الموضوع: رايى فى حملة خليها تصدى و التخفيضات هتوصل لغاية ايه - بدون زعل

للعلم يا جماعة انا مش تاجر و لا وكيل سيارات و لا لى اى علاقة بالمجال دا و نفسى فعلا توكيلات كتير تخسر جامد او تفلس فى الازمة دى بسبب المبالغة الشديدة فى الأسعار و هوامش الربح اللى مبقتش هامش خالص , دى بقت نسبة كبيرة من تمن العربية.

بس فى رايى الشخصى سبب امتناع الناس عن الشراء مش حملة خليها تصدى اطلاقا بالعكس انا شايف ان الحملة ملهاش اى لزمة و مش هتعمل اى اثر لاننا مصريين.
سبب امتناع الناس عن الشراء هى ضعف السيولة اللى حصل لناس كتييير جدا و خسارة ناس كتير فى البورصة و الكلام اللى الناس بتسمعه عن ان سنة 2009 سنة سوداء و الله اعلم الازمة دى هتعدى امتى و يا ترى الامور هترجع زى الاول و لا خلاص .
يعنى سبب امتناع الناس عن الشراء فى رايى 4 حاجات
1-انخفاض السيولة مع بعض الناس و تسريح بعض الناس من العمل و توقف معظم الشركات عن التعيين
2-محاولة الناس للاقتصاد فى الاصراف لحد الازمة المالية متعدى و محاولة منهم يستنوا يشوفوا الازمة هتعد شهور و لا سنة و لا سنتين و لا اكتر علشان يعرفوا يصرفوا و لا لأ لان لو الناس صرفت الفلوس و الازمة استمرت سنين هيعيشوا طول السنين دى فى ضغط مالى.
3- حتى اللى معاه سيولة و مش بيفكر لقدام علشان يعرف الازمة هتعدى و لا لأ بياجل قرار الشراء لمعرفته ان الاسعار هتقل يوم بعد يوم و لو اشترى هيندم و ان العروض اللى التوكيلات بتقول عليها لفترة محدودة هى غالبا لفترة طوييييلة جدا لحد برده كل حاجة ما تبان.
4- البنوك اللى قللت او امتنعت عن الاقراض و 60% من السوق بيعتمد على الاقساط فطبيعى يحصل ركود شديد.
احنا كمصريين للاسف مش زى الشعوب الاوروبية المحترمة نقدر نقول احنا مقاطعين منتج علشان سعره غير منطقى بالمرة و مبالغ فيه , لأ احنا بندفع و احنا ساكتين علطول.
لازم نعرف ان حملة خلوها تصدى على الfacebook دى فى رايى تهريج اساسا لان مؤسسيها واحد و واحدة و هى متعرفش حاجات كتير عن العربيات و اللى خلانى اقول كدا ان واحد سالها سؤال اجابته سهلة جدا معرفتش ترد و ردها يدل على انها معندهاش معرفة بمجال السيارات و الموضوع دا فكرنى بفلم رامى الاعتصامى لما كام واحد قاعدين فاضيين يقولك نعمل حملة على الfacebook.
لازم اللى يعمل حملة يعرف فعلا الاسعار بره نزلت كام فى المية بالظبط و فى اوروبا و اسيا بالذات بعيدا عن امريكا لان السوق الامريكى ارخص سوق فى العالم كله فى كل حاجة لانه اكتر سوق استهلاكى فى العالم , يعنى لازم يبقى فى معلومات و بيانات عند الناس اللى هتعمل الحملة دى مش يلا كدا على الfacebook و السلام.
حاجة تانية , 10000 واحد دا رقم قليل جدا فى بلد عددها 80 مليون , قول 3-6 مليون منهم بس هم القوة الشرائية اللى تقدر تشترى سلع زى العربيات (الارقام من خيالى , معرفش القوة الشرائية فى مصر كام), 10000 دا رقم قليل جد و دا عدد الناس اللى دخلت و اشتركت فى الحملة دى على الfacebook.

عموما الايام هتثبت ان كلامى صح (ان شاء الله ) مع انى نفسى يطلع كلامى غلط و نطلع لاول مرة فى حياتنا ايجابيين بس انا متاكد ان مش دى الحالة هنا
الاثبات اول ما الازمة تعدى ان شاء الله سواء بعد شهور او سنين هتلاقوا الاسعار نطت تانى اعلى من الاول فى مصر و كل حاجة رجعت تانى عادى الا لو الاقتصاد العالمى مرجعش تانى زى الاول و البورصة مرجعتش تانى ل 12000 نقطة و البترول مرجعش تانى لفوق ال100 دولار للبرميل.

اما بالنسبة للناس اللى بتقول نشترى دلوقتى ولا نستنى
فى ناس بتقول لازم نستنى الاسعار تنزل ل 40-50% , احب اقول للناس دى هتستنوا طول العمر بس مش اكتر لان عمر الاسعار مهتنزل بالشكل دا.
للعلم رسمى توكيل مرسيدس و Bmw و فولكس فى المانيا زودوا اسعار العربيات بسبب الازمة المالية و افتح بنفسك و اتاكد من موقع الشركات نفسها بس الفكرة انهم بيبيعوا عند الموزعين باسعار ارخص بكتير عشلان يعرفوا يصرفوا العربيات الكتير اللى انتجوها بالفعل.

فى رايى الشخصى الانخفاض المعقول فى الاسعار هى 20-25% للعربيات الاوروبى و 10-15% للبقية بالكتير اوى اوى الا العربيات المبالغ فى سعرها فى الاساس ممكن تنزل اكتر زى الالنترا غبور كان زودها من 92 الف لاول فئة مانيوال ل 104 الف فى الفترة من اول 2007 لنص 2008.
اكتر من كدا معتقدش انه ممكن الا فى حالة انخفاض الجمارك او الضرائب.

فى رايى الشخصى لو الازمة دى هتستمر لاكتر من سنة يبقى الاسعار اللى سمعناها من غبور دى و غيره هتقل اكتر اما لو مش هتستمر فمعتقدش هتقل كتير.

لحد دلوقتى معظم التوكيلات لسه منزلتش تخفيضات محترمة الا كام عربية بس.
بس فى نفس الوقت لازم الواحد ميطمعش و يفتكر ان الاسعار هتنزل 40% و اللى بيقول انها هتنزل 40% عايزه يجيبلى بلد واحدة بس اسعار العربيات نزلت فيها 30% حتى ماعدا امريكا و العربيات الامريكانى لان امريكا ليها ظروف خاصة لان فائض العربيات اللى فيها ضخم جدااااااااا يعنى مثال لو المبيعات انخفضت 50% فى مصر و التوكيلات استوردت 10000 عربية يعنى مركون فى الميناء 5000 عربية اما فى امريكا لو انخفضت 50% برده التوكيلات هتستورد بدل 10000 عربية مليون عربية و بالتالى المخزون اللى هيبقى فى الميناء هو نص مليون عربية علشان كدا لازم يخلصوا منهم باى طريقة , امريكا بتستورد عربيات اكتر من كتير من دول العالم مجتمعين مع بعض.

يعنى فى رايى الشخصى فى عربيات سعرها بقا ممتاز دلوقتى بس برده انصح الناس مشتريش دلوقتى الا لما كل حاجة تبان و تحافظ على السيولة اللى معاها لان حتى الاسعار لو منخفضت مش هتزيد فى الةقت الحالى.

الى محتاج يشترى ضرورى ممكن يشترى من العربيات اللى سعرها بقا مناسب بس غير كدا منصحش .
كمان محدش يتخدع مثلا بانخفاض سعر الفكترا و الاوكتافيا الA5 القديمة لان العربيتين دول كمثال نزل منهم الموديلات الجديدة و الِA5 الجديدة نزلت مصرفتخفيض التوكيل 10-15% دا قليل لان العربية بقت قديمة خلاص و اليورو لوحده نزل 15% يعنى التخفيض ال10% دا معناه ان التوكيل مقللش هامش الربح مجرد قلل فرق اليورو و كسب اكتر كدا يعنى.
كل واحد ياخد باله ان اليورو كان ب 8.4 و دلوقتى بقا ب 7.1

خطورة الشراء فى الفترة دى حتى لو العروض ممتازة حاجتين
1- لو الزمة استمرت اتوقع الحكومة تنزل الجمارك و الضرائب على السيارات المجمعة محليا لان المصانع دى هتوقف الانتاج و تطرد العمال بسبب ارتفاع التكلفة و مفيش بيع , انا اتوقع ان الحكومة هتساعد المصانع و بالتالى لو شالوا الجمارك او الضرايب سعر العربيات دى هيقل جامد , كمان لو اللوجان نزلت من المغرب بسعر 50-60 الف هتموت اللانوس و الفرنا و الاسبرنزا و الFRV وكل العربيات اللى فى السعر دا زى السبارك و الحاجات دى العربيات دى فمعتقدش ان اصحاب التوكيلات و خصوصا اللى عندهم مصانع هيسكتوا .
2- الشراء بيدى التوكيلات سيولة و بيخلصوا من العربيات اللى مركونة فى المخازن و الموانى وموديلات 2008 اللى لسه مش عارفين يبيعوها فبالتالى هيبقى معاهم فلوس و مش هيخفضوا تانى او على الاقل الاسعار هتستقر كدا