loodaa** · 13-02-2009 11:49 PM

بس برضه ما قولتليش هل تستحق 90 ألف ولا استني يمكن الاسعار ترخص ولا اشوف السكودا فابيا خصوصا بعد ما بقت ب89 ألف. عايز اعرف برضة ايه عيوب الجراند بونتو لو حد جربها. أرجو الرد عشان الموضوع ده مهم جدا بالنسبة ليا.وحاجة كمان أنا سمعت ان توكيل فيات في مصر سيء للغاية وان قطع الغيار غالية وما بتكونش موجودة فهل اكمل في الجراند ولا اعمل زي باقي الناس واخليني في الافيو هو السكودا.

**فادى** · 14-02-2009 02:35 AM

المشاركة الأصلية كتبت بواسطة loodaa

بس برضه ما قولتليش هل تستحق 90 ألف ولا استني يمكن الاسعار ترخص ولا اشوف السكودا فابيا خصوصا بعد ما بقت ب89 ألف. عايز اعرف برضة ايه عيوب الجراند بونتو لو حد جربها. أرجو الرد عشان الموضوع ده مهم جدا بالنسبة ليا.وحاجة كمان أنا سمعت ان توكيل فيات في مصر سيء للغاية وان قطع الغيار غالية وما بتكونش موجودة فهل اكمل في الجراند ولا اعمل زي باقي الناس واخليني في الافيو هو السكودا.

فى رأيى هى تستحق,
موضوع تشترى ايه, فأنا رأيى انو شراء السيارة زواج حب لا زواج عقل, يعنى لازم تكون حابب العربية,
لو بتحب العربية اشتريها و توكل على الله, هى عربية كويسة من شركة كبيرة,
السكودا منافس قوى ليها, لكن ربما تكون الجراند بونتو أكثر متعة فى القيادة.
الأفيو دون المستوى فى رأيى من ناحية الاعتمادية و الأداء.

**casper1500** · 14-02-2009 05:07 AM

الأفيو دون المستوى فى رأيى من ناحية الاعتمادية و الأداء.

مظنش يا باشا الافيو دون المستوى من ناحية الاعتمادية
اما الاداء اظن الافيو سحبها اقوى

**loodaa** · 14-02-2009 06:06 PM

أيوة بس أنا ابن خالتي بيقولي خليك في السكودا عشان منتشرة وكده وان توكيل الفيات اسوأ توكيل في مصر و قطع الغيار مش حالاقيها بس أنا عاجباني العربية. معلش أعزروني بس أنا والله تعبت من التفكير فيا ريت تقولولي على عيوبها ولو حد جرب توكيلها و أماكنه فين في اسكندرية.

**nnff909909** · 15-02-2009 01:06 AM

انا زيك بالضبط محتار بينها وبين الفابيا
حقولك الفرق الفابيا
صاجها اتخن حسب كلام الوكيل
وكمان فيها نظام لغلق البنزين عند الحوادث
وفيها تلاجة تحت التابلوه
والمتور والجيربوكس مصفحين
وفيها فوج لايت
وقطع غيارها ارخص
وضمانها احسن
86 حصان
موتور فولكس الماني

البونتو فيها نظام توزيع الفرامل اي بي دي
البونتو فيها نظام سماعات متصل بالبلوتوث
البونتو فيها زراير تحكم على الدريكسيون
البونتو فيها نظام قيادة السيتي حاجة كدا في الباور

**nnff909909** · 15-02-2009 01:08 AM

البونتو أحسن مليون مرة من الافيو ... لأن الافيو زيرو أمان
في حين البونتو واخدة 5 ستارز في اختبار التصادم

**loodaa** · 15-02-2009 02:11 PM

البونتو واخدة 5 ستارز في اختبار التصادم وأظن فيها فوج لايت في حين ان مايهمنيش التلاجة تحت التابلوه أما بالنسبة للمتور والجير بوكس فمش فاهم يعني ايه مصفحين وهل توكيل الفيات اسوا توكيل في مصر ولا ايه. وياريت تقولي رسيت على ايه في اختيارك.