الموضوع: رايى فى حملة خليها تصدى و التخفيضات هتوصل لغاية ايه - بدون زعل

الاخ اللى فتح الموضوع مش مستحمل ردود - لما جنابك مش همك اراء بتبدء بمهاجمة الغير ليه !!!!!!!!!!!!!!!!!!!

اولا انا طبعا همى اسمع الاراء بس انا ماهجمتش الغير اساسا و انا طبعا عادى اسمع اى رد بس ردود محترمة بس يعنى مش عايز ناس مش محترمة داخلة تشتم و خلاص و اساسا هى مش فاهمة حاجة فى اى حاجة علشان كدا قولت هرد على الردود المحترمة بس سواء اللى رايها زى رايى او اللى مختلفة تماما عن رايى , كل واحد حر فى رايى بس يعبر عنه باحترام زى معظم الناس اللى ردت هنا.

أكبر دليل على ان العربيات هترخص إن السعر الحالى أكتر من السعر فى بداية 2008, بالرغم من ان مفيش أى سبب لزيادة الأسعار فى نهاية 2008 عن أولها, علشان كدة أقل شئ إن الأسعار لازم توصل لنفس مستوى الأسعار فى بداية 2008, وده على الأقل نسبة 10 % على الأقل, وكمان لما تضيف لها اى نسبة نزول الموضوع كدة هيكون نسبة نزول معقولة جدا.

انا شايف طبعا ان الاسعار لسه هتنزل كتير فى رايى الشخصى بس الفكرة هتوصل لايه هو دا السؤال و بالمناسبة الاسعار دلوقتى اقل بكتيير اوى من 2008 و 2007 فى تقريبا كل المركات ماعدا كام مركة زى مرسيدس مثلا.

بالنسبة للمهندس سمير , عايز اشكرك على ردك المحترم جدا و خصوصا طريقة الرد و على فكرة احنا مش مختلفين فى الراى بالعكس انا كمان شايف ان اللى حضرتك قلنه دا اهم بكتييير اوى من تخفيض سعر العربية بمعنى لما التوكيل يتعهد انه يقبل يدخل الخليجى مراكز الصيانة و بنفس اسعار العربيات التانية و كل وكيل يتعهد انه يعمل test drive لجميع الموديلات و ينزلوا اسعار الصيانة و قطع الغيار المبالغ فيها جدا و مواصفاتها و خدمات ما بعد البيع كلها مش هيقدروا يلغوا الكلام دا بعد الازمة بمعنى التوكيل مش هيقدر يقول انا رجعت فى كلامى و الخليجى خلاص مش هيخش و هلغى الtest drive , اما انخفاض الاسعار فهى كدا كدا هتنزل جامد اوى بسبب الازمة مفيش كلام انما انا متاكد انه بعدها هيزود الاسعار تانى لو كل حاجة رجعت زى الاول و الناس ابتدت تشترى تانى.
يعنى فعلا الكلام اللى حضرتك قلته دا مهم جدا و طبعا انا متفق عليه.

تقبل تحياتى...و ارجو انك ماتزعلش من صراحتى زى مانت قلت فى عنوان الموضوع...

استاذ badry , اولا انا متشكر على اسلوب الرد المحترم دا و انا مش زعلان بالعكس انا مبزعلش خالص من اى حد بيخالفنى فى الراى , بيداقنى بس طريقة رد بعض الناس.
بالنسبة ليه انا كتبت الموضوع دا بالذات دلوقتى و خصوصا بعد هيونداى و منصور ما نزلوا الاسعار , انا قاصد التوقيت دا لان غبور نزل اسعار عربيات كتير اكتر من 15% زى الالنترا و السوناتا و من منصور السبارك فى رايى الشخصى سعرها بقا مناسب و خصوصا لما الياريس اللى هى فئة اقل بكتير اوى من الالنترا بقت اغلى منها بكتير و الياريس ارخص من الانترا كتير بره مصر , دى السوناتا بقت ارخص من الكورولا !!
انا فى رايى الشخصى ان سعر الكذا عربية دول مناسب اوى بس فى رايى الشخصى برده الناس متشتريش علشان الوقت مش مناسب اطلاقا للشراء و رايى الناس متشتريش علشان انا حاسس انهم هيقللوا الجمارك او هيعملوا عروض اقوى بكتير.
السبب انى كتبت الكلام ان الحملة مش موضحة الاسعار لازم تنزل لفين و يا ترى لما تنزل الناس تشترى و لا لأ , و دا اساس الموضوع , ازاى نعرف السعر مناسب و لا لأ؟

سبب انى مقولتش خليها تصدى و موديلها يعدى فى اخر الكلام انى مش مقتنع بالحملة من الاساس الى اسمها خليها تصدى و موديلها يعدى بس لانى شايف ان الهدف هيحصل لوحده طول فترة الازمة منغير الحملة لان الناس مش غبية و هى شايفة لوحدها الاسعار كل يوم بتنزل و شايفة ان فى ركود و خايفة تضيع السيولة اللى معاها فكدا كدا هما مقاطعين الشراء و بعد ما الازمة تعدى سواء كان فى حملة او مفيش الناس هتجرى تشترى عربيات عادى و التوكيلات هتزود الاسعار عادى و ترجع كل حاجة تانى زى الاول.
اللى انا مقتنع بيه اننا لازم نقاطع شراء العربيات دلوقتى و مش مهم ان توكيل يفلس لانه هو اللى جابه لنفسه بمبالغته فى هامش ربحه و اسعار صيانة و قطع غيار اكتر باضعاف تمنها بره.

"هى مش عارفة اساسا الجمارك على العربيات كام فى المية , اساسا الرقم دا غلط لان الجمارك حسب الcc بتاع العربية
طيب هى على اساس ايه قالت ان اسعار العربيات فى مصر مبالغ فيها لما هى مش عارفة الجمرك كام؟"

أولاً متوسط الأسعار إلسيارات1600 جمركها ٤٠٪ و ١٥٪ و ٢٪
ونقدر نقول بين ٦٠٪ ل-٦٥٪ بشكل تقريبي


كمان ليه حضرتك موجهتش كلام بشكل شخصي لها عل جروب

و كمان هي مغلتتش يعني عشان اثمها بالجهل يعني إنت تجاهلت حاجات كتير و بتتكلم على ٥٪ فرأ و بات جهلة

اولا انا مش فاهم ليه اخش و اكلمها بشكل شخصى , هو انا اعرفها علشان اخش و اكلمها ؟ بعدين اخش اقولها ايه؟؟
انا اساسا مزمتش فيها و لا قلت عليها جاهلة , انا قلت ان معلوماتها عن العربيات قليلة (يعنى انا مثلا معلوماتى عن الكورة قليلة و جاهل فى الكورة دى مش حاجة تعيبنى خالص او الbasketball مثلا ) اكيد مش كل واحد خبير فى كل حاجة .
بس مدخلتش عملت حملة قلت يلا نبنى الزمالك من جديد و انا مليش فى الكورة , طيب هى مش عارفة الجمرك كام , هى بتتكلم على ال c-230 و الz4 و دول جماركهم + الضرائب فوق ال220% لانهم فوق ال2000cc.
حتى لو كانت بتتكلم على ال1600 , طالما هى مش عارفة بالظبط الجمارك كام حكمت ازاى التوكيل مبالغ فى سعر العربية و لا لأ؟؟
للعلم التوكيل لو مبالغ مزود بتاع 10% بالكتير اوى عن سعر بره (بتكلم فى العربيات اللى لحد 300الف جنيه ) لما 5% متفرقش امال احنا بنقاطع ايه , احنا بنقاطع علشان بنزل ال10% دول و ينزل شوية بسبب الازمة.
بعدين للعلم هى مش بس مش عارفة الجمارك كام بالظبط فى كذا حاجة و تقدر تقرا ردودها و احكم بنفسك.

بعدين بوضح تانى انا مش بنتقدها بالعكس انا بقول كفاية انها حاولت .


مي

ن قال أن مؤسسة الحملة بنت ؟؟ كلام خاطيء تماماً مؤسسي الحملة رجال وصاحب جروب الفيس بوك شاب وهو ليس بالشرط مؤسس الحملة ولا صاحب فكرتها مع أن دة مش موضوعنا بس فقط لمجرد التوضيح

شكرا على ردك برده بطريقة محترمة , لو حضرتك شوفت على الfacebook هتلاقيها admin و هى اللى فاتحة مواضيع كتير اوى و بترد على الناس علطول يعنى ازاى مش مؤسس؟؟

كل اللى انا قلته و بقوله تانى , اولا لازززم نقاطع و لازم حتى لو مش مقاطعين منشتريش خوفا على السيولة اللى معانا على الاقل
2-الحملة لازم يكون لها هدف قابل للتحقيق مش هدف خيالى (زى تخفيض الاسعار 50% دا خيالى) و لازم تكون فعالة بمعنى يبقى فى اتصال بالتوكيل و لازم التوكيلات تعرف المطالب الظبط و تعرف ان لما تحقق المطالب دى الناس هتنزل تشترى يعنى كلام رجالة و لازم تعهد على التوكيلات باحترام العميل و اعادة تسعير كل قطع الغيار و عدم المبالغة بعد كدا و السماح للخليجى بالصيانة و الtest drive زى بقية دول العالم كدا يبقى دى حملة بجد لها هدف و بكدا نطلع كسبانين.
اما اللى عايز اسعار العربيات تنخفض يريح دماغه لا حملة و لا يحزنون اللى هتنزل الاسعار , الازمة المالية لوحدها كفيلة بان الاسعار تنزل هنا فى مصر كل شوية لوحدها لان الناس معهاش سيولة او خايفة على السيولة و البنوك مبنديش قروض يعنى موضوع التخفيض مش محتاج حملة , الحملة معناها التوكيلات لازم تتعهد بحاجة و تنفذها على طول مش وقت الازمة بس.

معلش يا جماعة الرد بياخد وقت كتير و انا بكتب فيه فادونى يوم واحد علشان تعبت من الكتابة
هرد على شخص واحد بس دلوقتى علشان اسلوبه فهرد عليه رد سريع

ليه التيوتا الكرولا الهاى لاين اللى كانت ب 162 الف 2008 نازله دلوقتى 2009 ب152 الف و لسه القصراوى عنده 2008 عارضها ب 150 الف

طيب طالما الجمارك ما نزلتش ليه الكرولا الهاى لاين رخصت 10000 جنيه رغم ارتفاع الين زى مل بيقولوا

علشان فى ازمة مالية شديدة و الناس مبتشتريش اى حاجة و فى ركود شديد فهمت؟
التوكيل اكيد خفض فى هامش الربح بتاعه
اللى انا اعرفه كمان و مش متاكد 100% منه ان التوكيل بيستورد الكورولا بالدولار مش بالين لانها مستوردة من جنوب افريقيا و مدير تويوتا فى مصر كان بيقول ان اليابان عملت دول فى قارات معينة للتصدير للقارات دى بسبب ارتفاع الين فالتالى معتقدش الدول دى هتصدر بالين و الا الموضوع مش هيبقى له لزمة.
كدا كدا حتى لو بيستورد التوكيل يقدر يخفض من مكسبه ال10000 جنيه دول و يفضل كسبان كمان عادى جدا , لو مكسبه 15% يبقى كسبان فوق ال20 الف جنيه فى العربية لما يخفض 10 منهم يبقى لسه كسبان برده.
و تقريبا دا سبب ارتفاع الياريس لانها يابانى 100% و انخفاض الكورولا

و بعدين الحمله طلعت فى التليفزيون و انت لأ يمكن متغاظ علشان كده

من فضلك احتفظ بالفاظك دى لنفسك, شوف بقية الناس رديت ازاى ردود محترمة بهدف المناقشة و الافادة و الاستفتفادة ملهاش لزمة الالفاظ اللى زى متغاظ دى.

اول لما اخلص الرد هكتبه علطول و شكرا يا جماعة مرة تانية على اسلوب الكتابة المحترم