الموضوع: انت تسأل وإستشاري منتدى متسوبيشي يجيب (2)

المشاركة الأصلية كتبت بواسطة meromar

السلام عليكم باشمهندس طارق..كنت عاوز اسال حضرتك على فلتر الهوا اللى الشباب كلها عمالة تتكلم عنة دلوقتى وبيركبوة فالماتور بمساورة ستانلس وانا شوفت على اليوتيوب بردو متركب فالانسر شارك زى بتاعتى ..هل حضرتك الفلتر دة ضرورى للعربية الزيرو يعنى اروح اشترية واركبة وحيفيد العربية ولا هى تقليعة طلعو فيها الشباب وموضة بس..وسؤال تانى لحضرتك هل الشارك سبورت الكاملة اعلى فئة فيها مخرج Aux ولالا وشكرا جدا لمجهوداتك

بالتأكيد هو مش ضروري للعربية وتركيبه يخرج بره الضمان (للجزء ده من المحرك يعني اذا حصل ضرر من تركيبه فمش هيتصلح في الضمان)

هو كابل Aux في الكتالوج من كماليات العربية انما مش عارف بيركب فين لأن مفيش ظاهر في السي دي مخرج له ، ربما يكون موجود في السي دي الركفورد اللي بينزل مع الكويتي

المشاركة الأصلية كتبت بواسطة aratux

مهندس طارق
ممكن أعرف ثمن سير كاتينة للانسر 2002 مانيوال كاملة 1300 سىسى؟؟
و تكلفة تركيبه كمان و بياخد وقت قد إيه؟
لإنى بافكر أعمله يوم السبت اللى جاى ان شاء الله

سير الكاتينة بالمصنعيات يعمل حوالي 1100 جنيه (لكن بدون باقي صيانة الثمانين الف كيلو)

ياخد حوالي 4 ساعات

يفضل بلاش يوم السبت لأنه زحمة جدا انما لو ضروري السبت يبقى الافضل تحجز للسبت اللي بعده وتيجي بدري يومها علشان تمشي بدري

المشاركة الأصلية كتبت بواسطة barrii

لم تهتم بالرد شكرا

لأ ابدا مش مسأله لم اهتم بالرد بس احيانا ائجل الرد على سؤال شوية لما اروح الشغل وبعدين يتنسي .. ارجو المعذرة

الزيت اللي في الكتالوج بنقوم باستيراده من اليابان مع طلبيات قطع الغيار لكن بكميات محدودة لا تكفي الاستهلاك الفعلي والسبب ان قوانين البلد تمنع استيراد زيوت لها بدائل تصنيع محلي
وشركة ميتسوبيشي اقرت استخدامنا لزيت شركة موبيل ATF واحنا بنستخدمه في التوكيل نفسه عندنا في قليوب وجسر السويس معظم الوقت لأن زي ما قلت الزيت المستورد بيخلص علطول لأن كميته قليلة وعلى فكرة السعر واحد تقريبا بين المستورد وبين زيت موبيل يعني مش بنوفر ولا حاجه

بخصوص الرواسب فده مفهوم متوارث موجود عند المصريين ان ماكينة الشفط بتترك الرواسب وان الافضل منها الطبة من تحت لكن قبل ما نجيب ماكينة الشفط كانت كمية الزيت المتغيرة خمسة لتر فقط وبعد ما اشتغلنا بماكينة الشفط (منذ عدة سنوات) اصبحت كمية الزيت المتغيرة تسعة لتر وهي اجمالي الكمية كلها شاملة الرواسب فاطمن من الناحية دي

المهم بس الزيت يتغير في ميعاده كل 40 ألف

المشاركة الأصلية كتبت بواسطة mady2007

أنا معايا عربيه لانسر كريستاله 98 1300CC وأنا طالع الصبح يعنى والعربيه باردة ببقى جايب الd بحس بنتشه فى العربيه وبعدين لمبه ال n بتنور وتطفى وال d منورة وبيكون السحب ضعيف
لكن بمجرد ان العربيه بتسخن وبمشى بيها شويه كدة وبطل العربية وأدور تانى العيب يروح ولو صادفت ومارحش بشيل كابل البطاريه وأستنى 5 دقايق وأركبه وأدور يروح العيب ومايرجعش تانى الا لو العربيه بردت.
وروحت التوكيل بتاع عبد الخالق ثروت وكشفوا على الفتيس بالكمبيوتر وقالو كله تمام والفتيس سليم بس لما روحت كان العيب راح من العربيه يعنى كشفوا عليها والعيب كان راح لكن تانى يوم كانت العربيه بردت والعيب رجع تانى
مع العلم انى لسه عامل طقم سرفيس قريب ماكملش 1000كم وبعدين العيب دة ظهر فجأ بدون أى مقدمات،،، أنا أسف ان كنت طولت بس انا شرحت اموضوع كله علشان انا مش عارف اعمل ايه

ارجو الانتظار للسبت هاسأل وارد عليك

المشاركة الأصلية كتبت بواسطة mady2007

أنا معايا عربيه لانسر كريستاله 98 1300CC وأنا طالع الصبح يعنى والعربيه باردة ببقى جايب الd بحس بنتشه فى العربيه وبعدين لمبه ال n بتنور وتطفى وال d منورة وبيكون السحب ضعيف
لكن بمجرد ان العربيه بتسخن وبمشى بيها شويه كدة وبطل العربية وأدور تانى العيب يروح ولو صادفت ومارحش بشيل كابل البطاريه وأستنى 5 دقايق وأركبه وأدور يروح العيب ومايرجعش تانى الا لو العربيه بردت.
وروحت التوكيل بتاع عبد الخالق ثروت وكشفوا على الفتيس بالكمبيوتر وقالو كله تمام والفتيس سليم بس لما روحت كان العيب راح من العربيه يعنى كشفوا عليها والعيب كان راح لكن تانى يوم كانت العربيه بردت والعيب رجع تانى
مع العلم انى لسه عامل طقم سرفيس قريب ماكملش 1000كم وبعدين العيب دة ظهر فجأ بدون أى مقدمات،،، أنا أسف ان كنت طولت بس انا شرحت اموضوع كله علشان انا مش عارف اعمل ايه

انا سألت مهندس الاستقبال عندنا في مركز الخدمة الرئيسي في قليوب وقال انه ده غالبا حساس الفتيس انما هيتم تحديد المشكلة بالظبط لما يتم توصيل العربية بوحدة تحليل الأعطال (جهاز الكمبيوتر MUT)

يا ريت تشرفنا في قليوب في اي وقت يناسبك (بدون حجز) وهيتم الكشف على العربية وتحديد المشكلة

المشاركة الأصلية كتبت بواسطة rady

أنا معايا شارك 2008 وللأسف الشديد اتحكت حكة كبيرة جدا في النصف العلوي من باب السائق ، وأيضا الباب محتاج سمكرة ، كنت عاوز أعرف في هذه الحالة ما هي التكاليف (المتوقعة على الأقل ) لسمكرة الباب ، وأيضا هل يتم رش الباب لوحده أم كل جانب السيارة ؟ ، وما هي التكاليف المتوقعة للرش أيضا ؟

اهلا يا استاذ راضي
بسيطة باذن الله لكن واضح من كلام حضرتك ان العربية مش متأمن عليها ، بخصوص السمكرة لا يمكن تحديدها الا بالمعاينة انما هتكون في حدود معقولة اما الدهان فهو 375ج+10% ويتم دهان الباب فقط وسعر الدهان بشكل عام يحدد بالقطعة فالباب قطعة والرفرف قطعة والسقف يعامل بسعر قطعتان وهكذا
عموما حضرتك شرفنا في مركز الخدمة الرئيسي في قليوب ومهندس السمكرة والدهان هيعاين العربية وانت واقف ويقول تتكلف كذا سمكرة (معاينة مجانية) وحضرتك تحدد عاوز تعملها او لأ ولو عاوز فالمهندس هيحدد فترة العمل حسب ظروف الشغل عنده

المشاركة الأصلية كتبت بواسطة sherif0333

استاذ طارق انا معايا شارك 2008 كنت عملت صيانة الاف فى 1-1-2009 لما استلمت العربية بعد الصيانة لقيت مكتوب فى شاشة الكمبيوتر ان الصيانة القادمة بعد 9000 كيلو و دة منطقى او ثلاثة اشهر و دة اللى انا مش فاهمة المهم ال3 شهور خلصو و دلوقتى الكمبيوتر كل شوية يكتب ميعاد الصيانة الدورية ..دلوقتى انا المفروض اعمل اية بالظبط ..دلوقتى لو رحت التوكيل مفيش اى حاجة تتعمل فى العربية و فى نفس الوقت لية لما رحت التوكيل و عملت صيانة الالف عملو العداد كدة ؟؟؟؟؟

هو بعد الألف الأولى الكمبيوتر بيقول الصيانة بعد 9000 لأن موعدها عند 10 آلاف ثم بعد كده يقول بعد 10 آلاف كل مرة اما موضوع التلات شهور فده الفاكتوري سيتنج factory setting للكمبيوتر اعتقد ممكن يتغير بالظبط عندنا (ربما اليابان شايفة ان الـ 10 آلاف تتعمل في 3 شهور طالما ان الضمان 100 ألف كيلو او 3 سنوات.. مجرد استنتاج) عموما متقلقش منه

عموما انا هاتناقش مع مدير الصيانة في الموضوع ده وافهم منه السيتنج بيسمح بتغيير الفترة ولا لأ