الموضوع: ### رابطه مالكى و عشاق الشاهين و الدوجان ###

امبارح الحمد لله ركبت ثرموستات الكوعة بعد مرازية للميكانيكي و قعد يقولي دا انا لسه شايله لشاهين زيك كانت بتسخن و باقت بعديها زي الفل, و قالي الناس بتشيله و انت عاوز تركبه ! قلتله يا سيدي ركبه بناء على طلبي و ملكش دعوة و هديك في الآخر فلوسك عادي جدا ! و قعدت اقنع فيه و قلتله طالما الثرموستات بيسخن العربية زي ما بتقول ليه مش بتشيله من العربيات الجديدة زي الهيونداي او غيرها ؟ معرفش يرد.

نيجي بقى بعد التركيب مؤشر الحرارة بقى بيرفع واحدة واحدة أسرع من الأول و لما الحرارة وصلت لل ٩٠ لقيت الحرارة بتنزل تاني لحادة قبل ال ٨٠ بشوية (ما هو الثرموستات اتفتح و ماية الريداتير ابتدت تدخل ) و بعد كدة ابتدت تعلى تاني لحادة ال٩٠ و نزلت تاني و هكذا لحادة ما وصلت لل ٩٠ تاني و بعد كدة مروحة الريداتير اشتغلت ( لأن الماية في الريداتير وصلت لدرجة تشغيل المروحة) و فضلت شغالة لحادة ما فصلت.
كل دا حصل و العربية على السلانسيه.

بعد كدة مشيت بقى بالعربية في الزحمة الي لاحظته المروحة بتشتغل و بتفصل و بعديها ب ٢٠ ثانية تاني تشتغل تاني مش عارف هل دا طبيعي و لا لأ بس اعتقد ان دا بسبب ان ثرموستات المروحة بيشتغل عند ٩٠ و بيقفل عند ٨٠ قأعتقد لو جبته ٩٢-٨٧ مش هتحصل المشكلة دي.

انهاردة الصبح رحت الشغل و شغلت التكييف و الحرارة ما شاء الله فوق الممتازة و معليتش عن ال ٩٠ نهائي.

خلاصة الموضوع انا انصح بتركيب الثرموستات لأنه جزء أساسي و نازل مع العربية و محدش يصدق الصنايعية لأن التفسير الوحيد لكلامهم بتاع السخونية ان هما دايما لما حد بيجيلهم و يشتكي من السخونية ان الثرموستات بيبقى قافش فبيريحوا دماغهم و بيشيلوه و دا غلط بدل اما يجيبوا واحد جديد و يغيروه و دا الصح. و لو الثرموستات شغال سليم و العربية بتسخن يبقى عمر ما يكون الحل انك تشيله لأن العيب من حاجة تانية غيره.

في النهاية في حاجة لاحظتها ان الراجل و هو بيغيرلي الكوعة فجبت الكوعة القديمة (الأصلية الي كانت راكبة في العربية) و كان مكتوب عليها
Fiat Lancia
و درجة الحرارة 97C
فبالتالي الثرموستات الي ركبته ابو ٤٠ جنيه ماركة Thermax مش الأصلي بتاع العربية مع ان الي اشتريته منه قالي دا اصلي بس كالعادة نعمل ايه في كذب او جهل البياعين.