الحمد لله اشتريت الميجان ملاحظاتى وما لا نعرفه عنها(الموضوع قديم)

**د.محمود صلاح** · 15-09-2007 04:20 PM

* ممكن فى أضيق الحدود تضع بنزين 87 اوكتان - كما ذكر بالكتالوج -
* الباور الكهربائى يعمل حتى لو الموتور واقف - اضغط على زر start - بعد وضع الكارت بدون الضغط على دواسة الفرامل لمدة 5 ثوانى ستجد الدركسيون تحرر وكذلك عصا الفتيس وستجد الباور يعمل وكأن العربية شغالة !! ( احذر ان هذا قد يؤدى لتفريغ شحن البطارية )
* المقبض المدور فى الجانب الأيمن لكرسى السائق يقدم ويؤخر بطن الكرسى لملئ المنطقة القطنية فى ظهر السائق
* فى حالة عطل النظام ( هنج ) بحيث زر الغلق ( start / stop ) لا يطفى السيارة اضغط على نفس الزرار 5 مرات متوالية ستنطفئ السيارة ( من الكتالوج ) - حدث معى حيث عبثت بالزراير بصورة متكررة سريعة أدى الى الحالة السابقة -
* لا بد من تركيب دلايات بالسيارة لأنها تتسخ بالاتربة والطين مما قد يجرح الدهان - جزء كبير من العجل الخلفى خارج الاكصدام الخلفى مما يوجب تركيب دلايات

**د.محمود صلاح** · 17-09-2007 11:49 PM

رحت التوكيل الميكانيكيون العرب ووجدت الاتى
سعر الكوبلن ب 2000 جنيه غير الضرايب والنركيب
سعر وش السلندر 7 الاف جنيه
سعر العمرة الكاملة على حسب بس اعمل حسابك فى 15 الف جنيه
سعر الانذار الاصلى الذى يعمل مع الكارت 1850 جنيه
سعر اعادة الباج 6 الاف جنيه
الضمان سنتينن او 40 الف كم على الشكل القديم سواء 2006 او 2005
سينسور الاطارات ب 1900 ج
سعر الاعلان فى اهرام الجمعه ملحق السيارات 10 كلمات ب 175 ج والوسيط ب 60 ج

**وائل عطية** · 18-09-2007 09:41 AM

أستاذ محمود
إيه اللي حصل؟؟!!
أنا شايفك عامل إعلان لبيع العربية في منتدى البيع والشراء !! هو انت قلقت من أسعار قطع الغيار ولا إيه؟ بصراحة أنا شايفها غالية جداً !!

**د.محمود صلاح** · 19-09-2007 01:56 AM

آسف على المعلومة الخطأ الضمان 3 سنين أو 60 الف كم ابتداء من تسليم ابريل 2006

أستاذ محمود
إيه اللي حصل؟؟!!
أنا شايفك عامل إعلان لبيع العربية في منتدى البيع والشراء !! هو انت قلقت من أسعار قطع الغيار ولا إيه؟ بصراحة أنا شايفها غالية جداً !!

أنا مش قلقت أنا اترعبت لما رحت مركز الميكانيكيون العرب لأنهم بيسمحوا لك انك تنزل الورشة تشوف بيعملوا ايه
طبعا اتساهرت مع الصبيان اللى بيصلحوا هناك وكانت صدمتى عندما رايت عربيات ميجان 2 بيتعمل لها عمرة موتور ووش سلندر وكوبلن والاسعار نار نار ومبالغ فيها جدا جدا وكمان لقيت عربيه 2007 عاملة حادث بسيط جدا الاكصدام الامامى فقط هو اللى اتصاب والكبوت سليم تماما ومع ذلك لقيت الاتنين ايرباج مفتوحين والعربية مركونة بقالها كتير والتراب عليها بسأل
قالوا لى عليها مبلغ كبير عشان تتصلح ( أول حاجة عماتها أول ما شفت المنظر ده رحت طافى الايرباج )
وعلى فكرة الميجان لما شفتها مفكوكة لقيتها عادية جدا زى أى عربية حتى الفرامل اللى ركبتها هناك ( منهم لله ب 360 جنيه ) لقيتها فى ش دمشق ب 150 جنيه وتركيبهم فى منتهى السهولة ( عبارة عن مسمار بيتفك تلاقى الخزنة كلها اترفعت زى باب الجراج ) مش عارف ليه صيانتها مش منتشرة ليه عند الميكانيكية زى باقى العربيات

**د.محمود صلاح** · 19-09-2007 04:28 AM

رأيي فى العربية إنها ممتازة بكل المقاييس :-
توكيل محترم جدا وقطع الغيار موجودة بنسبة 95 % ( بعض التوكيلات عندما تطلب قطعة غيار يقول لك هنستوردها بعد اسبوع )
السيارة بها امكانيات هايلة موصوفة بدقة من خلال الموضوع
السيارة مصنعة فى تركيا فى مصنع حاصل على الايزو من 8 سنوات وتصدير انتاجه اصلا الى اوروبا
هدوء وثبات وعزل وقوة وأداء وفخامة واستهلاك بنزين أكثر من رائع ( عملت 17 لتر فى 280 كم قيادة هادية و 23 لتر فى نفس المسافة قيادة عنيفة 170 -190 كم |س )
شكلها ثابت ولن يتغير قبل 2009 مما يعطى لك شعور بالارتياح بان السيارة شكلها مش هيقدم ( بالمقترنة بالانترا اللى كل سنة شكل غير التانى والاوبل )
لا يمكن سرقة السيارة ( مش بالساهل ) مثل الانسر والبقية
المشكلة الرئيسية فيها هى قطع الغيار والصيانة ( ولكن قطع الغيار اصلية مش مضروبة ولا صينى والصيانات الدورية فيها حاجات كتير بتتغير أما الصيانات الكبرى مثل الحوادث والعمرات اللهم احفظنا فمستحيل حد يتحملها لأنها ممكن تصل الى ربع ثمن السيارة - الحل فى التأمين الشامل ولكنه لا يغطى أعطال الموتور والكهرباء )
المشكلة الاخرى انها لما بتعطل بتربط مكانها ولازم تتصل الكول سنتر ييجوا يصلحوها ( لازم تكوم فى زمام القاهرة والاسكندرية )
هى مناسبة لسكان القاهرة والاسكندرية حيث الصيانة وقطع الغيار والكول سنتر
ويا ترى ما مستقبل هذه السيارة بعد 10 سنين مثلا ان شاء الله ؟ هل سيصبح ثمن الكوبلن ب 100 جنيه زى ما هو الحال بالنسبة للانسر 98 الان ؟ هل سنتمكن من صيانتها برة التوكيل المحترم الغالى ؟
بالنسبة للزجاج بتاعها فمصنع د. جريش نزل منه مصرى سعره معقول ابن حلال

**د.محمود صلاح** · 20-09-2007 03:57 AM

اتصل بى اليوم مركز صيانة الميكانيكيون العرب ( مركز خدمة معتمد لرينو بجوار السندباد ) بعد ان ركبت لديهم تيل الفرامل الامامى أمس الأول , لتصلوا بى لإبداء رأيي فى الخدمة المقدمة وشكرتهم على الاهتمام وانى اول مرة اشوف مركز خدمة يتصل عشان يعرف رأى العميل - وعرفت منهم ان عندهم تأمين شامل (بالتعاون مع مصر للتأمين ) على الميجان يشمل تكاليف ونش السحب ب 2,9 % من ثمن العربية بدون عربية بديلة أو 3,4 % بعربية بديلة بدون أى اجراءات أومحاضر شرطة أو شيكات أو ما شابه ذلك من تعقيدات روتينيه فقط فى حالة حدوث مكروه اتصل يسحبوهالك بالونش أو تفضل ووديلهم العربية وهم يصلحواهالك (ولكن للأسف التأمين يشمل الحوادث والسرقة والحريق ولا يشمل العطل الميكانيكى أو الكهربائى الذى قد يستلزم مبالغ عالية للتصليح ولا توجد أى شركة تأمين تغطى هذه النقطة )
عايزين ايه جمال اكتر من كده :D

**د.محمود صلاح** · 21-09-2007 03:15 AM

أؤيدك فى الكلام واذكرك بما كتبته عن صيانة الياريس واسعرها فهى مماثلة لاسعار صيانات الميجان ( ان لم يكن اكثر ) كمان الصريين مشهورين بالفهلوة فبعد سنين العربيات دى هتتفك حته حته وتتصلح ( انا ليا واحد صاحبى عامل زر لل 128 بيدور بيه العربية شبة زرار الميجان بالضبط فقلت فى نفسي آدى يا عم تكنولوجيا الميجان فى ال 128 ) :mrgreen: