أوكتافيا A5 فانتازيا وسياسة التسويق المصرية

**momomania22** · 21-03-2009 09:38 PM

السلام عليكم
انا النهاردة كنت في توكسل سكودا فرع مدينة نصر وكنت رايح أحجز الفانتازيا 2009 المانيوال على السعر المعلن في المنتدى 145 الف
والسارة بها الكماليات الاتية :
سنتر لوك ريموت ومفتاح فولد
ريموت للابواب والشنطة والتانك
مرايات ضم كهربائي
مثبت سرعة
تجهيزات تليفون
ساوند سيستم audio وراديو مع 8 سماعات
تكييف كليماتك بكر أمامي فقط
كمبيوتر متعدد الوظائف
باور
ثلاجة
كونسول
شاشة الكترونية عريضة بلوحة العدادات
مساحات امامية وخلفية
رف خلفي سهل الطي
3انظمة ABS+MSR+MBA فرامل مانعة للانزلاق
2 ايرباج
ايموبيلايزر
تصفيح أسفل المحرك
تعتيم اوتوماتيكي للمرايا
فوج لايت امامي وخلفي (عواكس) واسبويلر داخلي
كاوتشات كونتنينتال 15 ومؤشر لقياس ضغط الاطارات
ـــــــــــــــــــــــــ ـــــــــــــــــــــــــ ـــــــــــــــــــــــــ ــــــ
نيجي للكلام المهم
قلت للمندوب عايز أحجز العربية
قاللي مفيش حجز دلوقتي مع ان كان في عربية معروضة مانيوال ونفس اللون اللي انا عايزه
قلتله ليه؟؟
قاللي اصل العربيات في الميناء وهتدخل اول الشهر ولسة ماتسعرتش
قولتله امال العربية اللي شفتها دي ايه
قاللي دي من الدفعة الاولى اللي خلصت !!!!! وكانت عاملة 145 متباعة
قلتله طيب مادام في دفعة اولى يبقى اكيد في حجز
قاللي لأ....اصل العربية هتغلى !!!!!
قولتله ليه ؟؟
قاللي كلام فاضي من عينة ان الدفعة الاولى كنا بنسوق بس من غير مكسب والدفعة التانية هتبقى أغلى وانهم خفضوا سعر القديمة عشان تعرف تبيع مع الجديدة
وان الجديدة اعلى في الكماليات وكلام زي كده
سألته طيب السعر المقترح : رد عليا صدمني وقاللي 155 الف والقديمة 145 موديلات 2009
ماسألتش على الاوتوماتيك وخدت الكتالوج وتليفونه ومشيت وقلتله نتقابل اول الشهر ان شاء الله
ومش عارف الكلام ده منطقي ولا لأ ؟؟؟
أفيدوني ،، اجيب خليجي اليومين دول ولا استنى شوية
ـــــــــــــــــــــــــ ـــــــــــــــــــــــــ ــــــــــــــــــــــ

**PoweRPassioN** · 21-03-2009 10:15 PM

استنى افضل طبعا لو تقدر
مش عارف ليه حاسس انه بيشتغلك في الحوار اللي دار بينك وبينه !!

**momomania22** · 21-03-2009 10:18 PM

لأ ده كان بيتكلم جد خالص ومستاء من استغرابي لكلامه
وبعدين انا كنت رايح اشتري مش اتفرج وخلاص
والله كان ناقص أقوله لأ بالله عليك عايز احجز النهاردة
انا بس شاكك ان ماكانش في دفعة اولى من الاصل وان السعر المعلن ده كان عشان يهزورا السوق ويشوفوا رد فعل الناس
لأن كل موزعينهم انا كلمتهم مايعرفوش اي حاجة عن العربية !!!!!
اللي لقيته عند سمير ريان ورضا حمزة خليجي بس انا أفضل المصري !!!!

**momomania22** · 21-03-2009 10:20 PM

وبرضه مش مقتنع انهم هيبيعوا القديمة والجديدة بنفس السعر
اكيد كل الناس هتفضل الجديدة
مع العلم ان العربيتين في اوروبا بيتسوقوا سوا
www.skoda-auto.com
هتلاقي اوكتافيا ونيو اوكتافيا

**islamaboelnaga** · 22-03-2009 02:15 AM

كلام غريب اوى ...انا ناوى ان شاء الله اجيبها اليجانس الشكل الجديد بس 202 دا كتيير مستنيها تهدى شويه

**momomania22** · 22-03-2009 06:35 AM

والله ياريت تهدى شويتين بس واضح انهم مش ناويين على كده
لأن بعد وقف الاستيراد مش هيبقى في غيرهم
وانا حاسس انهم هيعملوا فرق كبير بين سعر ال A5 والفانتازيا
عشان يبيعوا من الاتنين
ولا انتم ايه رأيكم ؟؟؟؟؟

**karimone** · 22-03-2009 01:06 PM

ده تهريج طبعاً...

مش عارف ااقولك ايه بس عموماً اول الشهر ده الاسبوع اللي جاي... استني لحد لما نشوف هاينزلوها بكام...

انا رأي انها لو زادت 10,000 سيبك منها و شوف حاجه غيرها رغم انه هيكون اختيار صعب علشان هي فعلاً عربيه ممتازه...

**mohameduoser** · 22-03-2009 04:09 PM

انا راى اشترى الخليخى و اخلص

**momomania22** · 22-03-2009 06:15 PM

انا النهاردة لقيت خليجي عند رضا حمزة ب 146
اتوكل على الله ؟
ولا استنى اشوف الوكيل نظامه ايه ، لأني مش عارف بصراحة الخليجي ده مضمون ولا لأ ، وهل هو أفضل ولا المصري أفضل ؟؟؟؟

**Ahmed15** · 22-03-2009 06:25 PM

* المصري أفضل و لكن "بكااااام" ؟
* أقصد أن فرق السعر يجب أن يكون معقولا
* لاحظ أن الخليجي طرازات متعدده جدا سعودي و كويتي و اماراتي و ..
* لو وجدت التي بها تصفيح أسفل المحرك و نفس ارتفاع المصري عن الأرض سيكون أفضل اختيار.