الموضوع: حلم حققته وحلم ماحققتوش

المشاركة الأصلية كتبت بواسطة AshTurbo

والله المفروض سؤال حضرتك يبقى مين بيحلم من أصله ؟ ولا مين بقى ليه نفس يحلم ؟ .

الناس دلوقتي بقى حلمها تجيب رغيف عيش من غير ما تتبهدل في طابور مالوش نهاية ومش مشكلة العيش دة لونه أيه او طعمة عامل أزاي.. الحلم بقى أنك تتخرج الأول على دفعتك وبدل ما تحلم تبقى معيد أو دكتور في الكلية تحلم تلاقي وظيفة محترمة ومبلغ لا يقل عن 600 جنيه وتبقى ساعتها طماع ومش بترضى بقليلك وبتحلم لو فكرت في وظيفة بأكثر من كدة أو تحلم أنك تلاقي عيش حاف تأكل بيه أولادك ومراتك عشان 300 جنيه مش بتكفي أو تحلم أنك تشرب أو تاكل أو حتى تتنفس من غير مايجيلك سرطان ولا تسمم ولا أنفلونزا ولا ولا ولا .

حضرتك بتطالبي الناس تقول أحلامهم في وقت ماتت فيه الأحلام وبقى حلم واحد بس وهو أننا نصحى من الكابوس اللي أحنا فيه الأول وبعد كدة نحلم براحتنا ساعتها بس هاجي أكتبلك لستة أحلام ملهاش أول من آخر .

كلام بعضه صح فعلا بس ده مش بيمنعنا من اننا نحلم فى عز الازمة بنحلم على الاقل بحلول
بنحلم بمستقبل افضل بنخطف لحظات نتخيل فيها حياتنا افضل وبرده بنحلم بمستقبللنا زى ما احنا كنا نتمنى يكون دور جواك اكيد هتلاقى احلام كتير حتى لو الظروف صعبت عليك تحقيقها بس هى اكيد موجودة ولازم نحاول نحققها

وبالنسبة لظروف البلد انا مع الاسف ضد كل واحد قاعد يعترض ويعلق كل حاجة على ظروف البلد ياريت لو نسأل نفسنا الاول احنا عملنا ايه للبلد عشان تنسنى منها الاحسن او التغيير؟؟؟؟؟؟؟؟؟؟؟؟؟؟؟

ومادمت حضرتك معترض على ظروف البلد ومستنيها تتغير فاكيد بتحلم بشكل جديد لظروف البلد قولنا ايه حلمك ده (مش ده برده حلم؟)