السلام عليكم

بقالى كتير مكتبتش ... محصلش حاجة مميزة غير المشكلة اللى حصلت مؤخرا ً دى قلت احكيلكم عنها ...

من اسبوعين كدة كنت رايح دريم بارك والجو كان وحش أوى ... تراب وعفرة وهوا شديد ... لدرجة إن بعد ما وصلنا دريم بارك الألعاب كلها مكنتش شغالة .. واحنا راجعين ببص لاقيت الإزاز اللى ورايا مفتوح ... جيت أقفله مش راضى يستجيب .. رغم إن باقى الشبابيك شغالين عادى ... وانا راجع عالصحراوى عديت عالتوكيل ... سبتها ساعة ... والمهندس قاللى إن المكنة باظت وعاوزة تتغير ... وفصل الإزاز خالص .... تلاتة بس هما اللى شغالين ... وادانى رقم أحجز عليه قطعة الغيار اللى هى مكنة الإزاز .... المهم خدت الرقم واتصلت بيه الموبايل مقفول .. قعد مقفول حوالى تلات ايام ... بعدين ردت عليا واحدة اسمها داليا ... خدت بياناتى وسجلت القطعة المطلوبة ... وقالتلى أول ما تيجى هنتصل بحضرتك .... ماشى ..

النهاردة وانا راجع من الكلية ... لاقيت الإزاز نزل تانى ... وطبعا دى مشكلة .. المرة اللى فاتت انا كنت بالصدفة جنب التوكيل .... المرة دى لأ ... فالعربية إزازها من ورا مفتوح ... وانا خارج من العربية بقفله بايدى بس طبعا بيبقى متلصم يعنى لو لمست العربية تلاقيه راح ساقط.

ومحدش كلمنى قاللى المكنة جات...

الإجراءات اللى هتخذها انى هكلمهم بكرة اسأل عالمكنة واشوف ايه النظام ... مفيش استجابة هكلم المهندس آمر ... مفيش استجابة مش عارف بقى اعمل ايه ...

حاجة مستفزة أوى حاجة زى كدة تحصل يعنى العربية مبقالهاش 6 شهور ... واللى يغيظك عدم توافر قطع غيار مهمة زى كدة .... كل واحد ياخد باله من إزازه بقى ...

العربية دى تقفيلها سىء جدا .. دة لسه المالتى فانكشن عندى بايظة من ساعة ماستلمتها .. وحجزتها فى صيانة الألف من خمس شهور ولسه موصلتش ... حاجة يعنى تقرررف