الموضوع: هل فعلاَ لو معاك 80 الف تروح تجيب سيريون

ارجو من الناس سعه الصدر و العقلانيه لأن في كلام كتير كان نفسي اكتبه من زمان بس محبتش اكون اول واحد يفتح الموضوع ده.....
المهم
السيريون موديل 2007 و 2008 الشكل الجديد بتاعها ده, ازاي اصلا نقول عليه هاتشباك ( ده فعلا سؤال!!) الهاتش باك في موديلات العربيات زي البوينتر و السكودا فيليشيا و الدايو جوليت و السوبارو الهاتش الجديده و البي ام الهاتش باك و اللي زيهم في شكل انحنائه الشنطه بزاويه منفرجه من السقف الي الخلف هو ده الهاتش باك
لاكن هل ينفع (و ده سؤال كمان ) نسمي السوزوكي التو و الماروتي و السيريون هاتش باك بردو؟!!!
و بعدين 76 الف كسعر مبدئي يتصاعد لحاجه و تمانين الف و نقول احسن عربيه في فئتها السعريه يبقي كلام مش مظبوط....... ليه؟
لأن السوق مليان عربيات اخري بأسعار من حاجه و تمانين( اعلي السيريون) لغايه ال 76 الف ( اقل سعر ليها)
و علي سبيل المثال لا الحصر:
1- لانوس كامله
2- لانوس هاف اوبشن
3- افيو ( معرفش كامله ولا لاء)
4- كليو
5-نوبيرا
6-فيفا
7- بونتو
8-هوندا سيتي 1300

وده طبعا رينج الزيرو لاكن لو بشتري و باخد القرار علي اساس السعر فممكن اجيب كسر زيرو ( و طبعا بالكشف في التوكيل) ممكن تجيب كسر زيرو زي الزيرو تمام و الكلام ده يخلي في عربيات اكتر من اللي قولتهم يبقو متاحين لحد معاه المبلغ ده.....
1-ماتريكس
2-افيو (فل اوبشن)
3-اوبترا
4- جين تو

يبقي بلاش كلام عن العربيه دي كأحسن خيار في فئتها السعريه , حتي لو دخلنا في موضوع الاوبشنز و الاستابلتي ليه؟؟
لان الجين تو موجوده و بكل الاوبشنز دي و اوسع و صاج محترم و شكل رائع, و بعدين استابلتي بتاعت السيريون لازم تكون جامده ليه؟؟؟
لأن الارتفاع و ابعاد العربيه لا تميل للجنوح في الملفات و المنحنيات و في مهندسين هنا في المنتدي ممكن يعلقو علي كلامي ده
و بالنسبه للامان فأي امان مع اصطدام خلفي؟؟؟
دي الشنطه بتاعتها مفيش
و الناس كانت بتعلق علي ضيق شنطه الماتريكس!!!!
يبقي اي منطق يقنعني ان شنطتها واسعه و زي الفل؟!!!!
و امكانيه طي الكنبه الخلفيه علشان تاخد متاع اكبر فالموضوع ده مش هيبقي مناسب للبني ادمين المفترض سفرهم معي
و قبل ما الناس اصحاب العربيه ينهالو علي بالهجوم, احب اوضح حاجه, الناس اللي في المنتدي بيسئلو علي عربيات مش معاهم ولا مع اصحابهم يعني غير شكلها من بره ميعرفوش شيء نهائي, وده بيتطلب احساس رهيب بالمسؤوليه و احنا بنجاوب عليهم علي اساس ان كلامنا معاهم ده هيدفعو عليه فلوس و ممكن جدا مجرد انبهار او اعجاب صاحب عربيه بحاجته( شيء طبيعي في النفس البشريه ) يخلي شخص ما يتورط في العربيه و بعدين يكتشف الحقيقه المؤسفه انها ولا حاجه من اللي بيقولوه عليها او حتي ان الكلام اللي بيتقال عليها اكتر من حقها, و ساعتها كلنا عارفين العربيه من اول النمر ما تتحط عليها بتخس كام في البيع, و يبقي ذنب الراجل ده في رقبت اللي بيوهم الناس بالعربيه و كل اللي شافو الكلام ده و سكتو عليه.
و مش معني كلامي بردو اني بحط من قدر العربيه اللي عاجباه يشتريها فلوسه و هو حر فيها و اللي شاريها و دافع فيها قد كده فدي فلوسه و هو حر فيها بردو و محدش ضربو علي ايده و هو بيختار و اكيد عاجباه و مبسوط منها.
و موضوع توكيلها تعبان من عدمه فده كلام مبالغ فيه لسبب بسيط, هات اي حاجه في بلدنا اداره اجنبيه= نجاح و انضباط
لكن اداره مصريه= معلش غصب عني مكنش قصدي و الكلام بتاع اولي اعدادي ده و فشل ذريع و كذب لانهائي
و انا شخصيا مظنش ان في في مصر توكيل بيتعامل باحترام و بأحترافيه مع عملائه و يعمل علي تحسين خدمته و متابعه رضاهم
و ارجو ان الناس تتفهم اني مش مع فريق ضد فريق بس انا مع مصلحه الناس اللي بتاخد رأينا كمنتدي بنفيد الناس
و شكرا

المشاركة الأصلية كتبت بواسطة Eng_aly

السلام عليكم ورحمه الله وبركاته
أ/امير نشكر لك اهتمامك بالسادة الاعضاء واهتمامك بعدم اهدار اموالهم فى عربيات ليست تفى بأغراضهم او ليست تستحق هذة المبالغ المدفوعه فيها ... اذا سمحت لى بالرد
اولا من المنطقى ان كل واحد بيشترى انه بيفكر فى كل الانواع المتاحه فى حدود البلغ اللى معه وزى محنا عرفين ان المبلغ (80000)طيب المتاح ايه:- لانوس كامله لانوس هاف اوبشن افيو كليو نوبيرا انا فعلا حجزت منهم عربيتين الانوس والافيو بس محصلش نصيب والحمد لله كان من فضل الله سبحانه وتعالى الفرق كبير جدا بين العربيات دى والسيريون انا فى الغالب بيبقى معايا ناس اكتر من الشنط "وفى مرة كان معايا 7 من العيله وكلهم اوزان وربنا يبارك وكنت رايح مدينه العبور من شبرا يعنى مشيت فى الزحمه ومشيت على الدائرى ومشغل التكييف بدون مأحس بأى مشاكل اة العربيه فى بعض المطبات كانت بتحك"ومرة تانيه كنت رايح اجيب حاجات جهاز لأختى عقبال اللى عندكم المهم جبنا طقم صينى وطقم المونيوم وطقم بيركس و لحفاين فيبر وبطنيتين وشويه حاجات كدة مش فاكرها كويس وكل دة فى العربيه وانا واتنين اخواتى العروسه واختها ...اة طقم الصينى مدخلش من باب العمارة وفتحنا الضلفة التانيه علشان نعرف ندخلها.
انا عاوز اقول ان الواحد بيفكر كويس الاول وياخد رايى الناس اصحاب الخبرة ويتوكل على الله بعد صلاة الاستخارة وربنا يوفق الجميع
ثانيا العربيات لها عدة مقاييس مش بس الشكل والاوبشنز دى بفلوس يعنى مثلا الافيو 2ازاز كهرباء مش 4 والوحيدة اللى فيها 2 ارباج والاستابلتى دى حاجة طبعا ترفع من اسهم السيارة اكيد واعتقد انها الوحيدة فى كل العربيات اللى سعاتك ذكرتها اعلى استابلتى دة طبعا بخلاف باقى الاوبشنز اللى اكيد كل الناس بقوا عرفينها اما بالنسبه للتوكيل فهو محترم جدا وانا عامل لحد دلوقتى 11000وشويه وروحت التوكيل 3او 4 مرات وبلاقى اهتمام من الجميع والحمد لله ... وشكرا مره اخرى لاهتمامك مره اخرى واحب اضيف ربنا يبارك لأبو عبد الله علشان الراجل دة هو اللى ساعدنى وشجعنى على اتخاذ القرار

بشمهندس علي طبعا اسمحلك بالرد و غصب عني كمان ده حقك و حق اي عضو في المنتدي, و كفايه اسلوبك الواعي في الحوار, علي فكره انا عملت موضوع جديد في القسم العام بعنوان: هل بتراعي ربنا في نصايحك لأخواتك في المنتدي
ارجو انك تقراه, و عايزك تاخد بالك من نقطه انا مكنش هدفي هنا اني اقول علي العربيه انها مبالغ في سعرها , لكن هدفي هو اثبات وجود منافسين لها في فئتها السعريه, يعني بتمنها ممكن الواحد يلاقي ماركات اخري, لكن مقارنات علي اسس اخري زي الاوبشنز او عوامل الامان مجبتش سيره اي حاجه الا الجين تو , و الاختيار يقع علي الشاري
و اشكرك علي رقي حوارك و عدم فتح النار علي انت و ows212 مع انكم تمتلكو العربيه, و ده يدل علي سعه فهمكم للغرض اللي احنا مشاركين عشانه في المنتدي