الموضوع: اختبار قيادة كابرس كلاسيك موديل 1988 (Drive Test)

اختبار قيادة كابرس كلاسيك موديل 1988 جميع الكماليات

النوع:ـــــــــــــــــــ� �ـــــــــــ كابرس كلاسيك
الموديل: ـــــــــــــــــــــــــ 1988
الموتور: ـــــــــــــــــــــــــ حولي من 2500 إلى 5200 cc مش متأكد
حجم الموتور : ـــــــــــــــــ 8 سلندر على شكل حرف V
الفتيس: ـــــــــــــــــــــــــ ــ خمس سرعات أوتوماتيك
الكماليات: ـــــــــــــــــــــــــ ــ جميع الكماليات والإضافات

العربية دي نادرة في مصر مش عشان غالية عشان غول بنزين
المهم العربية جميع الكماليات اللي تتخيلها بالإضافة إلى مثبت سرعة بذاكرة للعودة لآخر سرعة مثبته من لمسه واحده
كبوت العربية لوحده بحجم ال 128 على بعضها
تفتح الباب عشان تركب تلاقي الباب سماكته حوالي ربع متر لو إتقفل على إيد حد يكسرها فورا
المهم تركب وتقفل الباب تحس إنك قاعد على الأنتريه وتظبط وضع الدركسيون على مقاسك وتظبط الكرسي بالكهربا حسب طولك وحجمك.

تيجي تدور الصبح في التلج هتلاقي الهواية اللي قدامك تفتحها تلاقي مكتوب طريقة التدوير في الصباح الباكر وهي دوس بنزين على الآخر ثلاث مرات وبعدين دور ومن أول تكه والسخان الأوتوماتيكي يشتغل يسخنلك العربية يفضل مزود بنزين لوحده لحد ما تسخن لو مستعجل كارك البنزين يلغي التسخين الأوتوماتيكي

المهم تيجي تطلع تعشق في ال D - طبعا الفتيس في الدركسيون والحكاية دي بتوفر مساحة كبيرة للصالون العربية – تدوس بنزين في وحش جوه الكبوت بيحرك العربية يقابلك مطب إنت هتهدي ولا إيه دوس بنزين وكله مش هتحس بيه من تقل العربية إلا لو كان جبل من جبال مصر.

المهم بالنسبة للشد دوس زي ما إنت عايز مش هتقولك لأ أنا كنت بفتح من الصفر بدوسه وحده لغاية لما أخلص العداد في طريق سفر طبعا وثبات زي الحديد
عداد السرعة مدرج لغاية 140 وبعد كده مفيش تدريج دوس وسلمها لله والمؤشر يفضل يزيد لغاية لما يوصل للصفر تاني
التسارع محسبتوش ومظنش إني ألحق أحسبه المهم إنه مبهر

التكيف معقول بس العربية كبيرة جدا مهما كانت قوته مبيغطيش العربية كلها

حجم الصالون أنا لم أركب عربية في حياتي أوسع من الكابرس

العربية قعدت معانا حوالي أربع سنين عمر ما عجلة ضربت وإنت ماشي زي ما البيجو 504 كانت بتعملها في كل مشوار

الإكصدامات حديد كمر وشاسيه العربية كمر حديد من الأول للآخر

العفشة كأنك قاعد على المرتبه في البيت والمساعدين ورا كانوا هواء ممكن تنفخهم عند بتاع العجل وتعلي العربية على مزاجك

عيوب العربية كبر حجمها وإستهلاك البنزين العالي حوالي 120 كيلو في الصفيحة
العيب الكبير قوي هو الحسد العربية دي بتتحسد جامد لدرجة مره كنا راكنين في ميدان الإسماعيلية بمصر الجديدة وواحدة ست معدية قالت بالنص (كل دي عربية !!!!! ربنا يحرقها ) طبعا كانت جدتي قاعده معايا في العربية وقعدت تزعق للست وتقولها حرام عليكي

المهم أنا مركبتش بعدها زيها رغم إني جربت قيادة شيروكي 2003 بس مكنتش مرتاح فيها حاسس إني عالي قوي عن الأرض كأني راكب جمل والكابرس عندي أحسن منها سواء في الراحة أو التمكن من العربية

طبعاً عربية سفر ليس لها منازع

أتمنى إني أكون أفدتكم
والله أعلم
سبحانك اللهم وبحمدك أشهد أن لا إله إلا أنت أستغفرك وأتوب إليك

زمن الامريكى راح خلاص العربية دى كنت بحبها اوى هى و كراون فكتوريا و جراند ماركز و لنكولن و كرايسلر عموما غير كدة كل الامريكى (GM) دلوقتى استراللى و الامريكى منه ملوش لزمة و قطع غيار اغلى من بنز