مقالب

**Samah AbdAllah** · 18-04-2009 04:43 PM

مقالب x مقالب

اعضاء نايل موتورز الكرام استكمالا لسلسلة مواضيعى الترفيهيه
ده موضوعى الجديد مقالب x مقالب
المطلوب من كل عضو يحكيلنا على مقلب دمه خفيف عمله فحد وياريت كمان مقلب اتعمل فيه.
وبما ان معظم الاعضاء شباب ماشاء الله فاكيد هنلاقى مقالب كتير

وهنقدم جائزة لصاحب اظرف مقلب واللى انتوا اكيد هتختاروه
يلا نبدأ........

اكيد ناس هتقول انى نسيت اقول ايه هى الجائزة
لا مش نسيت بس خلوها مفاجأة

**pro_samir** · 18-04-2009 05:54 PM

بصراحة مهما تتحكى عمرها ما بتكون بجمال الواقع فى الموقف نفسة

مش فاكر حاجة قوى بس افتكرت موقفين سريعا
فى الشغل كنا جايبين نسخ ويندوز اوريجينال و واحد صاحبنا استلمها عهدة ومضى عليها وهوا دماغ شوية .. مضى وحتى مشالهاش من على المكتب وخرج معرفش راح فين .. طبعا خبيناها وقتى هههههههه بس دة مكانش مقلب على قد ما كنا عايزينة يتلم يعنى ويفوق

مرة من عشر سنين تقريبا كان عندنا عربية فولفو وزيت الفرامل كان ناقص لدرجة ان الدواسة 90% مش بتمسك والباقى بيفرمل كويس

كنت فى الشغل و واحد رخم عليا علشان اوصلة ومكنتش قادر .. المهم بعد ما اتحركنا قالى على مشوار عايز يروحة الأول وكان فى طريق المشوار دة كوبرى علوى قلتلة ماشى بس بص الفرامل عاملة ازاى وفضلت ادوس فرامل على الأخر قدامة والعربية ماشية زى ما هيا ههههههه
قالى طب خلاص وصلنى على طول مش مشكلة المشوار

قلتلة لا والله أبدا انت تؤمر ههههه

وجينا بقى فى منزل الكوبرى واخرة فية اشارة والعربيات واقفة سادة منزل الكوبرى وانا نازل بسرعتى ههههه

ودة يا عينى متنح ومرعوب مبينطقش وانا عمال اتفرج علية فى المراية وماسك نفسى بالعافية .. لحد ما لاقيتة خلاص والله كان ايدة على اوكرة الباب وهينط روحت مفرمل على اخر لحظة ههههه

بالنسبة للجايزة بتاعتك فهيا اكيد هتطلع اكبر مقلب فى الموضوع دة ههههه

**نور القمر** · 18-04-2009 06:57 PM

لا خلي بالك المقالب مش حكرعلى الشباب بس
هقولكم على مقلب
بنت عمتي كانت مخطوبة وخطيبها سافر الكويت
مسكت موبايلها وغيرت اسمي عندها وخليته على اسم خطيبها
وبعتلها رساله بنهي فيها كل اللي بينا
مقلب رخم انا عارفه بس ضحكنا عليه جامد لما عرفت اني انا اللي وراه

ولسه ياما في الجراب يا حاوي

**A.Saad** · 18-04-2009 07:33 PM

كنا فى اولى كلية
انا كنت قاعد مع واحد صحبى فى البنش
ولقيت واحد قدامى معاه جراب نظارة نفس شكل جرابى
قمت مخبى بتاعى وقايل لصاحبى الواد اللى قدامى خد جراب نظارتى
الواد صحبى قام نده عليه ودخل فيه شمال ةازاى تاخد الجراب وعيب كدة
وبعدين انا بكل براءة قمت قايله
جرابى معايا ، انت مالك بيه :POINTI~2[2]:

برده فى الكلية كنت دايما انشل الاقلام من جيوب زمايلى وما يحسوش
ومرة قمت ناشل قلم من جيب زميلى وحطيت له قلمى
جه ياطلع قلمه ، لقى قلم تانى

انا صوتى وصوت بابا فى التليفون قريبين جدا
مرة عمتى اتصلت فانا رديت عليها وكلمتها على اساس ان انا بابا وهيا كانت عايزة منه خدمة
قمت قايل لا مش عامل حاجة وانتى طلباتك كترت وانا مش فاضى والواحد مش فيه صحة وكدى يعنى وهيا عمالة تتحايل وتقوله طب علشان خاطر نينية
فى الاخر قلت ليها خدى بابا معاكى
من قسوة الموقف بابا بيقولى دى عيطت

**SHNORY** · 18-04-2009 08:00 PM

فكرتوني والله باللذي مضي ومازال
مره واحنا في ثانوي كان معانا واحد صاحبنا طلبت معايا اعمل فيه مقلب
بعتت واحد من زمايلنا لف المدرسه كلها لحد ما جابلنا صورته من واحد صاحبه
روحتنا طالعين علي مركز كمبيوتر بتاع واحد صاحبنا وكتبنا ورقت
بتقول ان فلان الفلاني ده هربان من مستشفي الامراض العقيله
وان حالته خطر ومحدش يقرب منه واللي يشوفه يتصل فورا بالنجده لانه مجنون خطر
وروحت مصورها 50 صوره وكام علبه صمغ والساعه 11 بالليل كانت متوزعه علي باب المدرسه والشوارع اللي حواليها وعلي كل الطرق المؤديه للمدرسه
وطبها الفاعل فضل مجهول لفتره
فلاقيته قاعد بيعيط في الفصل جيت جنبه قولتله مالك
قالي وانا جاي الصبح عيلين صغيرين لقيت واد منهم بيقول لصاحبه ابعد عنه دا مجنون
والناس بتشوفني وتجري ههههههههههههه
وقعد كام يوم بعدها مجاش المدرسه مش عارف ليه
تقريبا كان واخد برد وقعد في البيت
لما افتكر مقلب تاني حبقي احكيلكم

**SHNORY** · 18-04-2009 08:36 PM

مقلب تاني افتكرته بس دا كان في ناس كتير مش في شخص واحد
ايام الكليه
كان مجمع الكليات موظفين الامن فيه بيمشوا الساعه 2 الضهر
فقولنا نطلع نعمل كمين علي باب حقوق مساعده مننا لاداره الجامعه في تنظيم الحركه الطلابيه
المهم
انا وواحد صاحبي وقفنا علي اننا ظباط بنضارات الشمس والحلاقه الميري
واتنين عملناهم مخبرين (كانو فعلا شبه المخبرين)
واتنين عملوا موظفين
واللي كان يعجبنا (طبعا فاهمين المقصود بكلمه يعجبنا)
ندخله من باب حقوق واللي ميعجبناش نخليه يروح لباب كليته ودي فيها حوالي 500 متر مشي
فضلنا حوالي ساعه علي الحال ده من سحب كارنيهات للم بطايق الناس
وهوووووووب
كبس علينا الامن
بكل سذاجه لفيت ضهري انا وصاحبي كاننا واقفين علي السور عادي وولعنا سجارتينولا كاننا لينا علاقه باي حاجه
واخدوا باقي اصحابنا هههههههههههههههههه(المخبر� �ن والموظفين)
مش فاكر بصراحه مين اتسحب كارنيهه ومين اتعمله محضر
حد قالهم يسمعوا كلامي ههههههههههههههه
لو افتكرت حاجه تاني حقولكم

-

-

-

الموضوع: مقالب

LinkBack

أدوات الموضوع

عرض

مقالب - انشر الموضوع فى :

-

-

-

-

المواضيع المتشابهه

ما الدنيا إلا سلسلة مقالب كتير

فيديوهات مقالب

مقالب كتيرة --- تغيير المود

أحداث مقالب الجين تو :)

احدث مقالب البيجو

الكلمات الدلالية لهذا الموضوع

المفضلات

المفضلات

ضوابط المشاركة