هل فيه كتير مننا بيلتزم بالقاعده دى وهو سايق سيارته ؟؟؟

**pro_samir** · 25-04-2009 02:31 AM

بصراحة انا شايف ان موضوع ترك مسافة دة فى بلدنا مؤذى أكتر منة أمان
لأن هتلاقى طوب الأرض بيقفل عليك ويدخل فى المسافة دى وهتتتعرض انك تتخبط 500 مرة فى اليوم

و لأن فى بلدنا الموقر طبيعى اللى عايز يغير حارتة مش لازم يكون فى مكان يدخل فية وطبيعى ان محدش هيستناة علشان يغير حارتة ولو مرماش نفسة على اللى جنبة مش هيعرف يغيرها وكون ان الواحد يسيب مسافة فاضية قدامة دى فرصة لا تعوض للى عايز يعمل غرزة او يغير الحارة بتاعتة

طبعا مبلزقش فى اللى قدامى يعنى المسافة بتكون متر تقريبا لو فى وسط البلد وعلى السريع مترين هههه .. على حسب تكدس الطريق والسرعة المهم ميكونش فى فرصة لحد انة يعمل بهلوان قدامى ولازم تركييززز جامد واكون شايف اللى قدامى دة فى اية قدامة علشان افرمل قبل ما هوا يفرمل .. موضوع متعب انا عارف بس تعود وارحم مية مرة من ان كل شوية حد يقفل عليك علشان سايب حتة فاضية قدامك

وفى حتت بقى اللى تلاقى الطريق ماشى اربع حارات وفى الأخر بيصفصفو على حارة واحدة او اتنين زى دخلة المزلقان أو كدة دى المسافة بينك وبين اللى قدامك حوالى 10 سنتيمتر يا اما هتلاقى الناس اللى داخلة من اليمين والشمال بتقفل عليك علشان تدخل قدامك

لدرجة انى مرة فى مزلقان فى دخلة طنطا كان قدامى نص نقل ومركب فى وسط الأكصدام صدداتين كاوتش كدة كبار شوية وبارزين وطبعا مكنتش شايفهم لأنى كنت مضطر الزق فية كالعادة وكل ما يتحرك واتحرك وراة و أقف كنت بحس انى بلمس عربيتة بس كنت مستغرب جدا بلمسة ازاى لأنى بقف قبلة بخمسة سنتيمتر هههه .. مخدتش بالى بقى غير بعد ما عدينا المزلقان وشوفت الصدادتين الكاوتش دول كانو بارزين من عندة

ولو معملتش كدة سورى يعنى لازم اعصابك تسيبها فى البيت ومتحطش فى دماغك انك عايز تمشى وميكونش عندك مانع فى ان الناس كلها تاخد مكانك وتقفل عليك

وللأسف دة الواقع يا اما هتبقى ضحية من ضحايا العربجية اللى بيسوقو فى طرق مصر

باختصارر ..... نصيحة دايما والدى كان دايما بيقولهالى "متديش حد فرصة انة يزنقك"

سواء بقى انة يعمل غرزة قدامك أو انك تديلة مساحة جنبك يدخل فيها ويقفل عليك وتلاقى نفسك بتفرمل علشان هوا يعدى أو أو أو ... وعمار يا مصر

**Samir Elshahawy** · 25-04-2009 02:55 AM

كلام جميل جدا و منطقي طبعا لكن تطبيقه في مصر من رابع بل سادس المستحيلات و هأقولك ليه:
- اللي وراك هايشوف ان المسافة اللي بينك و بين اللي قدامك 3 متر (مش 18 متر زي الكتاب مابيقول) هتلاقيه راح لازق فيك و مديها نور عالي لو بالليل أو كلاكسات لو بالنهار و كمان هايبصلك بأرف و كأنك انت اللي مابيعرفش يسوق و يلعن ... اللي أدالك الرخصة

- الميكروباص و التاكسي أو "توتو" اللي سايق عربية "مامي" هايدخل في المسافة دي حتي لو كانت متر و نص (ماتقوليش أزاي) علشان يعمل غرزة

صدقني ياباشمهندس سمير غصب عنك هتلاقي نفسك لازق في اللي قدامك و اللي وراك لازق فيك زي ماحصل معايا مرة بجد و بدون مبالغة و علي طريق سريع و بسرعة 120 كم/ساعة الفيرنا اللي ورايا كان الاكصدام في الاكصدام و بالتالي انا كان أكصدامي في أكصدام التويوتا اللي أمامي لما أعصابي مش بس باظت ده انا كنت خلاص هأنفجر من الغيظ

**samirayad** · 25-04-2009 03:03 AM

صدقني ياباشمهندس سمير غصب عنك هتلاقي نفسك لازق في اللي قدامك و اللي وراك لازق فيك زي ماحصل معايا مرة بجد و بدون مبالغة و علي طريق سريع و بسرعة 120 كم/ساعة الفيرنا اللي ورايا كان الاكصدام في الاكصدام و بالتالي انا كان أكصدامي في أكصدام التويوتا اللي أمامي لما أعصابي مش بس باظت ده انا كنت خلاص هأنفجر من الغيظ

على فكره ....ده مش كلامى ومش من عندى .........دا من كتاب فى الوعى المرورى ( وأنا حطيتله شوية توابل فقط )..........وبحلم زيك وزى الكثير .....بــــــــــــالمــــــــــدينه الـــفا ضــــــــــــله .........

**MohabSaeed** · 25-04-2009 02:10 PM

بحاول اسيب مسافه كافيه بينى و بين الى امامى لكن المشكله فى الفهلويه الى بيجو و ياخدو غرزه و يدخلو قدامى ... فساعات كتير لو الطريق زحمه و ماشى بسرعه بطيئه مش بسيب مسافه كبيره .

**zocor742** · 27-04-2009 12:13 AM

السلام عليكم
معلش يا باش مهندس انا لسة واخد بالى من الموضوع
وهى بجد قاعدة امنة بس زى ما بعض الاعضاء قالو انك لو سيبت مسافة بينك وبين الى قدامك هيجى واحد يقوم كاسر عليك ويدخل قدامك عشان كدة انا مش بسيب مسافة كبيرة اوى يعنى معقولة نسبيا عشان مديش فرصة لحد يكسر عاليا

وشكرا يا هندسة على الموضوع الهايل دة

**lancerevolution** · 27-04-2009 12:20 AM

بطبقها و على طول بلاقى تاكسى نط فيها فلما بيكون مزاجى مش رايق بكبس و مبخليهوش يدخل
بس غالبا ببقى سايب المسافة دى

**lancerevolution** · 27-04-2009 12:22 AM

المشاركة الأصلية كتبت بواسطة samirayad

على فكره ....ده مش كلامى ومش من عندى .........دا من كتاب فى الوعى المرورى ( وأنا حطيتله شوية توابل فقط )..........وبحلم زيك وزى الكثير .....بــــــــــــالمــــــــــدينه الـــفا ضــــــــــــله .........

المدينة الفاضلة دى نكته جديدة بس مش هنقول لأ لو بقت مدينة فاضلة

**sab3aawy** · 27-04-2009 09:21 AM

ده كان رد لى على احدى الرسائل فى موضوع مماثل اسمحول لى بنقلها هنا

"مترين ايه بس يا صديقى، مترين دول معناها ان اللى قدامك لو فكر يدوس فرامل هتكون عربيتك تحت عربيته قبل ما رجله توصل لدواسة الفرامل

مسافة الأمان المعترف بها عالميا تساوى سرعتك محسوبة بالأمتار، يعنى لو ماشى بسرعة 100 كيلومتر فى الساعة تسيب 100متر بينك وبين اللى قدامك ، وحسابها سهل جدا حيث انك بسرعة 100 كيلومتر فىالساعة تقطع ال 100 متر فى 1 على 1000 من الساعة اى 3.6 ثانية ، وبالتالى فال 100 متر يمكن حسابها بأن اللى قدامك لما يعدى من جنب اى علامة من علامات الطريق مفروض انت تعدى من جنب نفس العلامة بعد 4 ثوانى تقريبا، لو خدنا مثال اخر علشان نوصل لنتيجة مبسطة فهنلاقى انك لو ماشى بسرعة 50 كم/س فانت هتسيب 50 متر ودول على سرعة 50 كم/س هتقطعهم برضه فى 1 على 1000 من الساعة اى 3.6 ثانية، يبقى برضه هتسيب 4 ثوانى بينك وبين اللى قدامك ، يبقى مسافة الأمان على اى سرعة هى انك تسيب 4 ثوانى بينك وبين اللى قدامك ، يعنى هو لما يعدى من جنب اى علامة من علامات الطريق انت تعدى جنبها بعد 4 ثوانى ،

صحيح ان ده كتير بيكون صعب فى بلدنا لكن فى هذة الحالة ال 3 ثوانى تنزل الى 3 ، 2.5 لكن مش مترين، المترين دول على سرعة 100 كم/ س انت بتقطعهم فى 76 مللى ثانية، يعنى اقل من 1 من عشرة من الثانية ، وهذا ال 1 من عشرة من الثانية هى اقل فترة استجابة لحواس الانسان، يعنى اللى قدامك لو داس فرامل انت محتاج اصلا 1 من عشرة من الثانية علشان تدرك ان لمبة الفرامل نورت ، ناهيك عن انك تاخد رد فعل بأنك تضغط الفرامل والفرامل دى تبتدى تعمل حاجة، فيما معنا بصورة اخرى انك لو سايب مترين بينك وبين اللى قدامك على سرعة 100 ، هو لو داس فرامل فجائية انت وهو هتكونوا كتلة واحدة قبل ما تدرك ان هو اصلا داس فرامل اصلا"
__________________
سبعاوى