إختبار قيادة جولف 2 (Golf II Test drive) موديل 1990 1300 cc

**ahmed1981** · 02-09-2007 01:26 AM

بسم الله الرحمن الرحيم

إختبار قيادة جولف 2 (Golf II Test drive) موديل 1990 1300 cc
النوع:ـــــــــــــــــــ� �ـــــــــــ جولف 2
الموديل: ـــــــــــــــــــــــــ 1990
الموتور: ـــــــــــــــــــــــــ 1300 cc
الفتيس: ـــــــــــــــــــــــــ ــ أربع سرعات يدوي
الكماليات: ـــــــــــــــــــــــــ ــ باور وسنتر وزجاج كهرباء

بداية السيارة من الخارج جميلة الشكل متناسقة الحجم
تفتح الأبواب سهلة الفتح والقفل
ندخل الصالون الصالون الداخلي أوسع صالون داخلي لسيارة هاتش باك ركبتها في هذه الفئة تقريبا الكراسي الأمامية مريحة وواسعة وكذلك الكنبة الخلفية واسعة ومريحة والحقيقة هذا أحد أهم الأسباب لشرائي لها (إتساع الصالون)
الشنطة الخلفية صغيرة نوعاً ما لكن مقارب لشنطة ال 128.
الإستبن الصغير عملي وخفيف وصغير الحجم
تركب السيارة وتقعد على كرسي السائق ممتاز مهما كان حجمك تقدم وترجع الكرسي براحتك ولو راسك في السقف في يد في الكرسي تشدها لفوق تلاقي الكرسي وطي من الخلف (تقدر تظبط وضعك مهما كان حجمك :D )
طارة الدركسيون فخمة وجميلة العدادات معقولة التابلوه جميل ومتناسق وتصميمه يعتمد على الزوايا وليس إنسيابي مثل الموديلات الحديثة ولكن معقول والكاسيت مكانه عالي شوية إضاءة التابلوه بتعلى وتوطى من بكرة في التابلوه
تدو العربية تدور من أول مرة وفي الصباح قبل أن تدور دوس بنزين ثلاث مرات ودور والتسخين الآلي هيشتغل أوتوماتيك
دورت العربية إطلع بيها حتى لو لسة بتسخن هي عارفة شغلها
في بداية الطلوع العربية الموتور 1300CC لكن هتلاقيها بتسحب معاك معقول في ال RPM الواطي لكن بعد 3000 RPM السحب بيكون ممتاز وقوي
نقلات العربية طويلة النفس جداً جداً لغاية 6000 RPM لكن القيادة الإقتصادية أنصحك متزودش عن 4000 RPM
صوت الموتور جميل والعزل كويس لكن مع RPM العالي الصوت يعلى بشكل معقول ومقبول
ثبات العربية ممتاز جداً (جنوط أصلية 14 عريضة وكاوتش عريض) وأنا مجرب العربية لغاية 160 مجربتش أكتر من كده
لما السرعة تكون على 140 كأنك ماشي بال 128 على 90 الخلاصة (الثبات ممتاز) (والدتي لما تكون معايا على سفر في 128 وأزود السرعة عن 90 تحس وتقولي هدي السرعة لكن في أول مشوار سفر بالجولف قالتلي هدي وأنا على 140)
المناورة بالعربية ممتازة وتشجعك على الغرز والدركسيون لفاته مرنة لأقصى درجة أثناء المناورة
حجم العربية وأبعادها رغم رحابتها من الداخل إلا أنها سهلة التعامل من الخارج
العربية مريحة في المطبات تحس إنها تقيلة وراسية
إستهلاكها في البنزين داخل المدينة حوالي 180 كيلومتر في الصفيحة وهذا معقول لأنها كربيراتير
البنزين المناسب لها 90 فما فوق لكن تقدر تحط 80 وتوطي الكهربا لتجنب التصفيق (وهذا ما سأفعله لزوم التوفير :D )
الموتور ال 1300 مناسب لها لكن العربية ثقيلة عليه لكن ال 1600 بيخليها روعة في السحب
سعرها يتراوح بين 35 ألف إلى 40 ألف حسب الحالة والكماليات
ونصيحة لمن يريد أن يشتري جولف أن يعلم أنها معشوقة الشباب والشباب مبهدلين أغلبها فلو عايز تشتري واحدة تكشفها عليها بدقة ويستحسن سمكري يشوفها لأنهم بيركبلها إنصاص وغيره
بالنسبة لأسعار قطع الغيار معقولة إلى مرتفعة لكن متوفرة ومعمرة بشدة والقطع المستوردة إستعمال الخارج كتيرة جداً
إلى هنا ينتهى إختبار القيادة
والإختبارات السابقة كانت عن الكابرس وال 128
http://www.nilemotors.net/Forum/viewtopic.php?t=4324
http://www.nilemotors.net/Forum/viewtopic.php?t=4110

وألقاكم في إختبار القيادة القادم إن شاء الله عن البيجو 504 ستيشن موديل 1980

هذا والله أعلم
سبحانك اللهم وبحمدك أشهد أن لا إله إلا أنت أستغفرك وأتوب إليك

________
تم تعديل حجم الخط

مشرف القسم.

**fahd_628** · 02-09-2007 02:10 AM

الف مبروووووووووووك يا باشا على العربية و شكرا على التقيم الجميل دة

**معاذ الشرباصى** · 02-09-2007 02:36 AM

ربنا يباركلك فيها و يحفظها لك من كل سوء

**hazem_khidr** · 02-09-2007 06:44 AM

في تصميمات كده بتبقي فلته بمعني انها بتبقي تصمميمات جميله و كل ما بتقدم برضه بتفضل حلوه برضه و الجولف 2 بالذات واحده من العربيات القليله دي

**ahmed1981** · 02-09-2007 10:48 AM

ربنا يبارك فيكم يا جماعة
ربنا يبلغنا رمضان ويعيننا على الصيام والقيام وقراءة القرآن

**qupid_forever** · 25-09-2007 05:32 AM

الف الف الف مبروك يا احمد على العربييه وربنا يباركلك فيها
ليا عندك طلب مهم اوى بالنسبه ليا وعاجل يا ريت ترد عليا فيه بسرعه إنت واى حد يقدر ينصحنى
انا كنت بتكلم على طول على الابيزا والبولو
لكن معروض عليا جولف 2 موديل 94
جميع الكماليات حاله فوق الممتازه
اغلب او قصدى قطع غيارها كان صاحبها بيحبها من المانيا عشان اخوه مقيم هناك
متسقطلها موتور 2800 سى سى
العربيه اوتوماتيك فرش جلد بجد فوق الوصف
جنوط 17 بى بى إس وبيقول إن فاتوره الجنط لوحده 15000 ومعاه طبعا الفاتوره
وكمان بيقول إن معاه فاتوره الموتور ب 25000
طبعا فرش جلد ومركبلها اير باج
وكاسيت سى دى يعنى من الاخر بجد تحفه العربيه فوق الممتازه
يا ترى من رايك إنت او اى حد يقدر ينصحنى تيجب فى السعر كام
طبعا هو قالى على سعر بس عايز اسمع منكم إنتوا الاول وبعدين اقولكم هو قالى كام
او بمعنى اصح اشتريها بكام يعنى اخرها عشان اقول إنى مش اتخميت
ويا ترى اشتريها من اصله ولا لا
ميروك مره تانيه يا احمد
بجد يار يت تنصحونى وبضمير وسامحونى على كلمخ بضمير بس بجد انا مزبزب وتعبان جدا
وبخاف إن يضحك عليا او اتخم
وطبعا ان اخوكم
وطبعا اتمنالكم الخير
كيوبيد

**hazem_khidr** · 25-09-2007 05:44 AM

لكن معروض عليا جولف 2 موديل 94

جولف 2 اخر موديل منها 1991 و بعد كده جولف 3.

يا ترى من رايك إنت او اى حد يقدر ينصحنى تيجب فى السعر كام

باللي عامله كده ما تزيدش باي حال من الاحوالعن 50 الف او 55 الف بالكتير لكن نصيحه ابعد عن العربيه دي علشان مش حتعرف تعمل صيانه ليها و حتتعبك احلي تعب لو بدات تفتح بوقها.

**qupid_forever** · 25-09-2007 05:58 AM

على فكره نسيت اقول إن العربيه اول يد من الزيرو
اشترتها سيده واستعملها ابنها وهو إللى انا هشترى منه
كيوبيد

**qupid_forever** · 25-09-2007 06:37 AM

سورى مره تانيه احمد وسرى للكل هى فعلا جولف 3 لكن كل حاجه قولتها صحيحه
ومطبعا ميرسى ليك حازم على رايك ومشارتكتك بس يا ترى
ليه بتقول إنى مش اشتريها وليه ممكن تفتح بقها بدام العربيه حالتها فوق الممتازه
يا ريت توضح يا حازم
شكرا مره تانيه ومستنى بقيت الردود

**qupid_forever** · 25-09-2007 06:42 PM

طبعا متشكر جدا يا حازم على رايك
بس الظاهر إنى مش ليا نصيب فيها
لعربيه اتباعت إمبارح
ربنا يبارك للى اشتراها
بس اكيد برده هتقفوا جنبى فى اى عربيه تانيه
كيوبيد

الموضوع: إختبار قيادة جولف 2 (Golf II Test drive) موديل 1990 1300 cc

LinkBack

أدوات الموضوع

عرض

إختبار قيادة جولف 2 (Golf II Test drive) موديل 1990 1300 cc - انشر الموضوع فى :

-

-

-

-

-

-

-

المواضيع المتشابهه

اختبار قيادة كابرس كلاسيك موديل 1988 (Drive Test)

إختبار قيادة للهووفر Hoover Test Drive

تجربة قيادة C180 Test Drive

اختبار قيادة 128 موديل 1976 (Drive Test)

اختبار قيادة للشاهين 1400 CC موديل 2008 بعد 2000 كلمSahin 2008 – 1400 CC Test drive

الكلمات الدلالية لهذا الموضوع

المفضلات

المفضلات

ضوابط المشاركة