#### اسوأ سمكرى بيتلز ####

**timonet2020** · 04-05-2009 12:50 PM

انا لسه جديد فى موضوع العربيات .. بس فهمت الناس بتقول عالصنايعية كده ليه بسرعة ..!!

انا من فترة قريبة زى ما بعض الاعضاء هنا عارفين عملت حادثة بعربيتى البيتلز .. وبناء عليه بدأت رحلة الشقاء و الاصلاحات
بدات ميكانيكا عند الحاج محمد على بتاع جسر السويس .. الراجل بصراحة كويس مع بعض التحفظات ..... " بس عالاقل ما يضركش"

و بعدها للاسف اتخبطت فى عقلى و اتدبست فى التعامل مع السمكرى " عمرو زكريا" رغم ان الاعضاء هنا حذروا منه .. و بالذات اخونا احمد سالم ....

الاول هو طلب 400 جنيه !! و كان هيستعدل رفرف و حتة فى الجمب اليمين و يلقط شوية حاجات و يركب رفرف جديد ... و بعد فصال وصلنا ل 250 جنيه

تانى يوم لقيته بيقول الرفرف التانى مش هيستعدل "طبعا كسل منه" لانه ما كانش بايظ اوى كده .... و قاللى كده لازم تغير الرفرفين
و قاللى انه فيه شوية شغل فى برواز الزجاج الخلفى و كان عايز يزود كمان 100 جنيه فوق ال 250
انا طبعا اعترضت و قلتله لو فيه شغل زاد فى البرواز .. ففيه شغل مش هيتعمل فى الرفرف و دى تشيل دى
طبعا البيه ما عجبوش لانه عايز يطلع منى اى فلوس و السلام
الاخر عمرو محمد على قاللى سيبهولى و نبقى نراضيه ب 25 جنيه زيادة فى الاخر و خلاص ............
و اتفقت مع عمرو محمد على انه هيجيبلى الرفرفين الجداد ب 550
بعدها لقيته بيكلمنى و بيقوللى الرفارف الجديدة ب 650 و انا لقيتلك اتنين مستعملين نضاف ب 450 ..!!!!!!!!!!!
قلتله لا شكرا انا مش عايز استعمال انا هاجيلك بكره و ما تعملش حاجة غير اما اجيلك

المهم نزلت التوفيقية و اشتريت الرفرفين ب 500 جنيه جداد !!!!! و رحت وديتهمله و قاللى تعالى استلم بالليل

بالليل رحتله كان خلص ..... و طبعا ما عجبوش الحساب اللى كنا متفقين عليه "250" و قعد يتكلم باسلوب زبالة ..... و عشان يركب الكاوتش و الحاجة بعد بتاع الدوكو ما يخلص كان عايز 150 جنيه !!!!!!!!!!!!!!
و رغم انى كنت هزوده 50 جنيه و احاسبه على 300 عشان اخلص .."رغم انى مش مقتنع انه حقه" ... قعد يتكلم باسلوب ما عجبنيش .. اللى خلانى فى الاخر اسيبه و امشى و قولتله انى هبعت عمرو محمد على يتحاسب معاه احسن

و يا ريت على كل ده الشغل طاع تمام

عالعموم انا قلت احذر الناس من التعامل مع صنايعى زى ده "اسوأ صنايعى " ...

و منه لله هو و اللى زيه

===============================
اخوكم تامر عفيفى

**shady_hamdy** · 04-05-2009 01:23 PM

كل الصنايعية بيحوروا

**ihab** · 04-05-2009 01:53 PM

محدش بيتعلم ببلاش
قدر الله و ما شاء فعل

**mynameh** · 04-05-2009 02:03 PM

المشاركة الأصلية كتبت بواسطة ihab

محدش بيتعلم ببلاش
قدر الله و ما شاء فعل

**ابوهاشم** · 04-05-2009 05:02 PM

معلش ياتامر
فعلا ماحدش بيتعلم ببلاش
والحمد لله انها جت لحد كده
واظن بعد كلامك ده ماحدش هيروح لعمرو زكريا ده تانى
ونشكر المنتدى اللى جمعنا ببعض علشان نفيد ونستفيد
من تجاربنا مع الصنايعيه وقطع الغيار
وبرافو عليك انك روحت اشتريت الرفارف من الوكاله
كان هيتعمل عليك شغل فيهم
والمفروض ماحدش يسلم نفسه لصنايعى يشتريله حاجه
على قد مانقدر نشترى حاجتنا بنفسنا ونفاصل فيها
وعلى فكره فى موضوع هنا عن اسوء صنايعيه للبيتلز
ياريت تطلب من الاداره نقل موضوعك ده هناك
او تذكره انت هناك افضل علشان يكون مرجع لاسوء صنايعيه
اتعاملنا معاهم ليتم الحزر منهم بشكل واضح
وادينا كلنا بنتعلم
ومافيش صنايعى كويس فى كل حاجه
بس احنا بنتعامل مع احسنهم علشان مصلحتنا
واملنا نوصل لافضل صنايعيه وندل بعض عليهم

**timonet2020** · 04-05-2009 05:42 PM

شكرا يا هاشم باشا
انا ضفت موضوعى زى ما قلتلى

**أحمد سالم** · 04-05-2009 06:25 PM

السمكرى " عمرو زكريا" رغم ان الاعضاء هنا حذروا منه .. و بالذات اخونا احمد سالم

فعلا انا قلت كده لانه من اول اتفاقاته مع الزبون تحس انه فهلوى وعايز يعمل شغل عليك
على العموم هو الخسران
والحمد لله على رجوع العربيه بالسلامه
ربنا يبارك لك فيها ويكفيك شرها

**Golfer05** · 02-08-2009 03:07 PM

انا برضه عايز احذر كل اصحاب الجولف والفولكس بصفة عامة عدا البيتلز لطبيعة اختلاف الصنايعية انا عايز احذركوا من ايهاب اللي جنب عمر افندي فرع احمد عرابي المهندسين. الراجل ده فعلا مثال الاستغلال والسرقة انا رحتله عشان سير عندي اتقطع قعد رازعني جنبه طول اليوم من الساعة 4 الي الساعة 11 وفي الاخر قاللي تعالي بكرة عشان الناس قفلت ومش لاقي سير دلوقتي وطبعا اعصابي فلتت مني وشديت معاه لقيت ميكانيكي عنده فاكر نفسه بروفيسور جاي يوضحلي ان ما فيش حل غير كده فقلتله يعني كل مجموعة الريجلاش اللي عندك دي ومضش عارف توفق سير وشديت معاه هو كمان واخيرا اتمختر وركب السير و زي ما يكون عمل اللي ما يعمل مع العلم انه ركبلي سير مستعمل و في الاخر بيحاسبني علي 80 جنيه سعر السير بالمصنعية وعشان العطلة اللي انا سببتها لسيادته طول اليوم . وحسبي الله ونعم الوكيل

**ahit** · 03-08-2009 09:20 AM

للأسف غالبية الصنايعية كده إلا من رحم ربى
و من الأفضل إن الواحد يعرف أكتر من صنايعى فى نفس التخصص عشان نبعد عن إستغلال بعضهم و لكن للأسف فيه أمور من الصعب إنك تعرفها إلا بعد ماتيجى رجلك و تدبس فيها و ربنا يسترها معانا جميعا.