الموضوع: استهلاك بخصوص البنزين في الفيرنا

بص يا باشا فى حاجات مهمه هقولهالك الاول تخليك تتجنب حاجات ممكن متكنش حاسس انها بتستهلك بنزين على الفاضى زى:
غلط انك تسيب العربية دايره على الفاضى و انت واقف (سلانسيه).. عايز اقولك ان البنزين المستهلك علشان يخلى العربية دايره فقط قريب من كمية البنزين المستهلكه لو كنت بتحرق جامد و بتقرص يعنى ال rpm على 5000 مثلا. يبقى لازم تقلل من الزمن اللى بتسب العربيه دايره فيه على الفاضى يعنى متنزلش مثلا تدور العربية و تسيبها و تقعد تلمع فى الزجاج... لأ دورها قبل ما تمشى بحاجة بسيطة و متقعدش تسخن و الكلام ده العربيات الجديدة مش بتحتاج تسخين زى القديم.. كمان لو عايز تسخن متدوسش بنزين سيب العربية مع نفسها لان دواسة البنزين بتبقى حساسة جدا فى اى عربية حديثة.
كمان لو وقفت فى اشاره زحمة جدا و ممكن تقف اكتر من دقيقتين او تلاته ممكن تبطل.. لكن لو بتتحرك بالعربية كل شويه متبطلش لانك لو بطلت و شغلت تانى يعنى عملت (star up) عملية بدء الادارة بتحتاج حرق بنزين كتيير.

اما بقى اثناء التحرك
لو عندك عداد rpm ميزة كبيرة لانك هتلاحظ العربية و هى دايره ان عدد لفات المحرك حوالى 700-800 rpm فى السلانسيه.. لاحظ بقى و انت بتطلع على الاول انك متدوسش جامد على الدواسة يعنى اضغط اقل حاجة تخليك تتحرك بدون ما تلاقى ال rpm زاد عن ال 700 او ال 800 كتيير يعى تطلع على 800 لفه او 900 او 1000 لو كتيير و مع الوقت هتتعود عليها علشان الضغط الجامد فى بداية الحركه ده بيحرق بنزين على الفاضى انت مش مستفيد بيه.

اثناء السير بقى متزودش عن 3000 rpm يعنى:
الاول اخره 15-20 او تجيب التانى لو العربية بتتحرك
التانى 40
التالت 55-60
الرابع 75
الخامس فوق ال 100 هتلاقى استهلاك البنزين عاااااااااالى لكن عند سرعة 90 او 80+ هتلاقى الاستهلاك افضل ما يكون.

اهم حاجه فى النقل انك متكنش بتدوس بنزين جامد و انت ماشى يعنى تضغط على دواسة البنزين بالتدريج لحد ما توصل ال 3000 لفه لكن لو بتضغط جامد على الدواسة (يعنى تسارع عالى) حتى لو بتنقل بدرى و مش بتحرق هتلاقى استهلاك البنزين عالى.. و كمان بلاش تدوس بلطف اوى علشان استهلاك البنزين ميزدش اوى.
و علاج موضوع التسارع ده انك متنزلش متأخر و بعد كده تقعد تجرى (بجد انا لاحظت كده لان مواعيدى كانت خربانه.. لكن لما بقيت انزل بدرى شويه بقيت اسوق براحه و اوصل مستريح بدون تسرع او حرق).

كمان لازم تريح الموتور يعنى متمشيش على التانى بسرعة 35 او 40 مثلا لفتره (او اى غيار) الافضل انك تنقل للتالت و تخلى الموتور مستريح لان على التالت ال rpm هيكون اقل و هتريح رجلك من على دواسة البنزين.

لما تكون على منزل او طريق منحدر انقل للغيار الاعلى علشان تقلل استهلاك البنزين بس مش لدرجة انك تجيب التالت على سرعة 10 مثلا..
لأ هات التالت عند 30 مثلا لو الرابع لو على 50 مثلا و هكذا.

كمان لما تمشى جوا المدينه سيب مسافة بينك و بين اللى قدامك علشان متفرملش كتيير.. علشان لو لزقت فيه و هو وقف هتضطر انت كمان تقف و تبدأ تتحرك من اول و جديد, لكن لما تسيب مسافة بينكم و انت ماشى على 50 على التالت ممكن تشيل رجلك من على البنزين خالص (و دى افضل حاجه و يعتبر مفيش استهلاك نهائى) لما تشيل رجلك العربية هتبدأ تهدى و لو احتجت تفرمل فرمل و مور لو قربت منه او هات التانى على حسب سرعتك ايه..

و اهم حاجه زى ما قلتلك انك تريح العربية فى النقلات على قد ما تقدر انك تنقل بدرى بس من غير ما العربية تسقف او تحس بأهتزازات.

ده اللى قدرت اوصله معلش انت عارف موضوع السواقة ده مش محسوس اوى عند كل الناس علشان بالرجل لو كانت بالايد كان الواحد هيحسها اكتر.

الموضوع مش مترتب اوى لانى كنت كتبته لواحد على الخاص امبارح لانه طلب منى بدون استهزاء.

و عايز بس اقول حاجه فى الاخر ممكن ناس تكون بتعمل كل اللى قلت عليه ده و اللى نسيت اقوله كمان لكن العملية هى الكيف و ليس الكم.

هوا بخصوص ارقام استهلاك الكاتلوجات فهيا بتتحقق

يعني مثلا رقم الفيرنا 1600 اوتوماتيك

5.75 لتر كل 100 كم علي الطوالي

الرقم ده بيتحقق

لكن ارقام الاستهلاك داخل المدينة فدي عمرها ما بتتحقق

المشاركة الأصلية كتبت بواسطة AHMEDCAR

انت مش شايف ان فى تناقض فى كلامك
ازاى الاى 10 فى 20 ليتر تعمل 350 يعنى فى ال40 ليتر تعمل 700 كيلو و هيه 1100 سىسى
و الماتركس بتعمل 660 قى ال42 ليتر و هيه 1600 سى سى 2 كامه المفروض بالنسبه اللى انت بتقول عليها دى فى الماتركس يبقى فى الاى 10 انت بعمل فى حدود 1000 كيلو فى ال 40 ليتر

لأ طبعا يا باشا علميا كل ما حجم المحرك يزيد كفاءته بتكون اعلى و هفهمك.

بالنسبة لل i10 هى 1100 سى سى و 12 صمام يعنى 3 صمامات فى الاسطوانة لكن الماتريكس 16 صمام يعنى 4 vavle cylinder head و شرحت الكلام ده من شويه لما رديت على صاحب الفيرنا ال 1500.

فى حاجة مهمه جدا ان اى محرك حرارى فى الدنيا اقصى كفاءة ليه لا تتعدى %30 يعنى قول %28 يبقى لما اصغر حجم المحرك من 1600 الى 1100 سى سى الكفاءة هترتفع بنسبة قليله.. زى ال ceramic engines اللى بيحاولوا يطوروا فيها استحالة كفاءة المحركات دى تزيد بنسبة اكتر من %28 علشان كده هى مش حل عملى اوى دلوقتى.

و تصدق لو قلتلك ان الدايهاتسو ميرا 97 كانت 850 سى سى و 3 اسطوانات بعمل بال i10 احسن منها.

و كمان انا قلت انى استهلاك البنزين فى اللانوس ال 1500 لما سقتها لمدة سنه كان متوسطه حوالى 480-500 كم فى ال 38-39 لتر لانها 8 صمامات.

كمان يا باشا ال i10 لسه جديده معملتش غير 2130 كم و استهلاك البنزين بيتحسن كل مره عن اللى قبلها ده غير انى اكيد متعودتش عليها زى الماتريكس.. لكن استهلاك البنزين فى تحسن يعنى المره دى عملت 340 و مؤشر البنزين على النص لكن التفويلة اللى قبلها عملت 315 على النص.

المشاركة الأصلية كتبت بواسطة Ahmed Anwer

هوا بخصوص ارقام استهلاك الكاتلوجات فهيا بتتحقق

يعني مثلا رقم الفيرنا 1600 اوتوماتيك

5.75 لتر كل 100 كم علي الطوالي

الرقم ده بيتحقق

لكن ارقام الاستهلاك داخل المدينة فدي عمرها ما بتتحقق

تصدق بقى يا باشا انا عكسك تماما, يعنى فى الزحمة بعمل ارقام كويسة جدا و احسن من اللى الشركة بتقوله لكن على الطرق السريعة مش بوصل للمكتوب (بالذات فى ال i10) يعنى سواقتى فى الزحمة افضل.