أتعلمت السواقة على أية ؟ أول عربية خاصة بيك ؟ كان عندك كام سنة ؟

**most_wanted** · 22-01-2010 11:34 PM

1. اتعلمت السواقع علي عربيه نوعها ايه ؟؟؟
132 بتاعت والدي وطلعت بيها الرخصه
2. ماهي اول عربيه خاصه بيك ؟
هي عربيه الوالد بس بركبها علي طووول هي الريجاتا
3 .اول مره سوقت فيها كان عندي 15 سنه بس كان في الشوارع الداخليه ولما طلعت الرخصه من سنه بقيت اسوق عادي
4. اغرب موقف حصل ليه؟
اول يوم طلعت فيه الرخصه وكنا لسه شارين الريجاتا مكملتيش يومين كنت ماشي علي كوبري اكتوبر وانا وعضو معانا هنا في المنتدي الساعه 2 الفجر وكنت ماشي علي 120 ودخلت ملف وفوجئت بتاكسي عطلان قدامي فضربت فرامل جاااامد والعربيه لفت بيا حوالي اربع لفااااات وطلعت فوق الرصيف ودخلت في السور الحمد لله طلعت منها علي خيييراليووم ده عمري مهنساه في حياتي

**jisso82** · 22-01-2010 11:52 PM

المشاركة الأصلية كتبت بواسطة AMA

1- أتعلمت السواقة على عربية نوعها أية ؟
دوجان 1999

2- ماهى أول عربية خاصة بيك ؟
ريتمو 83
3- كان عندك كام سنة أول مرة سوقت فيها ؟
11 سنة و كان سواق جرىء شوية عايز يعلمنى على عربية الشرطة بتاعة والدى و والدى إداله 48 ساعة حبس على التصرف ده
4- أية أغرب موقف حصل معاك و أنت سايق ؟
الحقيقة كتير بس أغرب موقف واحد كسرت عليه غلط ما كنتش شايفه فى المرايا و اعتذرتله بعديها بإيدى بس الظاهر إنه ما كانش عاجبه فضلت إيد على الكلاكس باستفزاز و لا كأنه بيشتمنى بيه و بعد كده و هو بيعدى من جانبى شاورتله يهدى شوية ما حصلش حاجة و لا كأنى بقل أدبى لقيته راح مفرمل جامد و وقف قدامى بالعرض و نزل من العربية و هو بيدور على حاجة تقريبا يضربنى بيها لأن الشارع كان واسع و أنا حسيت إنه بنى آدم مجنون عديت من حتة ضيقة جانبه و مشيت ، ركب العربية و جرى ورايا لحد ما طريقنا اختلف أنا نزلت من تحت الكوبرى و هو كان مكمل فوق بعديها كان متابعنى و أنا بركن و أول ما ركنت لقيته و قف العربية فوق الكوبرى و كان شكله زى ما يكون هينط بيها عليا قمت مدور و متحرك لقدام كأنى ماشى راح مكمل و اختفى بعد كده. لحد اللحظة دى لا فهمت ده كله ليه و لا إبه اللى كان ناوى عليه الشخص ده و ربنا يهدى.

**mxz911** · 23-01-2010 03:26 PM

http://www.nilemotors.net/Nile/50609-a.html

**ali.mahmoud** · 23-01-2010 05:06 PM

- أتعلمت السواقة على عربية نوعها أية ؟
فيات 125
2- ماهى أول عربية خاصة بيك ؟
اوبل استرا
3- كان عندك كام سنة أول مرة سوقت فيها ؟
اولى اعدادى كده 12 سنة باين
4- أية أغرب موقف حصل معاك و أنت سايق ؟
الصراحة مش فاكر بس السواقة كلها مواقف غريبة

**د.محمد الشيخ** · 23-01-2010 05:25 PM

- أتعلمت السواقة على عربية نوعها أية ؟
تويوتا كريسيدا
2- ماهى أول عربية خاصة بيك ؟
دايو لانوس 99
3- كان عندك كام سنة أول مرة سوقت فيها ؟
12 سنة
4- أية أغرب موقف حصل معاك و أنت سايق ؟
اجرت عربية كيا برايد وكان اول مرة اسوق لوحدى بعد ما اتعلمت ...ركنت ونسيت المفتاح جواها وستر ربنا انى مكنتش قفلت الازاز بتاعى لاخره فكان فى مجال يسمح بدخول سلكة اشد بيها الموسوجر وربنا ستر .

**تامر.محمد** · 23-01-2010 08:36 PM

و عليكم السلام و رحمة الله و بركاته

المشاركة الأصلية كتبت بواسطة ama

1- أتعلمت السواقة على عربية نوعها أية ؟
نصر 127

2- ماهى أول عربية خاصة بيك ؟
لانوس1 موديل 99 , عربيتي الحالية :)

3- كان عندك كام سنة أول مرة سوقت فيها ؟
حوالي 20 او 21

4- أية أغرب موقف حصل معاك و أنت سايق ؟

هو الموقف اللي ما انساهوش ( رغم انه بقى بيحصل بكل تأكيد مع ناس كتير ) , بعد ما جبت عربيتي الحالية بأقل من شهر , كنت عامل الرخصة بقى لي بالظبط 3 شهور

كان العربية تيل الفرامل فيها ضاااااااااااااااايع , كانت فراملها اسوأ من فرامل ال127
و انا بنصاحتي بحكم اني عارف ان اللانوس فراملها مش قد كده كنت فاكر ان ده العادي و ماشي بيها على كده
و كان عادي يعني , ال127 كانت فراملها وحشة جدا فانا كنت بامشي باللانوس برده و بافرمل بدري و خلاص

بس اكتشفت عملي ان ده غلط جدا

في مرة كنت مروح من الشغل بالليل ومعايا اتنين زمايلي و ماشي على كورنيش المعادي بسرعة حوالي 80

فجأة لقيت بيجو 7 راكب كانت واقفة جنب الرصيف اتحركت و وقفت في نص الشارع قدامي بالظبط
و طبعا الفرامل كانت ضايعة

الخلاصة ان بستر ربنا و انا مفرمل على الآخر - و صريخ الفرامل دخل في صريخ اللي كانوا راكبين معايا - عرفت اوجه العربية للمسافة الضيقة اللي بين البيجو و بين الجزيرة اللي في وسط الشارع , و الحمد لله يا دوب كفت العربية
و وقفت العربية تماما , بعد ما عدينا البيجو بحاجة بسيطة

طبعا بعد الحركة دي انا و اللي معايا حمدنا ربنا اننا لسه عايشين و ماحدش فينا جرى له اي حاجة لدرجة اننا ما بصيناش حتى على العربية البيجو و خدناها من قصيرها و مشينا

و طبعا تاني يوم رحت غيرت التيل و الطنابير

**mohamedway** · 24-01-2010 10:44 AM

العربيه اللى أتعلمت عليها و إتعلمت فيها كمان كل حاجه عن ميكانيكا السيارات هى حبيبتى الفيات 131 و هى موجوده حتى الآن......... أول مره سوقت كان عندى 9 سنوات و لما كان عندى 12 سنه كنت بسوق عادى جدا زى اى حد و كنت ساعات بأعمل بالعربيه مشاوير بس فى الحالات الطارقه قوى عشان بابا كان قلقان من إنى أمشى بالعربيه بدون رخصه و أول ما أتممت 18 سنه طلعت رخصه و إنطلقت و تقريبا كنت عايش فى العربيه فتره ما بنزلش منها و بلف بيها سواء عندى مشاوير أو معنديش و من هذه النقطه بدأت خبرتى الحقيقيه بالسواقه و بدأت الجرأة على جميع المواقف و أصعبها و كنت فظيع فى الجرى بالعربيه بس مع الوقت الموضوع هدى شويه بس فضلت الإمكانيات موجوده و بأستدعيها كل ما أحتاجها و أنا دلوقتى عندى 30 سنه و لسه مجدد رخصة السواقه من سنتين و بسوق من قبل ما يبقه معايه رخصه أصلا.............إييييييه فكرتونى بأيام!!!!!!!!!!!!!!

سيارتى الخاصه حاليا لانسر 1600 مانوال موديل 2006

**ahmedsamir79** · 24-01-2010 12:53 PM

1-كابريس كلاسيك
2-سيتروين
3- 16 سنه
4-نسيت المفتاح وقفلت الباب عليه

**strongxx** · 01-02-2010 10:21 AM

أتعلمت السواقة على عربية نوعها أية ؟
هيونداي إكسيل موديل 1994 أوتوماتيك خليجي وكانت زيرو

ماهى أول عربية خاصة بيك ؟
فيات 128 موديل 1988

كان عندك كام سنة أول مرة سوقت فيها ؟
كان عندي حوالي 12 سنه وكنت بتعلم بطريقة غريبه شويه بس أفادتني كتير وهي إني كنت بركب العربيه وبعلم نفسي علي الواقف وببدأ اتخيل إني سايق وقال ايه إني عايز ادخل شمال الشارع الجاي وادور الدركسيون قال يعني ماشي واديها فرامل وبنزين بالظبط كاني مشغلها وماشي بيها بالظبط ومره واحده أقف قال يعني فيه حاجه حصلت قدامي زي مثلا عربيه وقفة مره واحده ولا عيل عدي مره واحده قصادي...وكان خيالي قوي جدا بدرجه كنت بخاف من نفسي

أية أغرب موقف حصل معاك و أنت سايق ؟
المواقف كتير ومنها :-
كنت ماشي بالعربيه الإكسيل علي طريق العامريه مع واحد صاحبي ولاقيت نقل بمقطوره قدامي والتانيه علي اليمين ومابينهم حته يادوب تعدي عربيه واحده وكانت بتضيق ساعات وبتوسع ساعات كانها لعبه جيم كومبيوتر قمت قارص بنزين وكاسر ما بينهم يمين ولقيت ظهر العربيه بيعوم مني علشان الرمله إلي جنب الرصيف المتكومه ولأجل ستر ربنا العربيه لمت نفسها وإلا كنت زماني فطيرة لحم بالصاج

الموقف التاني : أول مره أسوق فيها بشكل فعلي كنت سايق علي الطريق الصحراوي بليل الساعه 10 وكان معايا أبويا يوميها كانت أعصابي مشدوده لدرجه إني كنت مثبت إيدي علي الدركسيون جامد والعربيه تحدف مني يمين وشمال وكانت الناس بتسب لي مليون دين لاني كنت زي واحد سكران علي الطريق الصحراوي وأبويا يلطم جنبي وانا أعصابي مشدوده ومش عارف اتصرف ازاي وكان يوم ما يعلم بيه إلا ربنا وكنت سايق علي 80 بس كانت وقتها بالنسبه لي انتحار ومنتهي السرعه..لكن دلوقتي الراجل يحصلني..ههههههههههههههه

الموقف التالت : كنت ماشي علي الطريق الصحراوي بعربيه 128 بتاعت واحد صاحبي وكنت واخدها منه أسافر بيها القاهره وأرجع تاني يوم..وانا راجع بليل بيها بدأت أشم ريحت بنزين من الموتور..قلت يمكن علشان لسه مفول التانك.. ومره واحده الكبوت لاقيت من تحت نار طالعه والنار بتزيد بسرعه جدا كل ما ادوس بنزين حدفت العربيه علي اليمين علطول ودخلت في كومة رمل ونزلت منها جري لتفرقع ولا حاجه وانا جواها أبقي لحمه مشويه وقلت بقي أول ما انزل منها وأجري حتفرقع زي الأفلام وكان يوم مرعب وأستخبيت ورا عامود اعلان من الكبار دول علي الطريق وكنت مستني الإنفجار الكبير..وأستني يا جدعان وأستني ومافيش أي حاجه وطلعت كده براسي لاقيت غطا البنزين طق من مكانه والبنزين بيغلي جوه وبيفور وبيقع علي الأرض لحد ما العربيه خلصت وبقت علي الحديده....قلت لصاحبي انت حظك حلو علشان كده حتوفر تمن مصنعية شيل البويه القديمه ومش باقي لك غير السنفره وتعمل لها عمره عسل

الموقف الرابع: كنت ماشي علي الكيلو 21 من أوله وكان الطريق وقتها قبل التوسعه كان ضيق وانا ماشي لاقيت الطريق زحمه علي عربيتين نقل بمقطوره واخدين الحارتين اليمين والشمال جنب بعض ومافيش غير حته في النص تعدي عربيه واحده والناس كانت متكومه وراهم خايفه تعدي قمت ضارب كشاف عالي وقعدت أزمر ازمر علشان الناس توسع لي ادخل انا وبالعافيه لما وسعوا لي وكل واحد اعدي جنبه يقولي اتفضل ياخويه ما هيه واقفه حتروح فين يعني وعامل لي فيها سبع الليل وانا مسقع لهم الودان...وبكل جراءة دخلت في النص ومقلب نور وكلاكس قمت قارص مافيش ثواني وانا بعدي لاقيت صف العربيات إلي كان خايف يعدي كله ماشي طابور ورايا ..قعدت أضحك ضحك وكنت عايز اهدي وأرجع تاني واكررها تاني بس مكنتش فاضي بصراحه ألعب معاهم

وفيه كتير كتير كتير كتير اوي اوي

الموضوع: أتعلمت السواقة على أية ؟ أول عربية خاصة بيك ؟ كان عندك كام سنة ؟

LinkBack

أدوات الموضوع

عرض

-

-

-

-

-

-

-

المواضيع المتشابهه

عندك عربية يبقي لازم تعرف عالأقل فكرة عمل كل جزء بالتفصيل

اية عقوبة سواقة عربية اجرة برخصة خاصة ؟؟ذذ

تعلم مراتك السواقة و تجبلها عربية ولا لأ؟؟

عايزة عربية اتعلم عليها السواقة فى الاول

لو عندك عربية ادخل وجاوب .......

الكلمات الدلالية لهذا الموضوع

المفضلات

المفضلات

ضوابط المشاركة