الموضوع: أزاي أعرف أن كهربة الـ (splitter) مضبوطة علي 80 أو 90

ايه يا باشمهندزين ... أي حد يقولنا أي حاجة !!

فى الواقع انا اول مرة اسمع ان الكهرباء بتتظبط على حسب البنزين
كان نفسى افيدك ولاكن هنستنى اهل الخبرة فى الموضوع ده
انا منتظر معاك

يا معلم المعلمين
موضوع ال 80 و ال 90 طبعا لازم يكون في فرق
و موضوع الكهرباء بيظبطها الميكانيكي مش انت و برده المفروض يفتح الكربراتير سنة صغيرة
يعني يظبطلك كهرباء و يظبط كربراتير و انت مش هاتحس بالفرق
و طبعا لما تروح لحد يظبط مش يقولك تمام كدة تقولة سلامة عليكم
لا المفروض يظبط و انت تطلع تجرب و تشوف و ترجع تاني تقولة اذا كانت العربية كويسة ولا لا
عاوزة كهرباء فيها كهرباء زيادة مكتومة محتاجة فتح في الكربراتير بتنحر محتاجة يقلل الكربراتير و هكذا

ضبط الموزع (الاسبراتير) او بكلمات اخرى تغير زاوية تقديم الاشعال او ما نقول عليه بشكل دارج ظبط الكهرباء، هو ببساطة تغيير الفارق الزمنى بين لحظة الاشعال ووصول المكبس الى النهاية الميتة العليا (اعلى نقطة فى مشوار المكبس) فى نهاية شوط الانضغاط ، عادة تصمم السيارة بحيث يتم حدوث الشرارة قبل وصول المكبس الى نهايته الميتة العليا بخمسة الى عشرة درجات (على اعتبار ان اللفة الكاملة لعمود الكرنك والتى يقابلها مشوار كامل للمكبس نزولا وصعودا هى 360 درجة وبالتالى فكل درجة تساوى 1/360 من الدائرة الكاملة)،

ضبط زاوية الشعال يدويا هى خاصية مرتبطة بالسيارات القديمة، حيث ان معظم السيارات الحديثة تقوم بتعديل زاوية الاشعال الكترونيا، كما ان بعض موديلات السيارات الحديثة لا وجد بها اسبراتير اصلا وانما بوبنة منفصلة لكل بوجيه يتم ابلاغها بموعد الشرارة بمعرفة وحدة التحكم Ecu

فكرة ضبط الاشعال يدويا فى السيارة القديمة هى ببساطة تغيير وضعية رأس الموزع(وش الاسرباتير) الى عمود التوزيع( الشاكوش) مما يؤدى الى تغير اللحظة التى يحدث فيها التلامس بين طرف الشاكوش ونقطة تلامس السلك الحص بكل بوجيه منسوبة الى لحظة وصول المكبس لنقطته الميتة العليا، ويتم ذلك عن طريق تحرير وش السبراتير بتهوية المسمار الذى يحكمه ، ثم لف الوش فى اتجاه عقارب الساعة او عكسها بقيم زوايا بسيطة جدا لا تزد عن درجتين فى المرة الواحدة، لا يشترط ان تكون الحركة مع عقارب الساعة تمثل تقديم الزاوية وضد عقارب الساعة تمثل تأخير الزاوية، او العكس، حيث ختلف ذلك بحسب تصميم كل محرك واتجاه دورانه، لكن يعرف ذلك بالتجربة او من كتالوج السيارة او بفك وش السبراتير وملاحظة اتجاه حركة الشاكوش عند تدوير المارش او تعشيق السيارة على الرابع ومحاولة دفعها وهى مبطلة ومعشقة، حيث يكون تدوير الوش فى نفس اتجاه دوران الشاكوش تأخيرا لزاوية الاشعال(بنوطى الكهرباء بلغة الميكانيكية) فى حين يكون تحريك الوش فى عكس اتجاه دوران الشاكوش تعلية للكهرباء

تقديم زاوية الاشعال يعطى الفرصة لوقت كافى للاشتعال والحصول على طاقة الوقود قبل وصول المكبس الى نقطته الميتة السفلى فى نهاية شوط الاحتراق مما يرفع من اداء وكفائة المحرك، لكنه فى نفس الوقت يعطى الوقت والفرصة للوقود لتكوين موجات انفجار ذاتى تصطدم بالموجة الرئيسية المنتشرة من نقطة البوجيه فيما يسبب ما نعرفه باسم التسقيف او الصفع وهى ظاهرة ضارة جدا على المدى الطويل، اما تاخير زاوية الاشعال فهو يقلل من فرصة حدوث الصفع لكنه لا سمح للوقود بوقت كافى للاحتراق والاستفادة بطاقته مما يقلل من عزم المحرك واستفادته بالوقود، ظاهرة الصفع ظاهرة ترتبط بعدة عوامل من اهمها رقم الأوكتان فى الوقود المستخدم، ولذلك فانه كلما انخفض رقم الاوكتان المستخدم فى الوقود وجب علينا تأخير زاوية الاشعال بما يتناسب مع نوعية الوقود لمنع حدوث الصفع، متقبلين تماما فكرة اننا نهدر جزءا من طاقة الوقود بسبب تأخير الاشعال ،لكن ما باليد حيلة لان تقديم الاشعال سيسبب الصفع، اما مع استخدما وقود ذو رقم اوكتان اعلى نستطيع تقديم الاشعال والاستفادة بقدر اكبر من طاقة الوقود الفعالة دون صفع

يبقى لدينا ان نعلم بعض المعلومات المفيدة، منها ان السيارات المتوسطة وفوق المتوسطة من السيارات الحديثة فيها حساس للصفع (عبارة عن خلية بيزوكهربية-يماثل فى فكرته الخلية المستخدمة فى ميكرفون الكومبيوتر المستخدم فى التشات- هذة الخلية تستجيب وتصدر نبضات كهربية عند تردد صوتى محدد هو الذى يصدر من المحرك فى حالة التسقيف)يحفز وحدة كونترول السيارة لتقوم بتعديل زاوية الاشعال اوتوماتيكيا ولذلك فان هذة السيارات تستطيع التأقلم مع اكثر من درجة من درجات الوقود دون تدخل بشرى لضبط الكهرباء او خلاف ذلك ، اما المعلومة الأخرى المفيدة انه قد يحدث احيانا ان تبدأ السيارة بالتسقيف بعد تفويلها مباشرة برغم استعمال بنزين بنفس درجة الأوكتان المعتادة ، وهذا معناه فى 99% من الحالات ان البنزين ملوث بالماء وهنا ينصح باستخدام السارة بدون قرص حتى نفاذ التفويلة ثم التعامل مع محطة بنزين اخرى موثوق بها

بجد جزاك الله خيرا يا بشمهندس سبعاوى

وزادك من علمه ,, اّمين

لا تسعني الكلمات أن أوفيك حقك الواجب و شكراً و عرفاناً أيها الباشهمندز سبعاوي
شرحك الوافي ، الواضح ، الدقيق ... و الكريم ... ماقدرش اعمل حاجة غير أني أنحني لك أحتراما يا هندسة


و لو فيها تقالة أسمحلي بكام سؤال صغيرين
أولا: بتصرف من موضوع سيادتكم السابق بعنوان : أنواع البنزين المستخدم في السيارات والرقم الأكتاني وعلاقته بنسبة إنضغاط المحرك

لو أن نسبة الإنضغاط منخفضة مثل الشاهين وال 128 والادا فعليك أن تمونها بنزين 80 وأنت مطمئن أنها ستعطي آخر قدرة لها بدون مشاكل بمعني ن السيارة ال 128 موتورها قديم وبالتالي نسبة إنضغاطه منخفضه إذن الأفضل أن تضع له بنزين ذو أقل رقم أوكتاني يعني 80
ولو وضعت بنزين برقم أوكتيني أعلى من 80 تصبح كأنك ترمي فلوسك في الهواء بدون مبالغة

هل معني كده أن عربيتي الـ 127 لو مضبوطة ... بنزين 90 مش هايزود من كفائتها ؟ ... طب لما مونتها بنزين 90 أدائها اتحسن بطريقة ملحوظة ده يعني كده أن الأشارة الكهربية كده ماكتنش اصلا مضبوطة علي 80 ؟

ثانيا :

عادة تصمم السيارة بحيث يتم حدوث الشرارة قبل وصول المكبس الى نهايته الميتة العليا بخمسة الى عشرة درجات

واضح من كلامك ان دي هي الزاوية المثلي ... كيف يمكن للميكانكي ان يضبط الموضوع ده علي 15 درجة بالضبط ؟! ... علي ماعتقد ان الميكانيكي هايضبطها اللاوي (بالأحساس كده ؟) ولا فيه طريقة قياسية لعمل الموضوع ده
لاني قريت في مجلة ريفية أن فيه جهاز اسمه Timing light بينور فلاشات و اشتغالات كده عشان تضبط عليه ... هل ده موجود ولا خيال علمي ؟!

ثالثا و اخيرا :

تقديم زاوية الاشعال يعطى الفرصة لوقت كافى للاشتعال والحصول على طاقة الوقود قبل وصول المكبس الى نقطته الميتة السفلى فى نهاية شوط الاحتراق مما يرفع من اداء وكفائة المحرك، لكنه فى نفس الوقت يعطى الوقت والفرصة للوقود لتكوين موجات انفجار ذاتى تصطدم بالموجة الرئيسية المنتشرة من نقطة البوجيه فيما يسبب ما نعرفه باسم التسقيف او الصفع

أفهم من كده أن لو عربيتي مابتسقفش تبقي مضبوطة وخلاص ؟ واقيس ده أزاي .. يعني لما أديها الرابع علي 20 لازم تسقف (ده طبيعي) ... لكن لما أكبس بنزين في مطلع علي الأول و تسقف ده يبقي طبيعي؟ . وهل لو مابتسقفش يبقي كده العربية بتعطي أحسن أداء ممكن للمحرك ولا ممكن يكون فيه أحسن ؟

أسف علي الأطالة و أشكرك مرة تانية

روكي

أنا لسه مستني ردك علي الاستفسارات الأخيرة يا باشمهندز سبعاوي ...
ياريت ماتنساناش يا باشا
...