الموضوع: صيانة ال 5000 ومشكلة مع التوكيل غريبة

السلام عليكم

حددت ميعاد الصيانة يوم الخميس السابق وروحت فى الميعاد الساعة 10 ص استقبلنى المهندس فى الاستقبال بابتسامة لطيفة وبدانا الكلام :
- افندم
- صيانة ال 5000 ك وبعض الحجات الاخرى
بدا يدور حولين العربية وطلع التابليت وبدا يكتب بيانات العربية وشاورلى علشان اكمل كلامى وهوه بيكتب لسة
ضحكت وروحت مكمل كلامى :
- انا كنت جيت من فترة علشان باسمع صوت فى الجهه اليمنى صوت خبطة وكمان الزوايا كانت مش مظبوطة وزراير الزجاج بتعلق فى بعض الاحيان وكمان نور الصالون , وبصراحة مفيش حاجة اتصلحت تماما فممكن نتاكد ان المواضيع دية اتحلت علشان منضربش بعض ( بهزر ) فقالى طيب حضرتك مجيتش تانى لية
-قولت له ان انا اتصلت وقالولى انى ممكن اقول على المشاكل دية فى صيانة ال 5000
وكمان فى مشكلة غريبة جدا انا مش فاهمها بصراحة : التكييف انا قافلة بس فاتح زرار بوابات الهواء وقافل الكومبريسور ازاى فى هواء ساقع بيدخل؟
-ضحك قالى ازاى يعنى اكيد هيدخل هوا طول ما انت فاتح زرار البوابات
-قولت له انا فاهم بس ازاى الهوا ساقع؟
-قالى علشان احنا فى الشتا حضرتك و وضحك ضحكة تعجب من عبطى
-قولت له طيب انت صح اكيد اية رايك بقى انى لما بجيب المؤشر على الدفاية بيدخل هواء ساخن, يبقى اكيد التكييف شغال بس الكمبريسور مش شغال والا انا غلطان؟
-ضحك وقالى لا يا فندم دة عادى
-قولت لة ممكن تكتب الموضوع دة عندك وتشيك علية بعد اذنك
-قالى مفيش مشاكل
ميعاد تسليم عربية حضرتك الساعة 2 ونصف مساءا

المهم الساعة 11 جالى وقالى عند -حضرتك مشكلة ودية اللى مسببة مشكلة فى الزايا ان الشدادات اللى ورا مخبوطة شكل حضرتك اخدت مطب جامد شوية
المهم طبعا انا معرفش اية الشدادات دية بس سالت على ثمنهم قالى 600 ج
لطمت طبعا وقولت لة انا مش هغيرهم دلوقتى بصراحة
- يا فندم هما مش موجودين اصلا بس هما هيوصلوا المينا كمان كام اسبوع ممكن نتصل بيك ساعتها
- طبعا اتخضيت يا نهار اسود هوا هنا كمان قطع الغيار مش موجودة , بس طمنت نفسى يمكن علشان قطعة غريبة شوية مانا معرفش حاجة بقى
- المهم بعد نصف ساعة جالى تانى وقالى حضرتك موضوع الخبطة دة طلع مساعدين ودول فى الضمان فاحنا هنغيرهملك
- فرحت بس قبل ما افرح قالى بس المساعدين مش موجودين للاسف بردة بس جايين فى الطريق متقلقش كمان كام اسبوع كدة
-المهم خلصت كل حاجة وانا محبط جدا يعنى غيرولى الزيت والفلتى وغسلولى العربية برجليهم ودفعت ال 130 جنية ومشيت

على فكرة دة فرع ابو رواش
هل الشدادات دية ممكن تكون بتتباع برة وسعرها كام وهل لو لنل لقيتها وركبتها برة هتفرق فى الضمان

الجديد بقى يا جماعة
اتصلت بعد الخ hanystar مقالى ان المساعدين وصلوا وسالت عليهم قالى وصلوا يا فندم فعلا وممكن حضرتك تيجى تركبهم , فقولت له ممكن تحجزلى يوم السبت القادم علشان اجى اركبهم قالى يا ريت حضرتك تيجى قبل كدة علشان بيخلصوا بسرعة
قولت له مهو حضرتك احجزهملى خلاص باسمى
قالى يا فندم مفيش مشاكل بس افرض ان حد جيه وطلبهم مقدرش اقوله مفيش
قلت له مانتوا قولتولى مفيش المرة اللى فاتت لما كنت عندكم
قالى مهو فعلا مكنش فيه
اتنرفزت بقى وقولت له انا معرفش اللى بتقولة دة يعتبر اية بالظبط ومليش دعوة انا هاجى يوم السبت اخد حاجتى
قالى طيب

المهم يوم السبت اللى فات لبست ونزلت ركبت العربية وانا فى الطريق قلقت كدة قولت اما اتصل اتطمن بدل متحصل مشكلة
بعد طول انتظار للاخ بتاع قطع الغيار رد وقالى مفيش
طبعا صوت فى وشة يعنى اية مفيش
قالى لسة مجتش من المينا
قولت له نعم يا خويا انا حاجزهم من يوم الثلاثاء بالتليفون وقالولى تعالى السبت
رد عليا رد سخيييييييييييييييييف جدا " مين اللى قالك انهم جم التوكيل"
قولت له هوه انا المفروض اتعرف على كل شخصية بتكلمنى من توكيلكم المحترم واحفظ اسمة علشان تسالوة ان كنت انا كذاب والا لاء
قالى ثوانى هحولك بخدمة العملاء وقفل فى وشى
اتصلت تانى وطبعا اللى جية فى وشى اتهزق كثير وكان خدمة العملاء فعلا
حكيت المشكلة قالى هحولك بقطع الغيار
راح محولنى ببتاع قطع الغيار تانى
قالى انا اسف انا مقفلت فى وشك اصل احنا مبنعرفش نحول من هنا لخدمة العملاء
قولتله اومال انت عملت اية بالظبط ............. المهم قالى خليك معايا ثوانى وسابنى 18 دقيقة بسمع فى موسيقى
كنت طبعا رجعت البيت ودخلت شقتى واتصلت من التليفون الارضى بالتوكيل وكل دة والبية لاطعنى على الهولد مردش
طبعا عملت شكوى وقولتلهم ان المشكة دية هتوصل لحماية المستهلك وهعملكم محضر لو متحلتش
قالولى فى حد هيتصل بيك حالا يا فندم ويحللك مشكلتك
فعلا بعد 30 دقيقة اتصلت مهندسة قعدت تعتزر شوية وبعدين قالتلى ان المساعدين مش موجوديين وانهم كان عندم قطعتين ومحجوزيين
طبعا عرفت هما جابولى مهندسة ترد عليا لية , علشان مزعقش اكثر من كدة بس للاسف 20 دقيقة تهزيق منى للتوكيل وزعيق وضغطى على جدا ومراتى وبنتى اتلموا عليا وكانت ليلة
المهم قالتلى ان فى خلال الاسبوع دة فى حد هيكلمنى وهيكونو وصلوا

المهم فعلا يوم الثلاثاء الماضى اتصلت بيا تانى وقالتلى انهم وصلوا تعالى ركبهم بكرة
قلتلها بكرة دة يبقى الاربعاء انا مقدرش اسيب الشغل انا هاجى يوم السبت
قالتلى مفيش مشاكل
طبعا اكدت جدا على ان المساعدين لازم يبقوا موجودييين هههههههههههههاااااااااااا ا انا مش ههزر والله المرة الجاية