الموضوع: تم بحمد الله تغيير علبة الدركسيون ... سريون 1.5 مو 2008

المشاركة الأصلية كتبت بواسطة أبو عبدالله

يا معاذ انا شايف ان الموضوع واضح
طول البارات ده تقريبا كان هو من ضمن اسباب وضوح الصوت
وعلشان كده تم تقصيره زي ما انت شايف في لفة الدركسيون كده

وبرضه الفرق مش كبير لدرجة ان الواحد يلاحظه في لفة العربيه على الارض والحمد لله برضه مالوش تأثير على حاجه
وانما هو في الأصل كان يعتبر اقل قطر دوران في العربيات غالبا

ابوعبدالله ... بعد اذنك هنمسك الموضوع حتة حتة.

بخصوص موضوع البارات

لو سلمنا جدلا ان الكلام اللى حضرتك بتقوله صحيح ... ليه الدركسيون بيلف فى حتة اكتر من التانية , و مش بس كده الزيادة اللى فى الناحية اليمين, نفس الكمية دى قلتها من الناحية الشمال !!!

لو البارات قصروها كانت قلت من الناحيتين, لكن دى حاجة مترحلة لناحية اكتر من التانية.

ده غير ان ان مهندس احمد عبدالوهاب مشكورا فعلا, ورانى صور التعديل اللى حصل بالظبط ... فميش اى حاجة عن تقصير و تطويل بارات.

مش بس كده, ده مهندس احمد عبدالوهاب لما شافها و بعد اما عملنا موضوع الزوايا و منفعش أكد انه ده شىء مش طبيعى و المهندسين كمان هناك, و المفروض هيتظبط يوم الخميس... يعنى لو كان عادى زى ما حضرتك بتقول كان قالى كده (و ده اسهله و يريح دماغه) ... لكن ده اعتراف ضمنى منهم ان فى حاجة مش مظبوطة.

اما بقى انها تأثر او لأ ... ليه انا متبقاش العربية عندى مظبوطة حتى لو الموضوع مش مؤثر على اى حاجة؟!!! ...يعنى ليه اوديها معدولة, و ارجع بيها مش معدولة. انا تقبلت انى اروح يوم و الموضوع ميتعملش, و اروح مرة تانية, كل ده علشان اظبطه و علشان الحاجة تبقى زى ما هيا, و اظن ده حقى.

واحنا قولنا فعلا ان العربيه تعتبر عفشتها من الأمام ناشفه شويه
ولكن من الخلف جميله
والعربيه بصراحه بحب احملها لأن لما بحملها العربيه بتاخد وتدي كويس قوي مع المطبات

اما احساسك بالأصوات حاسس انه داخل فيه حاجه نفسية شويه
يعني حاول تنسى شويه

لأن بصراحه في كلام لما بيزيد عن حد معين
القارئ بيحس بضخامة للكلام
ممكن احنا منكنشي حاسين بها واحنا بنتكلم
يعني ممن واحد يحس ان احنا ماشيين بنهربد بالعربيه وسامعين مولد في العربيه من تحت
يعني انا شايف ان الأصوات دي شئ طبيعي غالبا في بلدنا لأن فعلا غالب الشوارع مقرفه
فالواحد بيحس انه ماشي بيتهربد كتير في المشوار الواحد

دلوقت حضرتك سبب التعديل و الهيصة دى كلها كان على صوت واحد بس, الا و هو "صوت التخبيط اللى كان بيحصل عند المرور على ارض معرجة"

ده اللى احنا لم نتقبله, و اظن حضرتك لم تتقبله برضه بدليل انك رحت و غيرت العلبة, يعنى لو مكنش مزعج لك, كنت مشيت بالعربية زى ما هيا.

العربية اصوات العفشة فيها زيادة عن المتوسط, ده باعتراف معظم مالكيها, و التوكيل نفسه, و عادى احنا بنتكلم على عربية فى فئة سعرية مش عالية, مش متوقع تكون مرسيدس او Bmw

بس فى ناس بيفرق جدا معاها الموضوع, و ناس تانية الموضوع مش مؤثر خالص لها, ده اختلاف ازواق و طباع.

الواجب علينا كملاك ننقل الصورة كاملة, مش الحلو بس منها, و القرار فى الاخر للقارىء, هل هو متقبل الموضوع ده او لأ.

انا طبعى انى محبش اسمع صوت و انا قافل العربية و الحمد لله فى اكتر من عضو معانا هنا فى الدايهاتسو نفس الصفات دى. و اى صوت كنت سابقا بعتبره خلل... لكن مع السريون تأقلمت مع اصوات التابلوه و التزييق و كده, لكن فى الصوت الرئيسى اللى اشتكينا منه مكنتش متأقلم معاه لأنه مزعج, و الحمد لله اختفى الى حد كبير.

بس عني انا
انا معنديش مشكلة في العربيه والحمد لله لحد الأن
والأصوات تعتبر اختفت تماما
اما اللي شايف اصوات في العفشة فممكن يروح يربط كويس العفشة ويجرب بعدها وان شاء الله يكون خير وتربيط بس

ربنا يبارك لحضرتك فى عربيتك و يسعدك بيها يوم بعد يوم.

بس لى سؤال اخير ... هل حضرتك شفت فعلا الدركسيون بيلف فى حتة اكتر من التانية و لا لأ؟ ... لأنى طلبت من حضرتك تشوف الموضوع ده, بس ممكن حضرتك ملاحظتش الطلب ده فى الصفحة اللى فاتت ... يا ريت حضرتك تشوف و تقولنا.

بص يا معاذ
أولا احب ان اوضح ان الكلام السابق ده انا قولت احتمال
يعني دي احتمالات بتيجي في دماغي من اللي انا فاهمه وشايفه يعني مش كلام مؤكد ميه في الميه
ممكن يكون صح وممكن يكون غلط
ولكن على المعلومات اللي بعرفها بحاول افسر الموضوع

أولا موضوع ان البارات اشمعنى واحد هيبقى مش زي التاني لسبب واحد
وهو ده اللي خلاني اقول الكلام السابق ده لما لقيت ان في لفة للدركسيون اكبر من الناحية الأخري له
ولاحظت ان اللي قصرت هيا اللي في الناحية اليمين
فلقيت الموضوع مناسب لسبب واحد الا وهو شكل علبة الدركسيون
علشان البار اليمين بعيد عن مكان ادارة الحركة اللي جاي من الدركسيون كما في الصورة



وده معناه ان البار اليمين في الأصل اطول من اليمين في الطول فقط
ولكن في اللفات طبعا كان مظبوط
ولكن ده تقريبا كان بيخلي البار اليمين واخد مسافة كبيره عن مكان أخذ الحركة اللي هو تحت الدركسيون بالظبط
وطبعا كلنا اكيد عارفين ان مع طول البار اكيد اي حركة للعجلة الى الأعلى او الى الأسفل هيبقى تاثيرها عالي على البار ده بما انه اطول من الشمال
يعني بمعنى انه هيبقى محتاج اكتر من مفصلة له بمعنى اصح
وده برجحه ايضا لأن الصوت كان دائما بيأتي من الناحية اليمين اكتر من الشمال فعلا
فتقريبا هما قللو خروج البار اليمين من علبة الدركسيون بحيث يكون المفصلة الوحيده اللي موجوده فيه قادرة على امتصاص الصدمات بقدر كافي
ولو تفتكر ان اول رد لليابان على المشكلة ان العربيه متصممه صح والمشكلة عندنا في المطبات
واظن انهم قللو الخروج ده الى حد معين علشان تفضل ميزة العربيه في مسألة قطر الدوران لسه موجوده وفي نفس الوقت تم تقليل الصوت او تقليل احتمالات صدوره لأن التحميل على المفصلة اللي موجوده تحت الجلد زي اللي موجود في الصورة كده
وده ممكن يكون السبب انكم حاسين ان فيه صوت بس على خفيف
لأن مع الحركة الجامده للعجل ممكن يحصل تحميل او قرص على المفصلات دي برضه فبتعمل صوت بس اخف من الأول لأن البار اليمين معدشي خروجه زي الأول وبالتالي تأثيره بالصدمات قل عن الأول
وده تخيلي للموقف مش اكتر ولا اقل


وعلى فكره انا شوفت عربيتي لقيت هناك فارق يكاد يكون طول عقلة صابع يعني حاجه بسيطة مش زي عندك كده يا معاذ

وعلى فكره يا معاذ انا تقريبا عندي اللفات زياده عنك حوالي ربع لفه يعني انت عندك لفه ونص تقريبا
انا عندي لفه وثلاثة ارباع لفه

انا راجعت الفيديو بتاعك تاني يا معاذ
تقريبا الفارق هو هو زي اللي عندي

بس انا زي ما سبق وقولت
اللفات عندي ازيد من عندك
يعني انت الدركسيون بيقف عندك لما يبقى مقلوب
انا عندي بيقف لما يبقى عمودي وليس افقي

وانا كمان عندي زي ابو عبدالله لفتين وثلاث ارباع الظاهر 2007 كده

المشاركة الأصلية كتبت بواسطة أبو عبدالله

انا راجعت الفيديو بتاعك تاني يا معاذ
تقريبا الفارق هو هو زي اللي عندي

بس انا زي ما سبق وقولت
اللفات عندي ازيد من عندك
يعني انت الدركسيون بيقف عندك لما يبقى مقلوب
انا عندي بيقف لما يبقى عمودي وليس افقي

شكرا لك يا ابوعبدالله انك شفت الموضوع فى عربيتك.

كده الخمس عربيات اللى غيروا العلبة فى التوكيل عندهم نفس الموضوع.

ان شاء الله يوم الخميس المفروش هروح , و اتمنى الموضوع يتظبط و بعد كده الموضوع يبقى تمام فى التوكيل لأى حد محتاج يغير العلبة.

هو فعلا فى 2007 بتلف ربع لفة زيادة عن 2008 ... اما السبب ايه, الله اعلم.

بخصوص شرح حضرتك اللى فى المشاركة اللى قبلها. انا معلوماتى الميكانيكية مش كافية انى اقدر احدد سبب للموضوع ده ... بس لما اروح الخميس ان شاء الله هسألهم هناك.

انا بس عاوز اعلق على نقطة صغيرة جدا:

وده معناه ان البار اليمين في الأصل اطول من اليمين في الطول فقط
ولكن في اللفات طبعا كان مظبوط
ولكن ده تقريبا كان بيخلي البار اليمين واخد مسافة كبيره عن مكان أخذ الحركة اللي هو تحت الدركسيون بالظبط
وطبعا كلنا اكيد عارفين ان مع طول البار اكيد اي حركة للعجلة الى الأعلى او الى الأسفل هيبقى تاثيرها عالي على البار ده بما انه اطول من الشمال
يعني بمعنى انه هيبقى محتاج اكتر من مفصلة له بمعنى اصح
وده برجحه ايضا لأن الصوت كان دائما بيأتي من الناحية اليمين اكتر من الشمال فعلا

الصوت اللى كان بيظهر عندى و عند ا/ياسر و عند ميدو و هيثم كان ناحية الشمال مش اليمين , و بعد التعديل الصوت عندنا بقى يطلع من الناحية اليمين... لكن الحق يقال على الاقل عندى بيظهر بيظهر قليل جدا

حضرتك علشان تتأكد راجع مشاركة أ/ياسر, و راجع الموضوع القديم اللى ناقشنا فيه الموضوع ده علشان تتأكد.

فى كل الاحوال, يوم الخميس ان شاء الله اتمنى نعرف ايه سبب الموضوع ده, و فعلا بتمنى مع تظبيط عوجة الدركسيون الموضوع ده يختفى ... يا رب

يوم الخميس 23 ابريل كنت حاجز علشان استكمل تعديل الدركسيون.

وصلت هناك 9 و نص, و مشيت من هناك على الساعة 4 العصر.

الموضوع اخد وقت طويل شوية.

فى الاخر العربية خرجت الى حد كبير معدولة, يعنى الفرق بين الناحيتين لا يتعدى 1-2 درجة, و مهندس احمد عبدالوهاب قال ليا ده اخرها, اكتر من كده الزوايا مش هتبقى مظبوطة.

لما خرجت جربتها, الزوايا مش مظبوطة اوى, يعنى الدركسيون معوج حاجة بسيطة علشان العربية تمشى مستقيمة.

بالاضافة الى كده, الصوت زاد درجة سمعى له , يعنى كنت الاول بقول 95% من الحالات مبيظهرش, دلوقت ممكن نقول وصلت لدرجة 80% تقريبا, و بلغتهم بالكلام ده فى مركز الصيانة.

انا عندي الصوت خف كتير لاكن في عيب ان الناحيتبن مش قد بعض بس ده احسن بكتير من وجود الصوت وانا راضي بهذا الوضع احسن ما اروح ويرجع الصوت تاني ولا الزوايا تبوظ كده احسن