جدل حول البيجو 305

**amr mokhtar** · 05-03-2009 10:36 PM

طيب هل مشكلة الكامة دى موجودة فى كل الموديلات و لا حاجات معينة؟
و هل هى فعلآ مختلفة ميكانيكيآ عن موديلات البيجو اللى فى عصرها إختلاف جذرى؟

و بلاش ننسى الهدف من الموضوع و هو المناقشة الهادئة

**kzizo** · 06-03-2009 02:38 AM

معلش لو كنت حاد شويه في كلامي بس أنا أعرف تلاته معاهم العربيه وعمرهم ما إشتكوا من موضوع الكامه ومنهم واحده طياره

**hesham_shousha** · 06-03-2009 04:50 AM

أنا تعبت من الكلام عن ال 305
وقلت قبل كده سوء حظها إن الفئه اللى بتشتريها فئه غلبانه ( معهاش فلوس ) لإن سعرها رخيص وبالتالى موش بتصرف عليها فى الصيانه وبالتالى موش بتعمر معاها
ياجماعه العربيه معايا من سنه 1984 والعربيه زى الفل وموش بافكر أبدلها بحاجه تانيه لانها مريحانى جدا مع العلم ) الحمد لله ) لو عايز أجيب عربيه على الزيرو ممكن أجيب النهارده - بس أجيب ليه والعربيه اللى معايا موش بتروح للميكانيكى إلا عند الصيانه الدوريه ( كل عشره الاف كيلو متر )
وحكايه عيب الكامه موش موجود عندى نهائى وموش عارف اللى حصلتله حصلتله ليه ؟؟؟؟؟؟؟؟؟؟؟؟
واللى عايز يعرف اكثر عن تجربتى مع العربيه يراجع مشاركاتى فى المنتدى
وفى النهايه ارجو من اللى يدى رايه يكون راى عن تجربه موش عن سمع

**amr mokhtar** · 06-03-2009 11:39 AM

ملحوظة عامة على كل سيارات البيجو: إن البيجو بيحتاج صيانة محترمة و حد بيفهم ايآ كان موديل العربية يعنى من الآخر البيجو مينفعش يمشى بأى قطع غيار

و يبدو ان مالكى ال305 الحمد لله مبسوطين منها...
بس إيه هى الحاجات المكلفة فى العربية دى من ناحية الصيانة و اللى بيخلى إصلاحها او صيانتها صعب؟

**walids** · 06-03-2009 11:52 AM

هي مش مكلفة أوي يعني للدرجة اللي انت متخيلها

يعني انا حالياً كنت بظبط عربيتي ال 305
اشتريتلها فانوسين جداد خلفي ، الفانوس ب 130 جنيه
المارش عندي كان وشه محتاج يتغير ، اشتريتلها وش مارش ب 55 جنيه

يعني فيه حاجات بس مش متوفرة في كل الأماكن فخلي بالك انك تكون عامل حسابك علي حاجه احتياطي منها علشان انت متتعطلش لو جري حاجه للعربيه لقدر الله زي المارش مثلاً ، لأنه شمال في المكنه مش يمين زي الموجودين حالياً

علي فكره انا شديت عربيتي شدة كاملة و صرفت عليها حبتين :d

ان شاء الله في القريب هصورها و ارفعلكم صورها

**kzizo** · 06-03-2009 07:41 PM

العربيه بس رخمه شويه في صيانتها لإن موتورها بالعرض فبيكون الوصول لأجزاء المحرك صعبه عشان كده عايزه حد يكون عارفلها كويس أنا عن تجربه كنت بتعامل مع كهربائي وربنا يشهد علي كلامي قعد يفك في المارش ساعتين المهم غيرته ورحت لكهربائي تاني ولدهشتي الكهربائي التاني ده فك المارش في دقيقتين أنا شفت ايام والله سودا مع العربيه بس الحمد لله إتزبطط كويس ومع إحترامي لكل الي العربيه مش عجباهم أنا بحب عربيتي ال 305 ولو فيه حد هنا من المنصوره انا أثبت له إنها عربيه جامده
مع إحترامي لكل البيجو

**Ahmed Hassan** · 06-03-2009 08:08 PM

العربيه بس رخمه شويه في صيانتها لإن موتورها بالعرض

90% على الأقل من العربيات موتورها بالعرض.

**hesham_shousha** · 06-03-2009 10:29 PM

بالنسبه لقطع الغيار يوجد بعض الاجزاء اسعارها غاليه جدا بس معمره
يعنى طقم الدسك والاسطوانه والرولمان بلى وسلك الدبرياج غيرتهم سنه 2001 ب ألف جنيه مقفلين والنهارده اعتقد سعرهم فى حدود 2000 جنيه
لكن لحد النهارده شغالين وماغيرتهمشى تانى
لو اتكلمنا عن العمره : كلفتنى سنه 2001 ثلاثه ألاف جنيه وأعتقد المبلغ النهارده هيكون فى حدود 5000 جنيه
الكبالن جبتها السنه دى فرنساوى ب 1400 جنيه مع ملاحظه ان الصينى ب 700 جنيه بس ماحبتشى اجربهم
الكربراتير موش موجود دلوقتى وفيه نقص لكن فيه سعرين : كل التجار بيبيعوه ب 700 جنيه إلا المسيرى بيبيعه ب 1700 جنيه نفس الماركه وموش عارف ليه
طقم المقصات جبتهم السنه دى المانى ب 350 جنيه واعتقد ده سعر موش غالى
وغيرت علبه الدركسيون ( فرنساوى ) ب 550 جنيه واعتقد السعر كويس
وعلى فكره انا غيرت العلبه موش عشان هى بايظه على العكس العلبه القديمه كانت بتاعه الفابريكه وممتازه وزى الفل لكن البيض بتاعها ما بيتفكش وجبت الجديده زيها طبق الاصل لكن البيض ممكن يتفك ويتغير
الخلاصه هناك حاجات بسيطه غاليه فى العربيه ( طقم الدبرياج - طقم البساتم - الكبالن ) عدا هذا الاسعار عاديه مع ملاحظه انها قطع غيار معمره وتستاهل اللى بيتدفع فيها

**el3awaam** · 06-03-2009 10:39 PM

والله يا جماعة انا عن نفسى (و دى وجهة نظرى انا)
بنائا على انى ركبتها و هى كانت عند خالى و عارف ايه اللى فيها كويس..
هى عربية محترمة جدا و دة بالنسبة لل128 و اللى فى فئتها طبعا.
و لما يتصرف عليها مع صنايعى كويس بتبقى جميلة.
(بس دة مايمنعش انها اسواء عربية عملتها بيجو)
و دة على مستوى بيجو فقط...

**hesham_shousha** · 06-03-2009 10:45 PM

عايز أضيف حاجه للموضوع اللى بنتكلم فيه
لو جينا نقارن بين ال 305 والسيارات الاخرى الموجوده فى السوق ولها نفس السعرأو أكثر بالطبع ال 305 هتكسب بلا منازع بإمتياز ( 128 -131 - 132 إلخ )
ولو جينا نقارن بينها وبين عربيات بتتباع النهارده على الزيرو تلاقى برضه ال 305 تكسب بإمتياز نظرا للأتى :
1- جوده الصناعه والخامات والتقفيل الجيد
2- جوده وطول عمر قطع غيار السياره بالنسبه للسيارات الاخرى
3- قله المشاكل اليوميه التى يعانى منها مالكى السيارات الاخرى ( والحقيقه يكاد يكون ماعنديش مشاكل )
4- صالون ال 305 أوسع وأشيك وأريح وخاماته أنظف من السيارات الاخرى اللى على الزيرو
ونذكر من هذه السيارات على سبيل المثال ( الماروتى و ال 128 - اللادا بجميع انواعها - الشاهين )

وارجع اقول ان ال 305 سعرها كده فى السوق موش عشان هى وحشه لكن عشان مافيش عليها طلب لان المستهلك المصرى بيهرب من العربيه اللى قطع غيارها غاليه ويفضل يركب عربيه اقل فى جوده الصناعه لكن قطع غيارها رخيصه ومايهموش عمر قطعه الغيار الافتراضى ايه

باشبهها بالعربيات الامريكانى ال 8 سليندر اللى بتتباع برخص التراب موش عشان هى وحشه لكن مافيش عليها طلب لانها حريقه بنزين يعنى سعرها متحدد بناء على قانون العرض والطلب وليس على جوده صناعه السياره

الموضوع: جدل حول البيجو 305

LinkBack

أدوات الموضوع

عرض

-

-

-

-

-

-

-

المواضيع المتشابهه

سحب البيجو 307

استفتاء بخصوص وحوش البيجو مش مالكين البيجو

ساعدونى ف اتخاذ قرار اشترى البيجو 205 دى ولا لا؟(معنديش خبرة ف البيجو )

البيجو 305

البيجو 206

الكلمات الدلالية لهذا الموضوع

المفضلات

المفضلات

ضوابط المشاركة