يوم في أسوء توكيل في مصر

**محمدايهاب** · 03-09-2007 03:49 AM

طبعا أنا بتكلم عن توكيل فولكس فاجن
بدأت الحكاية بسفر أحد أقاربي و طلب مني أني استلم العربية من التوكيل في العبور و بدأت معاناتي ( مع معرفتي بتجاربي السابقة مع هذا التوكيل الذي يمثل الجحيم و الذي يظهر غبور أمامه كأنه الجنة ) في يوم الثلاثاء الماضي رن الموبايل و سمعت صوت نسائي بيقولي يا فندم عربية حضرتك خلصت ممكن تيجي تستلمها و الله بجد بالسرعة دي 3 أيام بس ( كانت حاجة غريبة الطبيعي أن وكيل فولكس بيأخر العربيات بالأسبوع حتى لو المشكلة هي عبارة عن تيل فرامل محتاج تغيير و أنوار محتاجة كشف و شكمان محتاج فحص و تغيير زيت و تركيب أكرة الباب الخلفي شمال و تغيير بوجيهات ) صحيح أن المشاكل دي بتتصلح في حدود يوم بالكتيير في أي توكيل محترم بس ماشي 3 أيام مش مشكلة و الحمد لله على كل حال قلتلها ماشي النهاردة أن شاء الله طبعا أنا من حكم معرفتي السابقة بالتوكيل قلت خليها الجمعة يعني كمان ثلاث أيام ممكن يكونوا نسيوا حاجة أديهم 3 أيام كمان
المهم يوم الجمعة بعد الصلاة مباشرة كنت عندهم يعني في حدود الساعة 2و نصف رحت بعربية ابن خالتي ( كليسا ) و كان هو عنده معاد و عاوز يبيع عربيته السابقة ( الماروتي ) قلتله دي يادوم ساعة و راجعين دي العربية على الاستلام عدت الساعة و أنا مستني المهندس ناصر يخرج من الورشة رحتلوه قلتله أنا بتاع الباراتي إلي كلمت حضرتك و معايا الضمان و محضر الاستلام ( كان في حاجات في الضمان التوكيل محتاج الورق ده علشان يحولها على الضمان ) المهم قالي أعمل كذا كذا كذا في عشر دقايق كنت ختمت الضمان و صورته و بعدين سلمت رقبتي و وقتي ليه و انتظرت في الأستقبال في الفترة دي شفت فلمين على روتانا سينما و برنامج على قناة الرأي و 20 -30 أغنية على مزيكا و اتفرجت على العربيات و المهندس كل شوية طالعلي بحجة و الله العربية البطارية وقفت و أنا بعت ميكانيكي ثم جاءت الطامة قالي حضرتك ممكن تستلمها بكرة .....نعم نعم ...و اتجننت رحت دخلت الورشة و العامل بينادي يا بيه يا باش مهندس طبعا طنشت و نزلت الجراش إلي تحت و شفت العربية و زعقت فين المفتاح الأمن قالي يا بيه ما قدرش أديهولك طلعت فوق و جبت ميكانيكي حمار ما يعرفش يشحن العربية و لا يفك البطارية ولا ينزل الهاند بريك طلعت تاني و زعقت و قلت للمسؤول أنا عاوز واحد بيفهم معايا تحت قالي حضرتك أحنا مشغولين قلتله أنا إلي مشغول و مش طالع إلا و في أيدي كهربائي المهم طلعت ونزيلت و استخدمت التليفون و قعدت على كرسي مهندس الإستقبال و مستني حد يتكلم علشان أطلع فيه بس يبدوا أنك تكون محترم تطرب على أفاك تبقى بلطجي الناس تحترمك و تخاف تكلمك المهم نزل معايا مهنس أسمه إياد شحنلي العربية و في عشر دقايق و قاللي يعني حضرتك كل ده و على الشوية دول قلتله شفت طلعت علشان أخلص الورق و استلم المهندس المحترم المبجل إلي اسمه ناصر كان حضرته لسه ما حولش جزء الضمان على تكلفة الوكيل طبعا قالي حضرتك استنى و أنا هجيب لحضرتك الورق قلتله لأ رجلي على رجلك عشر دقايق و كنت استلمت الورق و دفعت و ركبت العربية
يعني الموضوع كله 20 دقيقة و أنا قعت 6 ساعات و نص و استلمت العربية كومة زبالة كمان لأن بتوع التنظيف كانوا مشيوا قلت الحمدلله أن اليوم عدا على خير و ما رتكبتش جريمة

**Ahmed Hassan** · 03-09-2007 04:02 AM

يا ترى فيه حد بيوصل الكلام ده للشركه الأم بره؟؟!

**Heshaam** · 03-09-2007 04:03 AM

معلش يا أستاذ محمد. حصل خير. بس إنت متأكد إن ده ما كانش مقلب مدبر من قريبك صاحب العربية. :)

والله أنا بشاركك نفس الرأي، وعلى فكرة إحنا كان عندنا بولو 2001 تخلصنا منها بسبب التوكيل.

المأساة - من وجهة نظري - مش في التوكيل بل في الشركة الأم اللي المفروض أن إسمها وسمعتها يكونوا فوق كل إعتبار خاصة إذا أخذنا في الاعتبار نوعية الجمهور المستهدف لمعظم منتجاتها.

يلا معلش

**محمدايهاب** · 03-09-2007 04:11 AM

يا أخ هشام أزيد على الطين بلة أني كل أما أكلم مسؤول و أقله حرام عليكم افتحوا مركز تاني أو حتى اسمحوا بمراكز الصيانة المعتمدة يقولي إن شاء الله في أبو رواش في شهر ستة قلتله يا راجل ده الكلام ده من 2003 و مفيش فايدة و الله أنت لو شفت الصف ده الواحد علشان يدخل عربيته بس لازم يستنى في طابور ما لوش أول من أخر و لازم يدخل بدري ده بس علشان العربية تدخل الورشة !!!!

**Ahmed Hassan** · 03-09-2007 04:11 AM

المشاركة الأصلية كتبت بواسطة Heshaam

المأساة - من وجهة نظري - مش في التوكيل بل في الشركة الأم اللي المفروض أن إسمها وسمعتها يكونوا فوق كل إعتبار خاصة إذا أخذنا في الاعتبار نوعية الجمهور المستهدف لمعظم منتجاتها.

يلا معلش

و هل فيه حد من المستهلكين بلغ الشركه الأم؟؟

**معاذ الشرباصى** · 03-09-2007 04:20 AM

هل فيه حد من المستهلكين بلغ الشركه الأم؟؟

اظن ان فولكس فاجن المانيا مفيش حاجة وراها غير انها تحل مشاكل الوكيل فى مصر :lol:

بجد فى ناس كتير بعتت و خدت حقها, بس مينفعش وكيل ماركة زى دى يملك مركز خدمة واحد فقط على مستوى الجمهورية

و مبيسمحش باى مركز معتمد

ده غير ان عربيات كتير ملهاش قطع غيار بره التوكيل زى البوينتر, باراتى, كروس فوكس, سوران, و مش بس كده ده كمان قطع غيار دول مش كاملة عند الوكيل

**tmz9111** · 03-09-2007 05:08 AM

معظم التوكيلات فيها مشاكل

**معاذ الشرباصى** · 03-09-2007 05:57 AM

معظم التوكيلات فيها مشاكل

مفيش زى وكيل الفولكس للاسف

ده اى ماركة عربيات حتى الصينى لهم اكتر من مركز خدمة

الواحد يتمنى اقتناء اى تحفة من تحف فولكس فاجن, لكن عربية رائعة مع وكيل سىء = وجع دماغ و هتكره العربية و اليوم اللى جبته فيها

**Heshaam** · 03-09-2007 06:40 AM

و هل فيه حد من المستهلكين بلغ الشركه الأم؟؟

والله ده ممكن يكون جانب منه تقصير من بعض العملاء بس برده مش لازم ننسى إن الواحد وهو رايح يشتري عربية زي ديه بيبقى معتمد على الاسم فمش بيحط خطة للتعامل مع مشاكل التوكيل (رغم إن ده خطأ بس هوه ده الواقع للأسف) :D

وكمان ده لا ينفي مسئولية فولكس فاجن تجاه عملائها من حيث اختبارات جودة الخدمة المقدمة ليهم في أي مكان بس غالبا السوق المصري مش على خريطة اهتماماتهم :?

تحياتي

هشام