الموضوع: مساعده عاجله يا شباب

محدش يقدر يفدني في الموضوع ده يا جماعه؟

الخدعه ان ضمان المساعدين 20 الف كيلو وبالواسطه كمان
هو الواحد اتعلم بقليل !!

معلهش ياعم tayson54 عوضك على الله

ما هو ده المطب اللي عملته شيفروليه في موديليها الأفيو والأبترا كانو أرخص عربيتين في فئاتهم علشان يخيطوا الزبون بعد كده

في الضمان وقطع الغيار والذي منه ..

روح يا عم إحمي عفشة عربيتك وغير المساعدين فوراً وإشتري دماغك

على فكرة :

إوعى حد يقولك أن المساعدين اللي ضاربين ممكن يتملوا ويتكبسوا ويتركبوا تاني _ أنا كنت هقع في المقلب ده وربنا ستر

لأن العملية دي كانت بتنفع لغاية سنتين فاتوا لما كان متوفر أويل سيلات أصلية أما الآن الموجود منها مضروب يعني كل أسبوع

هتفك المساعدين وتملاهم وتكبسهم وتركبهم تاني وإدفع يا باشا ...

انا نزلت دورت علي مساعدين في الحرفيين وف شارع دمشق لكن للأسف مفيش مساعدين يركبوا علي الأوبترا غير المساعدين بتوعها سألت علي kyb ومونرو او حتي اي حاجه مفيش .
طبعا كان موجود gm الكوري بحوالي 1800 جنيه لل4 مساعدين
وكان فيه مساعدين gm صناعه صيني ب 1500
وكان فيه كمان مساعدين صيني لكن مش gm لكن يركبوا علي الأوبترا بحوالي 1000 جنيه لل4 مساعدين .
الكل اجمع ان المساعدين الكوري اغلبيته مضروب غير وجود العيب الشهر في المساعدين اللي بيخليهم يضربوا زي ما حصل معايا كده
لذلك بفكر جديا بنسبه 95% اني اجيب المساعدين الصيني اللي ب1000 جنيه علي اساس انهم ارخص من الكوري ب70% تقريبا وفي كل الأحوال سواء اشتريت الكوري او الصيني هيضربوا (متوسط تشغيل سنه تقريبا) يعني كسبت سعر ارخص وريحت دماغي .
لو فيه حد عنده اوبترا اشتري لها اي مساعد تاني كويس ياريت يقول عليه ويفدني قبل ما اشتري (هشتري بعد اسبوع ان شاء الله) بحيث ابقي انا كده درست الموضوع من كل الزوايا ومخسرتش حاجه والكل استفاد

الف شكر وانا فعلا كلمت هشام لهيطه وقالي مفيش حاليا وفيه شحنه جايه بعد اسبوعين لكن انا مش عايز استني كل ده لان اضرار الأنتظار مش كويسه فعلا وكمان تكلفه الصيني علي اد ايدي حاليا خصوصا والموضوع ده جاي في عز الزنقه (ربنا يفرجها) ففكرت اني احل مشكلتي اولا بأي حاجه تمشيني وبعدين لما تفرج ابقي اشوف مونروا .
حاجه غريبه اوي بالنسبه لمساعدين المونروا فيه حد عنده ورشه ميكانيكا ومشهور قالي لي ان مسادعين اوبترا لو كانوا مظبوطين كانوا هيبقوا احسن من المونروا بكتير وكمان في عفشجي مشهور في الحرفيين معرفه واحد صاحبي قالي لي بلاش المونروا شوف اي حاجه تانيه ... حاجه غريبه مع كل اللي بسمعه عليه هنا انه افضل مساعد ..عموما ده مش وقت حيره انا عايز انقذ العربيه وكمان هتبقي فرصه حد يجرب المساعد اصيني للأوبترا لكن لحد دلوقتي مفيش غير مونروا اللي ممكن يركب علي العربيه علي حد سؤالي لهشام لهيطه قالي هيكون عندي بعد اسبوعين لكن مفيش ولا kyb ولا اي حاجه تانيه ممكن تركب علي الأوبترا (سئلت في الحرفيين وش دمشق )